Read Hatam YESAYA 40 Bible Online

YESAYA 40 - Hatam bible

YESAYA 40

¹Ide Allah pai “Ma jiwin ingonti ba, jiwin Ditde limwa nya ingonti!

²Ma jibindei ba, timiei minu ndig Yerusalem ingon jo nyahan. Ma jipai biyok bipia hi muubon yok nok awak bu bi. Dikos ser ide mun di igyai tunggwei nya ba, dikes hukum ei yok dip mbican bram yam tut ide sisar di ibon tu.”

³ Tungwagom nihyet tibim bipai “Ma jitin puig di sren kei ei mpia nintiti mem TUHAN nimbutti! Ma jiji kep njuisi bisur yam mem ide Allah ei iggum ndigsi!

⁴Ma jiji kep mbang briep hagom bisur yam kei lene ma jiwim mbigdip kin nungug tou nya hagom cem ba, sur yam kei. Jibindei ba, nungug tou nya hagom dem kep nok briep bou him ba, dihyei di bon nibiau-biau hagom bidia kei.

⁵Lene TUHAN nikei-kau-keisi mitau ei nibreisi ba, tungwatu nya yahagom ingat bou igyai him. Igbit ri! TUHAN Nonti preu sut ei mem nye tut tu!”

⁶ Nihyet gom tibim kwei bipai “Atri tut nihyet!” Lene dihig ser noni “Miditri tut nihyet mindei i?” Lene nihyet dima cuk da “Atri tut bipia tungwatu dihyeisi dini yahagom inok minta ba, inyeng di jei nya dem kep nok mitou di nisieng jo jei bi.

⁷Tirigi TUHAN kes hou di dut bicut lene minta dima mui hak ug ba, mitou cem llet. Igbit ri! Minta dima ne nye di tungwatu nya ri.

⁸Lewo minta mui hak ug ba, mitou llet. Noro ide Allah nihyet jo gingga ba, bit bon ug hon nohonti kan bi.”

⁹Ma akui ug ei nungug di jei bibor leu api atri tut nihyet di kei bak minu ndig Yerusalem! Aba ahyet nindig bitri tut nihyet di kei bak Sion! Ahap aji lene ma angwes mien tut au. Ma atri tut bidem minu ndig nya hagom ei minu Yehuda bipia ide Allah dideu su!

¹⁰ Jingat i! TUHAN Di Sindem Bibor dideu su ba, ninyeng mitak kep biyai nibou tut yok bit leu Nonti ningon kanti. Noni buwak yo di Noni kwek yok tu pima bigya abia kep Noni kwei.

¹¹ Noni minyohou Nide domba nya dem kep nok no di gembala bibie tut yok. Noni mikon domba mien nya bibong ei ninda kroisi lene ba ningon di nggriu-nggrop bijem niwek di ibep nya.

¹²Tou risindem mem gima tau muk ngei ei ninda bia bei ba, nai nibuhunti i? Tou risindem mem gima ba ninda ninyanti bibinai mpia-bbed him nijeisi i? Tou risindem mem gima ba mok bitau dihyei ndung titut yam i? Tou risindem mem gima kon nungug him kin nungug tou nya ei kiloti bibinai nibuhunti i?

¹³ Tou risindem mem gima bie tut TUHAN i? Tou risindem mem gima ngginau Noni bipingok ningonti i?

¹⁴TUHAN yai ningon kiti kin ningon dor nititi leu tou i? Tou rindo bindo bak leu binhyepo Noni yai Nide midyai nya nok gi igbit i?

¹⁵Ngkiai nya inok yop ei bokor nijou ba, inok dihyei ndung di mien-digau cem ei Nonti niyai him. Mios nya hagom inggan bibor dem kep nok atriem ndung.

¹⁶Mindhe-ndhe hagom di ingat rin ei baham tindurti ei Libanon nok gi dem mem gima ibibon midut ei nimbar hum dokti bak ide TUHAN bi. Biei ninjem nya hagom ei baham tindurti dima cem nok gi dem mem gima ibindig hum ei nimbar hum dokti dima bi.

¹⁷Ngkiai nya yahagom ibon inyeng mem Noni bi ba, dem kep nok hi ya ei Noho bei bi.

¹⁸ Gima rino aba Allah binai kin tou i? Akan huk Noni noyam kin tou i?

¹⁹Noni noyam kin kwar di tukan nya ibon ba, iba mas binggai kep cem leu api itas ei nikiou di iba perak bibon mem bi.

²⁰No di pwoi mitiei nok gi dem mem gima bipek mas kin perak bi dima dimig biei di nggwes di nggun hanyen kan bi. Noni ug nggok neheu kep kwar cig di bon kwar di tti-tti nyen bi.

²¹Mei! Akan tut ba, amiap tut bi e? Hi pai brei bina habiei leu nipou kwei bi e? Mei! Angon dorti tut nimbie him tirigi po hi pai tes dihyeisi dini bigyo pima e?

²²No di gwam ei Nide banggo mbrei di jo anai dihyeisi dini bijo mpia-bbed him nuhu kwei pai tes dihyeisi dini. Tungwatu dihyeisi dini inok ako di bigbibor bou niyai him. Noni prion mpia-bbed him dem kep nok no di dis sre kin no di hok prak meng mem gima bong eisi.

²³Noni kuk nibou di isindem nya ei nimig him bibindei ba, ide nisindemti pror hanyen leu yok.

²⁴Yoni inok njita kioi di sindi nigau com dihyei. Mpe dino TUHAN kes hou bicut ne njita kioi dima ngoi-nga bimui hanyen leu api hagom bit hou.

²⁵Gima rino abisrip huk Allah Di Kwes-Kwau ba, Noni noyam kin tou i? Abinai Noni kin tou i?

²⁶Ma acap ser mpia-bbed him ba, ayok ayai kep! Tou ripai tes ham mpia-bbed him nya i? No di nyohou dimig ham hagom bidem kep nok tentara kan bidem tut nimangti jem inyeng bibikwop hagom! Bit bon ham gom pror kan bi lewo TUHAN sindem mem gima nyohou ham nya hagom!

²⁷Gima rino je di mben Israel e, nggon rino jinso tut TUHAN tereu nok Noni kan tut mun di buhun tak je bi ba, ningkek ndok tut mun di cut igkep je cem ba, ningon prion ser jide munhyet cem i?

²⁸Mei! Jikan tut bijimiap tut bi e? TUHAN ne Allah di niyaijo ninno bijo kikau ri. Noni pai tes dihyeisi dini titut yam. Ninghuisi wei ba, ninda mbris bi sren. Bit bon nye di tungwatu nya ikan bidem tut ningon kanti nya kan bi.

²⁹Noni yai nisindemti bak yo di inghuisi wei lene bindei ba, yo di isindem bi nya ibrim ingkek hanyen bu.

³⁰Pinjoi pilei nya inghuisi wei ba, inghuisi jet cem lene munggwom ndig nya ikinoi-kinoi nyen.

³¹Noro yo di iba ingon com TUHAN migyai nisindemti di nijep bu. Yoni inok hacam krubrig di ba ninyehei di nyan biko-ko nyen ei anai. Mbro nok gino yo dima idor sindem lo, inghuisi wei bi. Mbro nok gino imig dia mem nimbut nya lo, ibiau dut cem bi.