Read Hatam YESAYA 20 Bible Online

YESAYA 20 - Hatam bible

YESAYA 20

¹Sargon di nok nibou ndig mem Asyur cuk nibou pran Asyur ba, injei siceu bihwen minu ndig Asdod ei minu Filistin.

²Noro ari bingwam ningai nipou tirigi mun dima cut igkep mben Filistin nya bigyo ne TUHAN cuk Yesaya bipas srop kin sinsun kron di juk leu no. Yesaya yai igbit nicukti dima lene ba ningat ngu bimbut bijuk srop ser nimig jou bi.

³Mpe di tentara Asyur igyon ttai minu ndig Asdod ne TUHAN pai “Ditde awak di Yesaya mbut tut ningat ngu ba, juk srop cem bi mem nijam ari bingwam ningai tu. Gini ne bindo di bindo tut mun di micut igkep mben Mesir kin Sudan ri.

⁴Nibou ndig Asyur mikat timiei minu cin dima nok yo di isima di ingat ngu bikri yok ug ei ingkiaisi. Ndigpoi nya kin pilei nya yahagom miba ingat ngu bimbut ba, ijuk sinsun kin srop ser ingkek dip kin imig jou bi. Ba, ijou hangwang bijo hak apino ibiyai nimmai biyok.

⁵Yo di iba ingon com mben Sudan ba, inggei sut mben Mesir cem ne minso ba, ide niba ningon com yo dimati mitimek hak.

⁶Mpe dima lene yo di ibong mukti mipai ‘Jingat mun di cut igkep mben di nyeni iba ingon com di isindem mem gima inyohou nye leu nibou ndig Asyur dima i! Ayo! Bit bon nyeni ingwes ngun kan bi.’ ”