Read Hatam YESAYA 31 Bible Online

YESAYA 31 - Hatam bible

YESAYA 31

¹Yo di iba ingon com mben Mesir mem gima impu yok mitimek bingwig! Iba ingon com mben Mesir ide tentara nitu kin ide tentara di ibri kuda pran kin ide kuda pran di isindem kin ide kroba pran di sindem bibor. Noro iba ingon com TUHAN di nok mben Israel ide Allah di kwes-kwau ba, yahara Noni mem gima mpu yok bi.

²TUHAN ningon ki bikan bidem tut niyai munti nya hagom. Noni bindei ba, mun di buhun bibor cut igkep dihyeisi dini. Noni mikes hukum ei yo di isibut kin isut bat di impu yok nya dip bit leu nipaisi.

³Mben Mesir ne tungwatu dihyeisi dini he ri. Isindemti noyam kin Allah bi. Ide kuda nya inok mindhe di mipbor ngat bi noro kuda nitu he yo. Mpe dino TUHAN brim ningkek ne mben di isindem bibor dima mikinoi ug ei dihyeisi leu api mben di isindem bi po iba ingon com gi hi di isindem bibor pima micut bihigom. Mben cin dima yahacem mitimek bingwig.

⁴Lene TUHAN pai bida “Mbro nok gino gembala nya yahara bimbrua kep singa lo, bit bon ijji noni leu domba di ttem tu kan bi. Nok gima cem bit bon hi hara bimbrua kep Da di TUHAN Di Disindem Bibor ei mpe dino diya srak ko hagau minu ndig Yerusalem kan bi.

⁵Bit leu nok ha wek gom di kieng ninyehei gau nimien bat di ibong yahamti ne Da di TUHAN Di Sindem Bibor midiya srak ko hagau mben Yerusalem bidiya ser yok bidiya srak ko hagau yok ba, diteu yok bingwes ngun cem.”

⁶TUHAN pai “Je di mben Israel e, jaham jimbuk kep Da bijibon sisar tut Da tu. Noro ma jingkwei hanyen ndam Da nogindini hak ug!

⁷Dem igbit tto bou ne mijicom jide kwar di jikuk je bak nya di jiba mas kin perak bibon di mpung tut sisar bingwig leu je.

⁸Mben Asyur mikon pran bit ide siceu nya noro micut biyok tug hon tungwatu nya ide nisindemti bi. Tentara Asyur minang leu ide siceu nya leu api ide pinai pilei nya minok awak mem yoni.

⁹Ide nibou ndig ningon ttin bibor ba, yo di igya kui noni mittin tut ide siceu nya leu api minang bingwig bikes ide kendera nya bijo ei.” TUHAN simbot dat tu. Nide limwa nya iba midut nindig mindhe ei nimbar hum dokti bikuk yok biNoni ba, inggei sut Noni ei minu ndig Yerusalem.