Read Hatam YESAYA 28 Bible Online

YESAYA 28 - Hatam bible

YESAYA 28

¹Mun di buhun bibor micut igkep timiei minu Israel di pes pu yok di inggei-nggwang tut ide minu ndig! Ide nikei-kau-keisi pimber hanyen dem kep nok topi di iba mitou binghau bikes ei ibou nggram him lo, mui su. Mun di buhun bibor micut igkep minu ndig di bon ninyeng jei ei mbang briep di nnum kei. Yo di pes pu yok bibor inggei sut minu ndig dima.

²TUHAN mipinak no di sindem bibor di mimbri kui ningkek kwei. Nikwei krosti dem kep nok sigau di yem yok kin biget di mbras nok tig njep kin minyei di su di hwen yok leu api Noni micok tut yok bingwig.

³Nide tentara nya mico kep nibou di illei-lau nya di pes pu yok bibor.

⁴Nikei-kau-keisi ei ide minu ndig di sindi pren hanyen mipren bingwig noyam kin biei ara ningat di nggwop ujau di tungwatu nya ingat lene ibipuk bigyem.

⁵Tto bou midem leu api TUHAN Di Sindem Bibor minok topi niba mitou binghau mem nide limwa nindigsi di ingwes ngun nya.

⁶Noni mibindei ba, nikei nya iba ingon di sren bimbus tungwatu nya ingonti. Noni miyai nibrim ningkekti bak yo di igya ei ngug tig dip di itindei ser ide siceu nya ikweisi.

⁷Nabi nya kin imam nya cem idut anggur ngei kin pes di pu yok bibor. Yoni imbut bitti-tti nyen ba, indrat mpia lewo ibou buwei bibor. Apino bit bon nabi nya ingon dorti tut ningat-hi-ngat di Allah yai biyok kan bi. Bit bon imam nya igwam nok nikei bimbus tungwatu nya ingonti tut ide munhyet kan bi.

⁸Ide meja mpung tut ninjim ningkom apino bon nikeisi ndi pwoi hi bi.

⁹Yoni inso tut da bipai “Noni ngginau tou i? Tou suar ningginau nyeti dima i? Lewo gima dem mem munggwom di sindi idut do bu bi nya he.

¹⁰Mbenjen! Noni nyohou ngginau nye tut hurup kin kata kin nipuig gom-gom sindam.”

¹¹ Gino jikou sut dihyet lene TUHAN mipinak ngkiai nya kwei leu api yoni miba ighyet ngkiai bingginau je bu.

¹²Noni tin ei mpia di mem jibong kep jinghuisi eisi noro jikou sut nihyet.

¹³Gima rino TUHAN miba hurup kin kata kin nipuig gom-gom sindam bingginau je. Leu api jindrat mpia ba, jikinoi apino jibok-ba cem jibiam bon ba, jide siceu nya mikat je.

¹⁴Je di jillei-lau di jinyeng tak kep timiei minu ndig Yerusalem nya e, ma jimiap kep TUHAN nihyet.

¹⁵Jingon jei sut jenti drek dip gi jikwam minggwen bit nimai ba, jeni kin minu nimai nya ide jipreu kep yam tu e? Jiba jingon com bipia tirigi mun di buhun kwei lene mikriau je lewo jikan bipia jide niris ei tungwatu nyati rinok mpia di jinang coi e?

¹⁶ Gima rino TUHAN Di Sindem Bibor pai “Midita cou nipmem di sindem bibor ba, nddong kei cem ei mem Sion. Midiprion tig mma di bon ninyeng ei ig nuhuisi ba, mun di ipas eisi pai ‘Tungwa tou riba ningon com Da bingkiem kei miningon pus tut bi.

¹⁷Ningon sren-srausi rinok nai di ibinai ig dima nikiou ba, ningon gomti rinok mun di ibinai cou nipijumti.’ ” Biget di mbras nok tig njep mibindei sar jide ningon mangti di jiba jingon com nya. Minyei di su mihwen je ei mpia di jinang coi bijiku je eisi nya.

¹⁸Mididip tut jide nipreu ei bit nimai kin jide nipreu ei bit minu nimai nya ide cem apino mun di buhun bibor micut igkep je.

¹⁹Mun di buhun micut igkep je bijo kikau ba, suar jinghim koi sut bikwop njap tekti kin njapti kin mpia ngket kin mmun. Tirigi jingon huk niti tut Allah nisokti lene mporo nittin hwen je ba, jidigit-digoi sut.

²⁰Mijidem kep no di bong ei lat cun di ibong niti apino bong sren ei niti bi. Nide ban dut cem ninyanti dem mem gima binggai no bi.

²¹ TUHAN mikiju bikon pran noyam kin gi po kiju ei Nungug Perazim ba, Noni mikon pran noyam kin gi po kon pran ei Mbang Briep Gibeon leu binhyepo bindei ba, ningon kanti pek kep. Ningon kanti dima jo nibreisi mem tungwatu nya bi! Noni mibindei mbut Nide midyai di bindei ninggap leusi.

²²Dimiap tut TUHAN Di Ninyeng Jei Bibor ba, Sindem Bibor cem nikos tutti mem gima bindei sar jide minu titut yam tu. Ma jihyet kinei sut nihyet nibisok kepti di ditri tut bije dini au. Jei bi lene nggruk bibor mem gima jiteu jenti bijingwes ngun a.

²³Ma jingig jitingou mem dihyet bijimiap kep ba, jingon ya mem disokti nya cem.

²⁴No di yai miai miba ngkimom nitu bitem dihyei bikkin dihyei bibindei ndung dihyei bijo kikau mem gima ta njita bou eisi bi.

²⁵Gino noni tin ei nide dihyei dima tu lene ba njita ngan di nok jintan ninjep nimmun kin jintan ninjep nitiei bigimahap dihyei dima. Noni ndim gandum ngan ninyeng can ei miai ngatti lene ndim njita ngan nindigsi nya ei ninghas him.

²⁶Noni yai midyai dima kan lewo nide Allah ngginau noni.

²⁷Noni ba lat di sapi nya ikri ba, billet gandum ngan leu bi lene bico kep jintan ninjep nimmun bi lene ba kroba nimig bico kep jintan ninjep nitiei cem bi. Noro mem gima ne ba tom di nggan bibui.

²⁸Mpe di noni bindei llet gandum ninjep leu nicap lene bui kikau binem-nnai e? E bi! Noni kan tut nisinati di dem mem gima bindei mbut kroba nimig bidor gandum nintam nidip leu binhyepo bindei ba, nicap tek leu ninjep he lene bindei gandum ninjep binem-nnai bi.

²⁹Ningon ki tut niyaisi dima kwei leu TUHAN Di Ninyeng Jei Bibor. TUHAN ba nikan bidem nibon munti bitin ei ningon kanti mem mun di hagom bidem kei. Ba, ningat ntun him Nide ningon kanti di tin ei nya hagom.