Read Hatam YESAYA 18 Bible Online

YESAYA 18 - Hatam bible

YESAYA 18

¹ Mindhe ninyehei nibimbiti mitibim kwei leu minu gom ei minyei Sudan nya ite dima ug.

²Nibou niya hacan nya di nibou ndig cuk yok nya di ikwei leu minu dima ibri ut mirik kul nya ba, ibimbut ei Minyei Nil ningwa dip leu nibrig ug ei ninggup. Je di nibou niya hacan nya di jibri mirik kul e, ma jingkwei haninyai ug ei jitimieisi di bon minyei ninda-nda di biam dima. Ma jittei nisok nihyetti gom mem jide minu di sindem bibor bitut jide timiei nya di intig bou jei ba, ingkek pap-nap kei di tungwatu dihyeisi dini hagom ittin tut yok nya.

³Mei! Je di jibong ei dihyeisi dini jahagom e, ma jiyok jiyai kep kendera nya di siceu itas bidem nungug dip nya! Ma jingig jitingou mem pun mbrei di imiep a!

⁴TUHAN pai bida “Midicap leu dibongti di jo anai ug ei bijehei mu bidicap brei bou diyai him nyahan kin gi kwes noyam kin nggou di cut nding mem mmun di hou dut kui mem nijam nikos ningat kui ig gudanti. Diba diyai di kwes-kwau bicap bidem mpia di com nimig kwes kei mem mpia ngket.

⁵Tirigi nijam di tungwatu nya ikos ba anggur ngat bigyo lo, niabiati nitou tou billet leu ba, ba anggur ningat nggwop ei ninjem him bigyo lene krop kei mem gima siceu nya migya kep mben Sudan bitimek hak noyam kin gi iba singau bikos ba anggur ninda nya leu pimo.

⁶Yo dima mikes tentara di ide di imai nya ingut bijo hak binok ha nya ide mun di igyem kep ei nijam di ngei-ndung cut binok mindhe-ndhe di iten pos nya ide mun di igyem mem nijam di hou es cut.”

⁷Njap ngon bou mitau ne yo di isindem di inyeng jei pima cem timiei di intig bou jei di ingkek pap-nap kei di tungwatu dihyeisi dini hagom ittin tut yok nya pima cem mibon midut nikwas mun tut TUHAN Di Ninyeng Jei Bibor. Yoni mijo leu ide minu di bon minyei ninda-nda di biam pima leu api ikwei ei Nungug Sion ei gumihyep di tungwatu nya ikuk yok bak TUHAN Di Ninyeng Jei Bibor eisi.