Read Hatam YESAYA 22 Bible Online

YESAYA 22 - Hatam bible

YESAYA 22

¹Gini ne nisok nihyetti tut Mbang Briep Ningat-hi-ngat ri. Timiei minu ndig Yerusalem e, nggon rino jahagom jikui ug ei ig ninjek dip i?

²Ma jahagom ei minu ndig jibon pesta nya bijiba jingon di nggei-hi-nggei bimbos-hi-mbos au. Lewo jide tentara nya di imai ei pranti dini imai drek dip gi ikon pran bi.

³Jide nibou pran nya yahagom inang ba, siceu nya ikat yok nipou tirigi ide tibor tibim bigyo. Mbro nok gino tentara ade di isindem nya inang biyuug ei minu ting lo, siceu nya ikat yahagom ba, isima tu.

⁴Ma jiwaisi dani au. Ma jisindui sut ba, dipim bidibwos kep ditde mben di imai nimbiam nya ug e. Ma jigwam ser dingon au.

⁵Ningat ne TUHAN Di Ninyeng Jei Bibor ba, Sindem Bibor cem kos tut njap dini nok njap niyok nisinsiou ei tungwatuti kin niyai nidigit ei yamti bak tungwatu kin nibinggek yam nyenti cem ei Mbang Briep Ningat-hi-ngat. Siceu nya inggek ngug tig nya di bikrop ttai minu ndig dini bilus tu. Nihyet nahara biyam mem nimpu yamti gunggwei ei mbigdip nya.

⁶Tentara Siria injei sut ide nimpung di ibri kuda kin gi ibri kroba pran kwei. Tentara Elam injei sut ide hampiap kin singau tibor di jo inda him nok-nok. Tentara Kir itin ei ide mun di ibipukep tibor ninggwenti nya di ibicuon ser igyaisi.

⁷Mbang briep nya di nnum kei ei minu Yehuda mpung tut kroba pran nya. Nimpung tentara di ibri kuda nya ikwei yem mpia hak tut ide minggwen nya ei minu ndig Yerusalem de dimbou pmem nya nuhui a.

⁸Minu Yehuda de tentara nibousi di igya coi nya hagom timek ningwig a. Mpe dima lene jicat minggwen nibikon pran nya leu tentara nibousi.

⁹Jiyok jiyai kep minu ndig Yerusalem de ngug tig nikimboti mang bibor di suar jikinding kep hanyen ba, jehek minyei kwei leu minyei bousi di jo nite bei mpia nibiho.

¹⁰Jiyok jiyai kep ig hagom ei minu ndig Yerusalem ba, jinggek ig ningat poi leu api jiba tig di jibei leu ig dima bikinding ngug tig nikimboti pima yok.

¹¹Jibon bak minyei ei minu ndig ninsi bijiris minyei kwei leu ugyou gi nitimiei eisi. Noro jikiek joho leu Allah di tin ei ningon kanti tut mun dima yok hagom mimbrek ngan tu. Jibindei ba, hagom micut igkep je.

¹²TUHAN Di Ninyeng Jei Bibor di Sindem Bibor cem cuk je ei mpe dima leu binhyepo jipim ba, jibwos-bwos nyen cem jikak jibou nta leu ba, jibijuk sinsun kron cem.

¹³ Noro jigiyai gima bi. Mpe dima lene jingon llei-lau ba, jibon pesta bit yam. Jibui sapi kin domba nok mikwau bijiyem bijidut ba anggur ningei cem. Jibijem biyam “Jikwei bigyem njita bidut ndia ngei cem lewo njap ne imai ug rin o!

¹⁴TUHAN Di Ninyeng Jei Bibor di Sindem Bibor cem ndo Nonti bida bipai ‘Ningat ne midikos ser ide niyai munti di kinei bibor dima bi sren. Ba, nok gima kikau ug bipek njap di ibimai kep. Da di TUHAN disimbot dat tu.’ ”

¹⁵TUHAN Di Ninyeng Jei Bibor di Sindem Bibor cem cuk da biduug ngat Sebna di nok nibou di ninyeng tak kep nimpung awak nya ei nibou ndig de ig leu binhyepo dipai sut TUHAN nisok mem noti dini bak,

¹⁶“Akan bipia na dini tou i? Adem mem gima atu hak mihyeti nok nimai jui mem nanti ei nungug tig e?

¹⁷Mbro nok anyeng jei lo, midikat na bidicom na ug ei minu ting.

¹⁸Midikijum-kijum nyen na leu api dicom na noyam kin no di com bar ug ei minu di nindig. Atug ndei nimai ei sirima simin ade kroba pran di anggei sut nya nitta. Abindei ade andigpoi de ig bei nsi nya inyeng kinei tu.

¹⁹Gima rino midicut na leu ade midyai di ayai kep ba, midibindei juk na leu ade ninyeng jeisi.

²⁰Mpe dima lene midijem Ditde awak di Elyakim di Hilkia nipmot kwei.

²¹Midijuk ade sinsun ninyeng jeisi ei noniti biditi ade bang di abikri kep antig bou ei noniti. Midiyai ade nisindemti hagom binoni leu api noni minok timiei minu ndig Yerusalem kin Yehuda nya icig ri.

²² Noni miyai nisindemti titut yam ei nibou ndig di ntun Daud him ninda behei. Noni mikrau kusin mem minu ndig dima ninyeng tak kepti cem. Gino noni kau leu lene bit bon hi dima nggam kep kan bi. Lene gino noni nggam ser lene bit bon hi dima kau leu kan bi.

²³Midiyai nide ninyeng jeisi di ngkiem kei bak noyam kin keu nindig di kinai ngug tigti bingkiem kei. Noni rinok nibousi di bindei ba, tungwatu nya minggei sut noni kin nide ig bei nsi nya yahagom a.

²⁴Noro nide keret di imbier kim noni kin gi nonti su no mem nya mibuhun tak noni. Yoni mindun ninda him noyam kin yeng di isreu ei keu nindig him.

²⁵Gino gima pek kep mem noni lene keu nindig po ipek di kinai ngug tigti di ngkiem kei pima mipas bicut ug. Apino keret di imbier kim noni di indun ninda him yahagom ingwig bohon eisi ri. Da di TUHAN disimbot dat tu.”