Read Hatam YESAYA 42 Bible Online

YESAYA 42 - Hatam bible

YESAYA 42

¹ TUHAN pai “No dini ne Ditde awak rin ba, dahati tut noni bididimig noni ei cem ba, dingat dingwes ei noniti. Midikes dinnei ei noni dip leu api noni mitri tut ningon sren-srausi bak ngkiai nya gom-gom ei dihyeisi dini hagom.

²Noni miba nihyet ndig bahara ba, miba ninnei di jei bitri tut nihyet ei simpakti cem bi.

³Noni midahat bika di nggom bimu mini di njeng kinei bi noro mita nibou eisi bibou ningon sren-srausi mitak kep tungwatu nya yahagom ug e.

⁴Nibou buwei ba, ningon micut leu bi bibou ningon sren-srausi kieng kep dihyeisi dini hagom ba, yo di minu ting nya igyok ingon mem ningginau yokti nya.”

⁵ TUHAN Allah pai tes mpia-bbed him biprion ei anai. Noni pai tes dihyeisi dini kin mun di hei bidem ninjek dip hagom. Noni yai niyaijo kin ninnei bak tungwatu nya yahagom. Nogindini TUHAN pai bak Nide awak,

⁶ “Da di TUHAN dihig na kwei bidiyai nisindemti bina leu binhyepo abindei mbut ningon sren-srausi bikieng kep dihyeisi dini ug e. Midipreu ei mem tungwatu nya yahagom bidipiga digai ngkiai nya yahagom tug hon na.

⁷Leu binhyepo apiga yo di igyai tu nya igyai ba, akwek yo di isima nya leu ig bui nsi di dindi-kai.

⁸Dangkom he rino jide TUHAN. Midikwas Ditde nikei-kau-keisi ndrim hi tut kwar di tungwatu nya ikuk yok bak bi sren. Midisindui sut ba, tungwatu nya inggei sut Dangkom he. Ma inggei sut kwar nya au.

⁹Nisinati di ditri tut nya hagom pek kep mem nye nogindia tu. Nogindini miditri tut mun di nijep-jau bu bije nipou tirigi kindi pek kep mem je bigyo.”

¹⁰Jikwei ba, iba doia nijep-jau bibikiek TUHAN. Je di tungwatu dihyeisi hagom e, ma jinggei sut Noni! Timiei kibar minyei ei muk ngwa dip kin mindhe-ndhe ei muk ngeisi hagom kin minu di jo ting bibor bitut timiei nya jahagom e, ma jinggei sut Noni!

¹¹Ma iggum ndigsi kin minu mien nya di iwin ei sirima inggei sut TUHAN! Je di timiei Kedar e, ma jahagom jinggei sut Noni! Ma timiei Sela nya ikui ug ei mbigdip nya leu api iba ighyet ndig bibor bimbos-hi-mbos!

¹²Ma yo di ibong bidem minu ting bibor nya yahagom inggei sut TUHAN bikon ninyenga!

¹³Mimbri kui TUHAN ningkek dem kep nok nikon kep pran cig di tindei ser Nide siceu nya. Noni kon nihyet kep yok bindo Nide nisindemti biyok.

¹⁴Allah pai “Dikimut duhui bidibuhup Ditde limwa nya ighyet bi ninno tu. Noro tini bu ne tto bou dem mem diyai dibou tut yok. Dahara dem kep nok sop di ninghim dut.

¹⁵Midibindei ba, nungug tou nya kin mbigdip nya mitimek bingwig ba, minta kin biei nya hagom mingoi-nga. Minyei di biam ei mbang briepti hagom minok mpia ngoisi ba, igpong nya hagom mipingge bingwig cem.

¹⁶Midicen Ditde limwa di igyai tu nya kak puig di ikan tut bi. Midibindei ba, nidinditi di nggai kep yok nok nipigati mem yok bu. Mididime kep njuisi nya hagom binok puig di sur yam kei mem yok. Midibon mun dima yok hagom mem yok bidiyai dibou tut yok.

¹⁷Midibindei ba, tungwatu nya inim kep yo di iba ingon com ide kwar nya bikuk yok bak apino immai sut yonti.”

¹⁸TUHAN pai “Je di jitingou nam e, ma jingig jitingou mem dihyet! Je di jiyai tu e, ma jitou kep!

¹⁹Tou riniyai tu nindig dor njiriek Ditde awak Israel niyai di tu i? Tou rinitingou nam nindig dor njiriek no di disok dihyet ei no dip nitingou di nam i?

²⁰Je di mben Israel e, jingat mun nyeng mang bibor bou jiyai him noro mun dima yok tot jingonti bi. Jitingou tu noro jimiap mun nyeng hi bi.”

²¹TUHAN ningon bisau sut gi Noni teu tungwatu nya bingwes ngun. Gima rino Noni kon Nide nikos tutti nya bijo anai leu binhyepo Nide limwa nya inggei sut.

²²Noro ide siceu nya ipos TUHAN de limwa nya ide ndigban bingwig leu yok binggam yok ei ninsi di jo dihyei jou nya bisima ei ig bui di dindi-kai nya. Ide siceu nya ikwei pos mun di inyeng tut nya hagom bingwig leu yok leu api hi dima kwei teu yok bingwes ngun leu bi.

²³Tungwa tou risrig jikieti billei sut gi miap kep dihyet leu api hon kep ammani kui miyok ngon kep i?

²⁴Tou rikes mben Israel ei nipos kep mun cig nya inda nsi i? TUHAN Nonti ri! Nyeni ibon sisar tut Noni ba, itunggwei sut nihyet cem. Ibit ningginausi nya bi cem.

²⁵Gima rino Noni kes nigga biborti ei nyeni dip apino itug ndei niwei kin nidut ei pran dicut igkep nyeti. TUHAN de nigga biborti noyam kin hum di cig-cai bidem minu Israel nisurti-nipekti. Noro nyeni ingon gidorti tut mun di cut igkep nye nya di bipingok ingonti bi.