Read Hatam YESAYA 36 Bible Online

YESAYA 36 - Hatam bible

YESAYA 36

¹Hizkia di nok nibou ndig mem minu Yehuda ninyeng tak kep limwa nya ug ei ari bingwam gi nisimnaibrimigtai leu api Sanherib di nok nibou ndig mem Asyur njei siceu bihwen minu ndig ngot di bon tentara nibousi di igya coi nya ei minu Yehuda ba, bindei timek hagom.

²Gima leu api pinak nide nibou tentara di ninyeng jei kwei leu minu ndig Lakhis ug ei minu ndig Yerusalem. Nibou tentara dima njei sut nide tentara di nindig bibor dima kwei mem gima ibidip huk Nibou Ndig Hizkia leu binhyepo kes nonti ei indati hak ug. Ikwei krau minu ndig dima tu lene idis yam ei Gumihyep Nitot Kep Sinsun Cig nya ide di jo simiak minyei di yehek kwei leu minyei bousi gom ei nai nindenti dima.

³Leu api yo di igya kui Hizkia ibou ningai ikwei ngat nibou tentara dima. Ibou ningai dima rino Elyakim di Hilkia nipmot di nok nibou mem ig nibou ndig de kin Sebna di nok sekertaris gi nigom kin Yoah di Asaf nipmot di nok sekertaris gi nican.

⁴Nibou tentara Asyur pai biyok “Ma jipai nibou ndig Asyur nihyetti dini bak Hizkia ‘Nggon rino akan bipia nanti asindem i?

⁵Akan bipia nihyet he sindem njiriek tentara ide mimbri di kui ingkek kin ide nisindemti e? Tou riba ningon com je gino jaham jimbuk kep nye di tentara Asyur i?

⁶ Ningat ne jiba jingon com tentara Mesir di mikwei mpu je lo, ide nisindemti dem kep no di ba bika bitom no pimo. Tom dima midahat bidat jinda bia bei ri. Nok gima tut yo di iba ingon com nibou ndig Mesir di mahati tut yok yahagom.’ ”

⁷Leu lene nibou pran dima binut nihyet bu bipai “He ma jibuhup bipia jiba jingon com jide TUHAN Allah e? Tirigi po Hizkia cuk je di timiei Yehuda nya kin je di timiei minu ndig Yerusalem leu binhyepo jikuk je bak TUHAN ei nimbar gom ngat ei minu ndig Yerusalem nuhui he pima lo, ningat ne TUHAN Nonti cok tut nimbar hum dok kin gumihyep nikuk no bak Noni eisi nindigsi nya tu pima bi e?

⁸Jikwei ba, ibingon yam tug hon nibou ndig Asyur ninyeng nok gini. Gino diyai kuda ningut sribu can bije lene ningat ne ade tentara nya imangti di dem mem gima ibri kuda dima yok ingat rin bi sren.

⁹Gino ibinai yam ne jo nibreisi bipia nibou mien Asyur di ninyeng cun bon nisindemti dor njiriek je di nibou minu Yehuda jide nisindemti. Mbro nok gima lo, no jiba jingon com mben Mesir di mipinak kroba pran kin kuda mem gima ibimpu je yo!

¹⁰Jikan bipia TUHAN mimpu nye tut gi ninjei siceu di nihwen jide minu ba, nibicut jide minu ninyeng cem dima bi e? TUHAN Nonti rino cuk nye kwei leu binhyepo nikon pran bit je binico kep jide minu dini hagom bingwig a.”

¹¹Leu api Elyakim kin Sebna kin Yoah ipai bak nibou tentara dima “Andigpoi e, ma aba nihyet Aram bimbrap bit nye lewo nimiap nihyet dima. Ma aba nihyet Ibrani au. Leu ma limwa di igwam ngug tig dip ei dima imiap mun di apai binye nya.”

¹²Nibou dima buhup “Apo nibou ndig Asyur sok nihyet ei da dip kwei bak jeni kin jide nibou ndig jengkom e? E bi! Lewo ditri tut nihyet bak jide limwa di igwam ngug tig dip ei dima cem. Jei bi ne suar yahagom igyem yonti yooi kep inggum ba, idut yonti imbon kep inggobiausi cem.”

¹³Leu api nibou tentara dima kiju biya leu api ba nihyet Ibrani bitri tut nihyet sindem bibor bipai “Ma jingig jitingou mem nibou ndig Asyur nihyet!

¹⁴‘Ma jiba jingon com nibou ndig Hizkia nihyet au! Bit bon noni teu je bijingwes ngun kan bi!

¹⁵Ma jingig jitingou mem nihyet di bihwen jingon mem gima jiba jingon com TUHAN au. Ma jikan bipia TUHAN miteu je bijingwes ngun binjei bitot nye di tentara Asyur tirigi nikon pran bit je au.

¹⁶Ma jingig jitingou mem Hizkia nihyet au! Da di nibou ndig Asyur dibidip huk je leu binhyepo jehei kwei leu minu ndig dima bijikes jenti ei dindati hak ug. Gi nok lene midisindui sut je bijiyem ba anggur ngat leu jide miai ba, jingat jingwes ei biei ara ningat di ntun jide biei ara him cem jidut minyei leu jide minyei bousi bibou,

¹⁷dibuwak je ug ei minu gom di noyam kin jide minu dini. Lewo ba anggur nghousi di ngat ningat mem tungwatu nya bipot bidut ningei kin miai gandum nghousi di ngat ningat mem tungwatu nya ba, ibikang roti cem no jo ei minu dima.

¹⁸Ma jimiap Hizkia nihyet au! Lewo noni ris bije tirigi pai bipia TUHAN miteu je bijingwes ngun yo. Mben hiter ide kwar di ikuk yok bak nya iteu yok bingwes ngun leu dindati tu e?

¹⁹Mben Hamat kin mben Arpad kin mben Sefarwaim ide kwar di ikuk yok bak nya yo no hantou i? Hi dima kwei teu mben Samaria bingwes ngun tu e?

²⁰Apo ide kwar di ikuk yok bak gi tou riteu nide limwa nya bingwes ngun leu dindati tu i? Dem tut gima TUHAN teu je di mben Yerusalem bijingwes ngun kan bi!’ ”

²¹Timiei minu ndig Yerusalem imiap nihyet dima noro igibuhup bi. Lewo Nibou Ndig Hizkia ggai ser yok leu binhyepo ikimut yuhui hak.

²²Apino Elyakim kin Sebna kin Yoah irik ide sinsun rok him drek dip ingon di buhun bibor leu api ingkwei hanyen bitri tut nibou Asyur nisrep huk yokti hagom bak Nibou Ndig Hizkia.