Read Hatam YESAYA 43 Bible Online

YESAYA 43 - Hatam bible

YESAYA 43

¹Je di mben Israel e, TUHAN di pai tes je pai “Ma jittin au lewo miditeu je bijingwes ngun! Dihig je ba, dibindat tungwagom-gom ninyeng lewo dinyeng tak kep je.

²Tirigi jisigon minyei di jut bibor ne midingat rin bit je. Mun di buhun di cut igkep je mikot je bijingwig bi. Tirigi jikimbas ug ei hum di cig-caiti ne hum mitigut je bi. Mun di bingon-bingon nyen je lene mibindei ba, jiyai niwei bi.

³Lewo Dani ne TUHAN ba, mben Israel ide Allah Di Kwes-Kwau ri. Diteu je bijingwes ngun. Ditri minu Mesir ba, dibipek je hanyen. Ditri minu Sudan kin Seba nya leu binhyepo jiya luei yohoti.

⁴Dingat dingwes ei jeti. Jibon jinyeng ei diyai him ba, dingon ngakei je cem. Gima rino ditri timiei ngkiai nya leu binhyepo dibiluei je bu ba, diba keret dihyeisi dini biluei jiyaisi.

⁵Ma jittin tut au lewo midinyohou je! Midibuwak jide nintun him yamti di bram yam nya kwei leu nite bei mpia nipriti kin nicutti.

⁶Midikes dihyet bak timiei mpia nijjai nya kin mpia nibiho nya leu binhyepo ice tut jide nintun him yamti di bram yam nya ba, ikwei hanyen leu ingkiaisi bisindui sut Ditde limwa nya ba, ikwei hanyen leu dihyei nisurti-nipekti.

⁷Lewo dijem inyeng kin dinyeng tu ba, dipai tes yok leu binhyepo ikon dinyenga.”

⁸Allah pai “Ma jicuk Ditde limwa nya di ibon igyai njep noro igyai tu nya kin yo di ibon itingou meng noro itingou nam ser nya yahagom ba, induk yam kwei ei nikei noho bei.

⁹Ma jicuk mben ngkiai ei dihyeisi dini hagom leu binhyepo induk yam kwei ei nikei noho bei. Leu ide kwar di ikuk yok bak nya ne gi tou ripai nisinati tut mun di sindi pek kep mem tungwatu nya nogindini i? Gi tou ripai nisinati tut mun di mipek kep mem tungwatu nya ei nidipti bu i? Nnaba yo di imbrap gau yok indo bindo brei binye bipia yoni ne kwar di tungwatu nya ikuk yok bak ningat-ngat nya rin leu binhyepo tungwatu nya di imiap kep ighyet dima mice tut yok bipai “Igbit ri!”

¹⁰Ditde limwa jen e, jingat diyai munti nya bou jiyai him tu. Didimig je ei nok Ditde awak nya leu binhyepo jikan tut Da bijingon jo kep Da ba, jingon hukti tut Da lewo Dani ne Allah ri. Dangkom ngat he rino Allah. Leu nipou kwei bipek ammani kep ba, njap di ammani kui ug bipek ningwig honti ne Allah hiter nya hi bi.

¹¹Dangkom ngat he rino TUHAN. Bit bon hiter teu je bijingwes ngun kan bi noro Dangkom he.

¹²Ditri tut mun di micut igkep je tu leu api dikwei teu je bijingwes ngun. Kwar di ngkiai nya ide di ikuk yok bak di srig jikieti hi yai nok gima bi sren. Jingat gini bou jiyai him tu. Dangkom ngat he rino Allah.

¹³Dani ne Allah bijo ninno bijo kikau. Bit bon hi ningwes ngun leu Ditde nisindemti bi ba, bigen ser dingon kanti nya kan bi.”

¹⁴Mben Israel ide TUHAN Di Kwes-Kwau di teu yok bingwes ngun cem pai “Midipinak tentara nimpung gom ug ei minu Babel leu binhyepo iteu je bijingwes ngun. Dinggek tut dimbou ig bui de nibahau yamti nya leu lene mben Kasdim mimbos-hi-mbos bu bi noro igyai nggwei kibor.

¹⁵Je di mben Israel e, Dangkom ngat he rino TUHAN bidinok jide Allah Di Kwes-Kwau. Dipai tes je bidinyeng tak kep je.”

¹⁶TUHAN tin simpak gom ei muk ndigsi ninggimau bitin puig ei muk di kui mpia nyen nikieti nipou su.

¹⁷Noni cuk tentara nimpung gom bitut nibou pran nya ba, iba kroba pran kin kuda pran bimbut sindem. Noro yahagom icut bingwig leu api bit bon ikiju hanyen kan bi. Imai noyam kin njeng mbrei di tungwatu nya imu hak.

¹⁸TUHAN pai “Ma jipui kikep tut mun di pek kep nipou su nya au. Leu gima bon ninyeng bi.

¹⁹Ma jitindei ser mun di nijep-jau di midibon nya. Mun dini sindi pek kep mem je lo, jingat bou jiyai him bi e? Lewo miditin puig ei mpia nintiti bidibindei ba, minyei nya mibiam ei iggum ndigsi cem.

²⁰Mpe dima lene mindhe-ndhe bigbehei nya mikuk yok biDani lene nsien di niten-pos kin ha unta nya mikon dinyeng ei mpe dino dibindei ba, minyei biam nok gi dem ei iggum ndigsi mem Ditde limwa di didimig ei su nya bidut kep.

²¹Yoni ne Ditde limwa di dipai tes yok mem Danti leu binhyepo iba doia bikiek dinyeng jeisi.”

²²TUHAN pai “Je di mben Israel e, jiba jinghen bikon dinyeng bijikuk je biDa bu bi.

²³Dikak tut midut di jibikuk je biDa ba, dibidip huk je tut biei nggrai di ui-gwang kei bi. Noro jiba jikou bindig domba nya ei nimbar hum dokti lene jiba mun di jibikuk je biDa bikon dinyeng bi.

²⁴Jipek biei nggrai di ui-gwang kei mem Da ba, jiba jide mindhe-ndhe di jibui di jidigo ninggwo boom dingon bi. Noro jide sisar buhun tak Da ba, dinghuisi wei sut mun di jiyai tunggwei sut Da.

²⁵Mbro nok gima lo, Dani ne Allah di didip tut jide sisar ri. Dikos ser jide sisar bit leu nok diyai kep ngan-nganti. Midiyok ngon kep jide sisar dem kep nok ningwam di jibon biDa bi.

²⁶Ma jiyok ngon kep Da lene ma jikwei ba, yuug ya ei nikei noho bei. Ma jisimbot dat jide munhyet ei nikei noho bei nok mun di bindo bipia jiyai mun di igbit.

²⁷Pung di jintun him habiei ei nimbie him pima bon sisar ba, jide nibou nya yaham imbuk kep Da tu ba,

²⁸jide imam nya ibindei ba, nirom kui Ditde Igti tu. Gima rino disindui sut ba, mben Israel ide siceu nya inim kep yok. Dibindei ba, Yakub de nintun him yamti di bram yam nya itimek bingwig.”