Read Hatam YESAYA 46 Bible Online

YESAYA 46 - Hatam bible

YESAYA 46

¹Mben Babel ide kwar nya ningwig honti rinok gini. Nipou ne yo dima ikuk yok bak kwar Bel kin Nebo noro tini bu ne ikon kwar dima bikes ei keledai nya dip bimbut tut. Kwar dima ibuhun tak mindhe nya ba, inghuisi wei.

²Bit bon kwar dima yok iteu yonti bingwes ngun kan bi. Apino tungwatu nya ipos hagom bimbut tut. Gima ne mben Babel ide kwar nya ningwig honti ri.

³Je di jintun Yakub him kin Ditde limwa nindigsi nya jahagom e, ma jingig jitingou mem dihyet. Dinyohou je habiei tirigi sindi jisrek kikau kwei bipek ammani kep tu.

⁴Dinok jide Allah kikau ug bipek jinghim koi kep bidiya ser je kikau bijibou tiei kep. Dipai tes je ba, midinyohou je bidimpu je cem ba, miditeu je bijingwes ngun cem.

⁵Gino jikan huk Allah lene Noni noyam kin tou i? Jibinai Noni kin tou i?

⁶Tungwagom kwek nide bangdop bisiber nide mas leu api bakilo nide perak nibuhunti. Noni yai mitiei poi bak nibon kep kwar cig gom leu binhyepo ba mas kin perak pima bibon kwar mem noni. Lene noni kuk no bak binggei sut.

⁷Noni cim kwar nimbumbati nya eisi leu api tas ei nijoti ba, bit bon kwar dima son-son nyen biya ser kan bi. Gino tungwagom ngat nadi bak lene bit bon kwar buhup nihyet biteu noni leu mun di buhun di cut igkep noni kan bi.

⁸Je di jaham jimbuk kep Da e, ma jiyok ngon kep gini bijiba jingon bisrip huk.

⁹Ma jiyok ngon kep mun di pek kep mem je nipou su nya. Ma jipai jit bipia Dani ne Allah ri. Allah hiter hi bi. Bit bon jibinai Da kin hiter kan bi.

¹⁰Habiei ei nimbie him lene dimbot kep tut mun gi nidipti. Habiei ei nimbie him ne ditri tut mun di mipek kep mem tungwatu nya. Dipai bipia dikos tutti nya mipek kep mem tungwatu nya ba, midiyai hagom bit leu dingon kanti.

¹¹Midihig no di sindem bikwei leu nite bei mpia nipriti[21] ba, noni midwop juk dem kep nok hacam krubri leu binhyepo yai igbit dikos tutti nya hagom. Dihyet di tibim ei duhui him mipek kep mem tungwatu nya. Midiyai hagom bit leu dingon kanti.

¹²Je di jingkek ndok di jikan bipia ditum dingon tut Ditde nicunti tirigi dibindei timek Ditde siceu nya e,

¹³Midibindei njap niteu bingwes ngun nicunti dideu kwei ba, mimbrek bu bi. Mun nyeng hi minggek tut nituti mem gima diteu je bi. Miditeu timiei Yerusalem nya bingwes ngun leu api midikon mben Israel inyenga.”