Read Hatam YESAYA 47 Bible Online

YESAYA 47 - Hatam bible

YESAYA 47

¹ TUHAN pai “Minu Babel e, ajuk kwei leu ade banggo mbrei ba, agwam ei dihyei ndung dip. Agisindem ba, anok no di ubbu ngat nok gi nipou yo bu bi.

²Aba tig huk mbrei di nindig bisibui tepun bindung. Akau minghas di abinggai kep abou a. Akon ade sinsun inyinai kui leu na ba, amig ngon ndigsi jo hak leu api abisigon minyei ug ei nite hi.[22]

³Tungwatu nya mingat angat nguti ba, ighyet wer mpiahi tut na bibiyai nimmai bina cem. Midibuhup ade nibon munti hanyen bina leu api hi dima bindei ba, angwes ngun kan bi.”

⁴Allah Israel di kwes-kwau dima kwek nye biningwes ngun ba, ninyeng rino TUHAN Di Sindem Bibor.

⁵TUHAN pai bak minu Babel “Ma akimut ahui ba, agwam ei nidinditi. Anyeng rino ‘Sop Nibou Ndig mem minu ninyeng tak kepti nya’ bu bi!

⁶Nipou yo ne digga Ditde limwa nya leu api duubon yok nok Ditde limwa nya bi. Apino dikes yok ei andati ug a. Leu api agingondut yok bi ba, aco kep ndigpoi koi nya kinei-kinau.

⁷Akan bipia anok sop nibou ndig bijo ninno bijo kikau leu ba, angon guhukti ba, agibisrip tut ayai munti ningwig honti bi.

⁸ Gima rino na di ata abou ei nuhuk bram ningon llei biborti e, ma angig atingou mem Dihyet! Akan bipia abong kei agwam kei ba, hi ginoyam kin nani bi. Akan bipia aginok kibom ba, ade nintun him yamti di bram yam nya misar bi sren.

⁹Noro mun nyeng can dini micut igkep nani ba, hacem mibit yam mbigom ngat mem njap gom ngat. Mbro nok gino asindui sut nung di nihyet dut kui na lo, nimai maham ajjep kin amunggwom bat nya kindok.

¹⁰Akan bigya abong kei agwam kei tug hon ade nisibutti. Akan bigya hi di ngig niyai kep ade nibon munti nya bi. Noro ade ningon kiti kin ade ningon kimboti bindei srawir na lewo akan bigya hi di noyam kin nani bi.

¹¹Noro mun di buhun micut igkep na leu api bit bon nung di kui na rok mun di buhun dima leu na kan bi. Mun di buhun micut igkep na lene asindem mem gima arok gima ei atta bi. Nibindei sar nati micut kros igkep na mem njap di akan tut bi.

¹²Ata abou hak ei nung nihyet di dut di kui na di bindei di amuhup sar tut habiei leu amien kwei su pima yahagom. Hi rima mun dima yok mimpu na mem gima abicug-cug nyen ade siceu nya leu binhyepo ittin tut na e?

¹³Anghuisi wei drek dip nipingok angonti mang-mang. Acuk yo di ingon ki nya bikiju kwei biteu na ba, angwes ngun hak ug. Yo dima igyok igyai kep mpia-bbed him nuhuisi ug bipek nuhuisi bidem ba, inggok tut ham mpia-bbed him nya bikwop bed jep leu binhyepo ibitri tut nicunti mem mun di mipek kep mem na.

¹⁴Angat i! Yo dima idem kep pas ntam di hum yem. Isindem mem gima iteu yonti bingwes ngun kan bi! Mem yoni ne hum njeng dima dut bibor noro nok hum di igwam hek bingkek dut rin bi.

¹⁵Yo dima ne yo di ingon ki di ibon inyeng mem na di ibindei di amuhup sar habiei leu amien kwei pima ri. Hi mbut nide hi mbut nide biyuug hak lene ibikes na ei. Hi di kwei mpu na bi.”