Read Hatam YESAYA 30 Bible Online

YESAYA 30 - Hatam bible

YESAYA 30

¹TUHAN pai “Mun di buhun bibor micut igkep yo di inyeng tak kep timiei Yehuda nya lewo yaham imbuk kep Da. Ibit ingon kanti nya di noyam kin dingon kanti mem yok bi. Yoni kin ngkiai nya ipreu kep yam njiriek dingon kanti mem yok. Tug hon nisinati dima ne ikum ei ide sisar nimangti.

²Yoni yuug ei minu Mesir nipou tirigi ihig ser Da tut dikos tutti mem yok bigyo. Inang coi minu Mesir leu binhyepo nibou ndig dima ya srak ko hagau yok ba, iba ingon com nibou ndig Mesir.

³Noro ingon mipus tut nibou ndig dima lewo kwei ya srak ko hagau yok lo, noni micut bak nide siceu nya.

⁴Mbro nok gino yo di igya hacan di nibou Yehuda nya ipinak yok yuug krau Zoan kin Hanes ei minu Mesir tu lo,

⁵timiei Yehuda nya minso yonti tut gi iba ingon com ngkiai nya di isindem mem gima impu yok bi. Lewo bit bon mben ngkiai dima igyai mun di kei biyok bimpu yok kan bi ba, ingwes pri gau yok he.”

⁶TUHAN tri tut nihyet tut mindhe-ndhe nya di ibong ei iggum ndigsi ndam nite bei mpia nibiho bipai “Yo di igya hacan pima ikak puig ug ei nikineisi ba, ei sirima ne singa kin wou piet kin naga di bon ninyehei ilus-lus nyen. Yo di igya hacan igyai ide mun di nibok kak bibor bak ngkiai di bit bon impu yok kan bi.

⁷Mben Mesir mimpu yok mikui-kausi. Gima rino dijem mben Mesir inyeng bipia ‘Naga Di Mimbri Kui Ningkek Bi.’ ”

⁸Allah cuk da leu binhyepo dipas kep Nide limwa nya igyai munti di mbuk nya ei srat mbum nibiyok ngon kepti di mijo ninno bijo kikau.

⁹Yoni ne mben di yaham imbuk kep Allah. Ingon mang ba, ikou sut gi imiap kep nipingok yokti cem kikau ri.

¹⁰Isrep tut nabi nya bipai “Jikimut juhuigya! Ma jitri tut mun di igbit binyeni au. Noro ma jipingok nye bit leu nyenti ningon kanti. Ma jisindui sut nye ba, nibit ningat-hi-ngat di nikan huk nya he.

¹¹Ma jitti bileu ba, jikak puig hiter leu. Ma jiba mben Israel ide Allah di kwes-kwau bindin nye bu au.”

¹²Noro mben Israel ide Allah di kwes-kwau pai “Jikou sut dihyet leu api jimbuk tut yam bijiris mun ei yamti.

¹³Jingon mui. Jinok ngug tig di nggos bipek guhu bipek gimu. Gima rino mijitti ug ei dihyeisi kros.

¹⁴Midibindei ba, jiki kukiau noyam kin dibijig di ki binnir-wap. Bit bon hi di ngat ninnir wapti hi di dem mem gima biket hum cem bitau minyei cem kan bi.”

¹⁵TUHAN di nok mben Israel ide Allah Di Ninyeng Jei Bibor di kwes-kwau pai bak nide limwa nya “Ma jittin ser jide sisar ba, jiba jibou coi mem Da leu api miditeu je leu sisar. Ma jiba jingon di jo nyahan bicom Da leu api midibindei ba, jisindem bibor.” Noro jikou sut nihyet dima!

¹⁶Leu api jiba jingon com jingon kanti nok gino jibri kuda di imbut sindem bibor leu binhyepo jingwes ngun leu jide siceu nya. Kei bibor! Ningat ne suar ma jinang! Jikan bipia jide kuda nya imbut sindem noro yo di yuhuk bram je mibri kuda di imbut sindem bibor dor njiriek jide bu.

¹⁷Gino jibou sribu gom jingat jide siceu gom ngat di srep huk je lene mijinang leu noni. Gino jide siceu ibou muhwi he isrep huk je lene jahagom mijinang bijingwig. Kendera nidihim gom ngat he mijo nijoti ei mbigdip di jikes ei bijinang ningwig leu dima.

¹⁸Mbro nok gima lo, TUHAN mem kep ser nituti tirigi Noni ngondut je. Noni tin ei mem gima singat tut je lewo Noni ne TUHAN di bon mun di igbit. Yo di iba ingon com Noni igyai ingon di nggei-hi-nggei.

¹⁹Je di jibong ei minu ndig Yerusalem e, mijipim kikau bi. TUHAN ngondut je. Gino jahara Noni lene Noni mimpu je bibuhup jihyet haninyai.

²⁰TUHAN miyai nijam nibingon jingonti di buhun bije mem gima bingginau jingonti. Noro niabiati bu ne Nonti nggre kin jeni apino jingon ngat bipia Noni ningat rima simiak je.

²¹Gino jikriek leu puig lene mijimiap Nihyet di tibim ei jinghim dip kwei di pai “Gini ne puig ri, Ma jibit puig dini hak.”

²²Mijicom jide kwar di jikuk je bak nya di jiba perak kin mas binggai nya hak binok mumpiang. Lene mijibipai biyok “Juug bihigom leu nye!”

²³Gino jigimahap ningan ne TUHAN mipinak biget kwei leu binhyepo ningan dima hei ba, jibiyai ningat di mpung-pias hagau. Minta iggum ndigsi di ug ninno di nimeng ngun-ngau mijo mem jide mindhe-ndhe nimuhup tu di jihyen kep nya.

²⁴Sapi nikre kin keledai di jibiwim dihyei ei jide miaisi migyem njita di kei bibor di itin ei pijum mem yok.

²⁵Bikwop nungug kin mbigdip nya mibindei hei minyei pmot nya mem njap dino jiyon ttai tentara nibousi niya coi di jide nitok ide nya bijiyai nimai biyok.

²⁶Bed mmun cem micom nimig bidem kep nok mpia njap di com nimig. Mpia njap mipiga kei mbimuhwindacan bram yam binjiriek leu nipiga kepti di piga ngan-ngan tu bidem kep nipigati ei njap muhwindacan bicom yam ei nok gom pimo. Mun dini yok hagom mipek kep mem je mpe dino TUHAN ngot kep Nide limwa nya ibok di itug ndei nya ba, binjei mun di kei bak yoni.

²⁷TUHAN de nisindemti kin ninyeng jeisi jo brei mem nye leu Nide mpia di ting tu. Hum kin hum mmup bindo tut niggati. Ba, Noni mbrap lene nihyet noyam kin hum di yem mpia.

²⁸Noni cuk hou bibie Noho bidem minyei di su di kui bigwam ikimam di hwen mun nyeng hagom bibindei sar ngkiai nya binggek tut ingon kanti di kinei bibor di itin ei nya hagom.

²⁹Noro Ditde limwa jen e, jingon minggei-hi-nggei ba, jipai doia cem noyam kin mmun midut di jibon mem jibikuk je bak Noni. Mporo jiyai nillei noyam kin yo di iba porei di imiep nya biyai nillei bimbut ndam TUHAN di ya srak ko hagau mben Israel De Ig.

³⁰TUHAN mikes nihyet di nindig bibor lene bikwop tungwagom-gom ninghuisi mimpig sut Nide nisindemti di mipbor ngat. Niggati bindei hei hum di yem mpia di ngkiong kin biget di but mbras kin biget di mbras nok tig njep kin sigau cem.

³¹Tirigi mben Asyur imiap TUHAN nihyet lene ingon digit bibor tut Nide hukum di buhun apino ighyet sra tut.

³²Tirigi icut ei nittem yokti di jo kep yok nya ne TUHAN De limwa nya iba ndug-ndug kin nggong mbrei biyai nillei. Allah Nonti kon pran bit mben Asyur nya.

³³TUHAN tin ei mpia di mem nindig hum eisi mem nibou ndig Asyur ningut habiei nipou yo tu. Mpia dima jut cem nyan cem ba, mpung tut biei nindig di kui sur mpia eisi tu. TUHAN miba ninnei di miep dem kep aspal ngei di biam bipindei biei dima binjeng.