Read Hatam YESAYA 19 Bible Online

YESAYA 19 - Hatam bible

YESAYA 19

¹ Gini ne nisok nihyetti tut mben Mesir ri. TUHAN kwei ei minu Mesir bikui bumbuhui di bit hou haninyai. Kwar di tungwatu nya ikuk yok bak nya ei minu Mesir yahagom idigit-digoi ei Noho bei lene mben Mesir ingon mien ttin.

²TUHAN pai “Midibindei kiju pran adig-ajoi ei minu Mesir ba, adig-ajoi nya mihwen yam. Yo di ninttig-tta nya cem mihwen yam ba, minu ndig mihwen bit minu ndig. Nibou di inyeng tak kep nya mihwen nibou di inyeng tak kep nya.

³Midibindei ba, mben Mesir ingon kanti di itin ei nya mipek kep bi leu api mimbri di kui ingkek dahat leu yok. Yahara kwar nya bimpu yok ba, yahara nung nya kin ninnei rom nya cem tut nipingokti di bindo puig di kei biyok.

⁴Midikes mben Mesir ei nibou ndig di ngondut tungwatu kan bi nindati ba, ninyeng tak kep yok isibut biborti. Da di TUHAN Di Dinyeng Jei Bibor disimbot dat tu.”

⁵Minyei Nil ningei misri bicut ba, pingge bingak-cai cem.

⁶Minyei di ikkin bou inda him nya hagom ninghap mimpiei lewo minyei ngei pingge bingwig leu. Lipig kin mintu-minta mui bingwig.

⁷Njita ngan di ibahap mpia ei Minyei Nil ninghas him di jei ndig dima mehei noro hagom mimui ba, bit hou.

⁸Nipos kep wau cig nya yahagom minso bipim. Lewo ide simper di nggwen kin jala di ide nya bon ninyeng mem yok bu bi. Niba mong bibien kep minghas cig nya ingon dahat.

⁹Nibon kep minghas linen di nggriu-nggrop cig nya kin ide awak nya yahagom ide nibrim ningkekti micut leu yok.

¹¹Nibou minu ndig Zoan nya ibbwe-bbwau hak ug! Mben Mesir di ingon ki nya iba ningon mbumti bipingok tungwatu! Ibrim ingkek kep nibou ndig bipai bak bipia yoni ne pung di ingon ki nya kin nibou ndig nya ide nintun him di bram yam nya ri!

¹²Na di nibou ndig Mesir e, ade nipingok kep ngonti cig di ingon ki nya rigitou i? Mpaba ikan tut mun di TUHAN Di Ninyeng Jei Bibor tin ei ningon kanti tut dima mem minu Mesir tu e?

¹³Nibou minu ndig Zoan kin Memfis nya ibbwe-bbwau hak ug. Suar ma yoni ibie tut ide limwa nya noro ibindei srawir yok hak ug.

¹⁴TUHAN rino bindei ba, iba nipingokti di bindei di ingon kiowi niti bipingok ide limwa nya. Gima ribindei di mben Mesir ibon mun tunggwei-tunggwei nyen ba, intig kriek-kriek nyen bidem kep yo di idut pes di ibou ngwak sibui di yonti injim dia tut yok ba, icut bitoi yonti injim a.

¹⁵Nibou nya kin limwa nya kin yo di ibon inyeng kin yo di ibon inyeng bi nya cem ei minu Mesir isindem mem gima impu yok bi.

¹⁶Njap ngon bou midem leu api mben Mesir minok sop di digit-digit wai kin sop di ttin-ttin wai. Mpe dino ingat TUHAN Di Ninyeng Jei Bibor kon ninda mem gima kes hukum ei yok dip ne idigit-digoi lewo ittin.

¹⁷Nihyet di kui yam bibor ei minu Yehuda rinok mun di biyai nidigit bak mben Mesir ba, bipingok kep ingonti tut TUHAN Di Ninyeng Jei Bibor Nide nikos tutti di bitut yoni.

¹⁸Mpe dima lene mben Mesir iba nihyet Ibrani bimbrap ei minu ndig ningat muhwi ei minu Mesir. Timiei minu dima yok miyeheng bitug hon TUHAN Di Ninyeng Jei Bibor ninyeng. Ijem minu ndig gom ninyeng “Minu Ndig Mpia Yaisi”.

¹⁹Mpe dima lene nimbar hum dok gom mijo ei minu ndig pmem ei minu Mesir ninggimau yon mem TUHAN. Lene yo dima mitas tiang tig gom biya pijum ei minu niya kwas yamti mem TUHAN.

²⁰Nimbar hum dok kin tiang dima nok bindo tut TUHAN Di Ninyeng Jei Bibor di ningat rin ei minu Mesir ri. Gino siceu ico kep mben dima ba, yahara bak TUHAN bimpu yok lene Noni mipinak tungwagom mem gi miteu yok bingwes ngun.

²¹TUHAN mindo Nonti bak mben Mesir leu api yoni miba ingon com Noni bikuk yok bak. Ba, ibijem mindhe-ndhe mem midut di ibon ei nimbar hum dokti kwei ba, ibittei munkwas cem binjei bak. Yoni miba neheng bipreu ei mem Noni ba, igyai bipek kep mun di ipreu ei mem Noni dima.

²²TUHAN mimbas mben Mesir noro Noni mibindei ba, ikei hanyen. Yoni mikiek ndam TUHAN leu api Noni mibuhup ide nadi bibindei ba, ikei hanyen yo.

²³Mpe dima lene simpak ndig hi mimbut buug bipek kin minu Mesir kin minu Asyur. Timiei minu ndig cin dima mingkwei-ngkwei nyen kak simpak dima binduk yam ei gom mem gima ikuk yok bak Allah cem.

²⁴Mpe dima lene mben Israel inyeng jeisi noyam kin mben Mesir kin Asyur nya inyeng jeisi. Ba, tungwatu dihyeisi dini hagom mitug ndei mun di kei tug hon mben ningai dima.

²⁵TUHAN Di Ninyeng Jei Bibor miyai gi kei biyok bipai “Ditde limwa Mesir jen kin mben Asyur di dipai tes jen kin Ditde limwa di mben Israel di dimig ei su jen e, midinjei mun di kei bije.”