Read Hatam YESAYA 35 Bible Online

YESAYA 35 - Hatam bible

YESAYA 35

¹Iggum ndigsi kin mpia ngak caisi mporo ingon nggei-hi-nggei ba, mitou nya mikieng ei nikineisi.

²Iggum ndigsi miba ningon di llei bibor bipai doia bimbos-hi-mbos lewo mpia dima miluei nitta binok nikei-kau-keisi noyam kin Nungug Libanon ba, mibon ninnumti noyam kin ngoi dumti nya ei Nungug Karmel kin mbang briep Saron. Tungwatu nya yahagom mingat TUHAN nikei-kau-keisi kin ninyeng jeisi kin Nide nisindemti bou igyai him.

³ Noni misindem tut yo di inda jet nya lene mibindei ba, yo di ibiau lor nya igya nddong kei.

⁴Ma jipai bak yo di ingon ttin nya “Ma jiwin jenti jingonti lene ma jittin-ttin nyen au. Allah mikwei kes hukum ei jide siceu nya dip ba, teu je bijingwes ngun.”

⁵ Mpe dima lene yo di igyai tu nya migyai da ba, mingat mun nyeng hagom bou igyai him lene yo di itingou nam nya itingou tu hanyen.

⁶Yo di imig lit mipri-pri nyen cem noyam kin rusa ba, mibbwe nya iba ingon di llei bibor bimbos-hi-mbos. Lewo ei mpe dima lene minyei nya biam-biam nyen ei iggum ndigsi ba, minyei pmem biam ei iggum ndigsi.

⁷Iggum di dut bibor miluei nitta binok igpong hanyen bu ba, minyei bousi nya mibiam bidem ninggati nya hagom. Cang kin lipig mikieng kep mpia di nipou ne nsien mbrei nya ilus-lus nyen eisi nya.

⁸Puig Di Bie Ndam Niyaijo Nijep Di Jo Kikau mijo ei sirima. Yo di ibon sisar ikak simpak dima bi. Yo di ingkek ndok nya yuhum yo di ikak puig dima insi cem bi.

⁹Singa kin mindhe di niten-pos nya milus-lus nyen ei mpia dima bi. Noro yo di igyai gi teu leu sisar kin niyaijo nijep leu TUHAN mimbut kak puig dima.

¹⁰Yo di TUHAN kwek yok tu nya mimbos-hi-mbos tirigi ingkwei hanyen kwei ei minu ndig Yerusalem. Yahagom iimaisi sieng-siau kei lewo ingon nggei-hi-nggei. Yahagom ingon llei bibor ba, ingon nggan-triot cem. Ningon ngguk biborti kin ningon buhun biborti cut leu yok bihigom tu.