Read Hatam YESAYA 37 Bible Online

YESAYA 37 - Hatam bible

YESAYA 37

¹Mpe di Nibou Ndig Hizkia miap mun di ibou ningai dima ipai sut bak leu api rik nide sinsun rok him leu ba, juk sinsun kron di bindo tut ningon di ngguk. Noni kiju buug coi TUHAN De Ig,

²bipinak Elyakim di nok nibou mem nide ig bei nsi nya kin Sebna di nok sekertaris gi nigom kin imam di iwer andig-ndau su ibou poi ba, yahagom yuug ngat Nabi Yesaya di Amos nipmot. Yo dini cem yahagom ijuk sinsun kron noyam.

³Hizkia sok nihyet ei yok dip bak Yesaya bipai “Njap di ammani nahagom ningon buhun bibor. Itug ndei hukum ba, tungwatu nya inim kep nye cem. Idem kep sop di sindi gwam tut nimunggwom di ninghuisi jet ba, sindem bi.

⁴Nibou ndig Asyur cuk nide nibou pran gom kwei mem gima nihyet wer mpiahi tut Allah Di Niyaijo. Mpaba TUHAN Allah miap nihyet di wer mpiahi di tibim ei nibou dima nuhui him bikes hukum ei dip! Gima rino ma angat nadi bak Allah mem nye di itug ndei nimai bigyo.”

⁵Tirigi miap Nibou Ndig Hizkia nisokti dima leu lene,

⁶Yesaya cuk yo di Nibou Ndig Hizkia pinak yok kwei dima bipai nibuhupti dini bak “TUHAN pai ma Na Di Anyeng Jei attin tut no di ya kui nibou ndig Asyur nihyet di pai bipia bit bon TUHAN teu nye bingwes ngun kan bi dima au.

⁷Lewo TUHAN mibindei ba, hou ban bei mitibim ei nibou ndig dima nitingou nsi bibindei ba, ngkwei hanyen ug ei nitimieisi leu api mitug midut.”

⁸Nibou tentara dima miap tut nibimbiti bipia nide nibou ndig kiju bimbut leu minu ndig Lakhis bikon pran bit minu ndig Libna di jo minu ting bi. Apino noni ug ei sirima binggok noni.

⁹Nibou ndig Asyur miap nibimbiti tut Tirhaka nibou tentara Mesir di njei sut nide tentara nya leu minu Sudan kwei mem gima ikon pran bit tentara Asyur. Gima rino nibou ndig Asyur pinak srat nimeng gom bak Hizkia di nok nibou ndig mem minu Yehuda.

¹⁰Noni ba srat dima bisok kep Hizkia bipai “Ma ade Allah di aba angon com dima ris na tut Nide nipreu ei mem nati bipia nituti dem leu api acut ei dindati bi dima au.

¹¹Akan tut bipia bikwop minu di nibou ndig Asyur nya icoi di ihwen yok nya ne ihwen minu dima bitimek bibor hak ug. Ma akan bipia angwes ngun leu dinda nsi au.

¹²Mpe di po didigup bat-didigai bat nya ihwen minu ndig Gozan kin Haran kin Resef bitimek ba, ibiyai nimai bak mben Eden di ibong ei minu ndig Telasar ne yo dima ide kwar di ikuk yok bak nya hi di teu yo dima bingwes ngun bi.

¹³Nibou ndig minu ndig Hamat kin Arpad kin Sefarwaim kin Hena kin Iwa yo no hantou i?”

¹⁴Lene Hizkia yai srat dima leu indati bikwop leu api pwoi buug sut ei TUHAN De Ig ba, kieng nimeng bikes ei TUHAN Noho bei.

¹⁵Leu api ngat nadi bipai,

¹⁶ “TUHAN Di Ninyeng Jei Bibor di Allah Israel di gwam nai kerub dip e, Nani ne Allah gom ngat hak di anyeng tak kep minu ninyeng tak kepti nya hagom ei dihyei ninjek dip dini ri. Nani rino apai tes mpia-bbed him kin dihyeisi dini.

¹⁷TUHAN e, ma amian huk mun di cut igkep nye ba, angig atingou mem Sanherib nihyet di wer mpiahi tut Na di Allah Di Ayaijo dini.

¹⁸Nahagom nikan tut bipia nibou ndig Asyur nya ibindei sar mben imang bibor ba, bindei timek ide minu nya cem ba,

¹⁹indig ide kwar di ikuk yok bak nya cem lene ibindei timek hagom. Lewo kwar di tungwatu nya ikuk yok bak dima isindem bi nitu. Yoni ne kwar nitu di tungwatu iba tig kin biei bibon bou inda him he ri.

²⁰Nyende TUHAN Allah e, ma ateu nye biningwes ngun leu mben Asyur dima inda nsi leu binhyepo ngkiai nya ei dihyeisi dini hagom ikan tut bipia Nangkom ngat he rino TUHAN.”

²¹Leu api Yesaya sok nihyet mem Nibou Ndig Hizkia bipai bipia TUHAN buhup nide nadi tu.

²²TUHAN pai “Sanherib e, minu ndig Yerusalem mipa tut nani ba, miba nihyet bicig na cem ri!

²³Akan tut tou rino akucang kinei-kinau ba, ahyet wer mpiahi tut cem dima i? No dima ne Da di Allah Israel di dikwes-kwau ri.

²⁴Apinak ade tungwatu bipai-pai wai bipia abindei timek nungug di jei bibor nya ei Libanon tug hon ade kroba pran di mang bibor dima tu. Abikon nanti tut bipia awim buom Libanon di ninggrup jei bibor ba, kei-kau-kei nya tu. Lene abiya bidem bigbehei dima di dimbun kei nya cem tu.

²⁵Anggap leu bipia atig minyei bousi ba, adut minyei bidem minu ngkiai ide nya hagom ba, ade tentara nya ico-co nyen kep Minyei Nil bipingge hak tu.

²⁶Agimiap tut gi dikos tut dingon kanti dima yok habiei nipou yo kwei su bigyo sren e? Tini bu ne diyai mun bipek kep dingon kanti dima ri. Dani rino diyai nisindemti dima bina dino abiya kep minu ndig di bon tentara nibousi di igya coi nya di timek ba, wer ig kum kroi cem ug a.

²⁷Yo di ibong ei sirima igyai ideti bi. Idigit tut je ba, nittinti om kep yok bibor. Idem kep minta di hei ei ngoisi kin ig ninjek dip di hou mpia priti di dut bibor cut bikuisi di mui bingwig hak.

²⁸Noro dikan bidem tut mun nyeng hagom di bitut nani kin ayai kepti nya kin aug eisi nya cem. Dikan tut bipia agga Da bibor.

²⁹Dimiap tut ade niggati kin ade nikon nantiti dima. Nogindini diba ngkimom koisi biteu ahwap jou bidiba kuk kin ngkimom nitu buhum ahui leu binhyepo dijem na ba, angkwei kak puig di ambut kak kwei pima hanyen.”

³⁰Yesaya pinak nisokti dini cem bak Hizkia “Midimbot kep mun di ndo bindo bina ri. Ari bingwam dini kin ari bingwam gi dip lene tungwatu nya migyem kep gandum di nonti hei nya. Gima leu lene yonti migimahap gandum ngan ba, ita ba anggur ninda nya leu api igyem kep ningat nya mem ari bingwam gi bram bu.

³¹Mun di isuar nya hagom midem mem timiei Yehuda di ingwes ngun nya bidem kep njita kioi di ita di nigau di huk dihyei jou bijut bibor ba, bingat ningat cem.

³²Yo di ingwes ngun nya mingat rin ei minu ndig Yerusalem cem ei Nungug Sion dip cem. Lewo TUHAN Di Ninyeng Jei Bibor kos tut bak yok tu bipia mun dima mipek kep mem yok.

³³TUHAN mbot kep tut nibou ndig Asyur bu bipai bipia Noni micoi ug ei minu ndig Yerusalem ba, prindei tibor gom bitibim ug ei minu ndig dima bi sren. Tentara di ikrau mun di bipukep tibor ninggwenti nya hi dima midideu minu ndig dima bi. Yoni mingot ig ninggilai nut yam ba, ibiyon ttai lene ibinggek minu ndig dima cem bi.

³⁴Nibou ndig minu Asyur mingkwei bikak puig di mbut kak kwei pima hanyen leu ba, gi coi ei minu ndig dini bi. Da di TUHAN disimbot dat tu.

³⁵Mporo diya srak ko hagau minu ndig Yerusalem bidinyohou tug hon dinyeng di jei drek dip Ditde gi preu di dipreu ei mem Ditde awak di nibou ndig Daud tu.”

³⁶Lene TUHAN pinak Nide malaikati gom kwei ei mben Asyur ide prak meng yati mem mmun dima ba, yai nimai bak tentara nya ibou sribu sratus gom ningot muhwindaningai bimuhwi. Njap tekti lene tungwatu nya ingat lo, imai biwer nimbiam sinsiou ei dihyei ninjek dip.

³⁷Lene Sanherib di nibou ndig Asyur ngkwei nyahan kep ninghim dip buug ei minu ndig Niniwe.

³⁸Mpe di gom tirigi ug kuk no bak Nisrokh di nide kwar ei kwar dima nibousi lene nipmot bat cin di Adramelekh Sarezer nya iba singau simeda biyai nimai bak. Igyai nimai bak leu su lene inang kikau ug ei minu Ararat. Leu api Esarhadon di Sanherib nipmot kui bigwam nok nibou ndig biya luei nohoti.