Read Hatam YESAYA 24 Bible Online

YESAYA 24 - Hatam bible

YESAYA 24

¹TUHAN mibindei sar dihyeisi dini. Apino dihyeisi dini ngoi ba, mpia mbum-bra bram. Noni minggek bikiek ninjek dip bibindei ba, timiei dihyeisi dini intek gimahap.

²Mun di buhun dini micut igkep yahagom bitut imam nya kin limwa nya kin awak nya kin yo di yuubon yok nya kin nitri-nipek mun cig nya kin yo di idahat ningwam leu hiter nya kin nipas ninda leu mitiei cig nya kin yo di yuhui mbum nya yahagom noyam.

³Dihyeisi dini misinsiou ba, TUHAN mibindei bitimek. Noni simbot dat tu ba, mun dima micut igkep yok sindam.

⁴Dihyeisi dini mui bijet ba, mpia-bbed him kin dihyeisi dini hacem inggwen sur yam.

⁵Nirom mikui dihyeisi dini tug hon timiei nya di itunggwei Allah nicukti nya di iba Nide nidimig sutti nya bikek ba, ingkek ndok tut Nide nipreu ei mem yokti nya cem bijo ninno bijo kikau.

⁶Gima rino TUHAN sigion dihyeisi dini bikes hukum ei yahagom dip. Yoni mibiang ide sisar nibuhunti. Noni bindei ngkiong yoni leu ba, poi mien he rima ingwes ngun a.

⁷Ba anggur kinei ba, nggruk mem gima ipek ningei a. Yo di nipou yo ingon nggei-hi-nggei noro tini bu ne ingon ngguk.

⁸Imiap gi ikek nggong mbrei di biyai ingon di kei ba, iba ingon di kei bimpig-mpig nyen mun di nggileng cem bu bi. Yo di igyai nillei di ighyet kui yam pima kes hon tu.

⁹Hi gi dut ba anggur ngei ba, bipai doia nya bu bi. Hi di nggobiau sut pes di nyop kei bu bi.

¹⁰Minu ndig sinsiou su apino dimbou nya hagom sren lewo yo di ig bei nsi nya ittin bibor.

¹¹Tungwatu ighyet srou kui yamti kak puig nya lewo ba anggur ngei ngwig leu yok. Ninggei-hi-nggeisi pror leu minu dima bijo ninno bijo kikau.

¹²Minu ndig timek bingwig ba, dimbou pmem nya cem nggek sinsiou.

¹³Mun dima yok hagom micut igkep dihyeisi dini titut yam bitut mben nya hagom ba, noyam kin gi pek kep ei nijam niyai ningat leu miaisi kui ig. Noyam kin mpe di ipuk biei zaitun ningat kin ba anggur ningat hagom bingwig leu miaisi nya.

¹⁴Yo di ingwes ngun nya miba ingon di nggei-hi-nggei bipai doia. Yo di ibong ei nite bei mpia nicutti mitri tut TUHAN ninyeng di jei bibor ba,

¹⁵yo di ibong ei nite bei mpia nipriti mikon ninyeng a. Timiei di ibong mukti nya mikon TUHAN Allah Israel ninyeng bijo nai.

¹⁶Doia nibikon mben Israel di nok mben gom di ningon sren ninyeng no tibim kwei leu dihyeisi dini nohon keti ei tungwatu nya itingou nsi. Noro buhun bibor mem dani! Dicut ug ei nikineisi tu! Nikiek nimig jou tut cig nya no yaham imbuk kep da lene gima mijo kikau yo.

¹⁷Timiei dihyeisi dini titut yam e, ma jingig jitingou mem dihyet bijimiap! Ningon digitti kin jui kin bon mem kep ser je tu.

¹⁸Yo di inang leu mun di biyai ningon di ttin biyok misrei ei juiti lene yo di ingwes ngun leu jui misrei ei bonti ba, bon misrou yok. Biget di but mbras mibut kwei leu mpia-bbed him ba, cou nipmem di bahati tut dihyei nikiou nya ugwa-kwei.

¹⁹Dihyeisi dini nggos ba, ki kukiau bindung lene bingmai cem.

²⁰Dihyei dini minok bar di sibui-sibui nyen bidem no di dut pes di nibou ngwak sibui ba, bingmai bidem kep nok ig jibei di hou sigau hwen di bingmai a. Dihyeisi dini mitti lewo nide sisar buhun tak apino mitimek ba, mikiju hanyen bu bi sren.

²¹Mpe dima lene TUHAN mikes hukum ei nisindemti di ingat rin ei mpia-bbed him nya kin nibou ndig dihyeisi dini nya dip.

²²TUHAN minduk nibou ndig nya bicom yok ug ei jui nsi noyam kin yo di isima nya kikau ug bipek njap dima itug ndei hukum.

²³Bed mmun midindi ba, mpia njap micom nimig bu bi. Lewo TUHAN Di Ninyeng Jei Bibor minok nibou ndig di ninyeng tak kep limwa nya. Ninyeng mitak kep yok ei minu ndig Yerusalem ei Nungug Sion dip bindo ninyeng jeisi brei bak yo di ibie tut Nide limwa nya.