Read Hatam YESAYA 48 Bible Online

YESAYA 48 - Hatam bible

YESAYA 48

¹Je di jintun Yakub him e, ma jingig jitingou mem dihyet. Je di jintun keret Yehuda him di jikrau kep ninyeng Israel e, jipai bipia jiba jingon com Da di Allah Israel ba, jeheng bitug hon dinyeng lo, jiba jingon gom bipai jihyet dima yok bi.

²Mbro nok gima lo, jiba ningon di llei bipai bipia jeni ne timiei minu ndig di kwes rin ba, jirok kui Da di Allah Israel di dinyeng rino TUHAN Di Ninyeng Jei Bibor.

³TUHAN pai “Je di mben Israel e, ma jingig jitingou mem dihyet! Mun di pek kep nipou nya ne ditri tut mimbrek ngan tu. Mun di dindat kep lene dibindei bipek kep kros ba, dibindei bipek kep bijo nibreisi.

⁴Dikan tut bipia jingon tindak ba, jibou ngwakti nggwes cem jingkek ndok cem.

⁵Gima rino disimbot kep tut je nipou su. Ditri tut nipou tirigi mun dima yok pek kep bigyo leu binhyepo bit bon jipai bipia gima ne jide kwar di jikuk je bak nya ibon munti nya rin kan bi.

⁶Nisinati di ditri tut bipia mipek kep mem je pima hagom pek kep tu. Suar ma jipai hak ei juhui him bipia mun di dipai pima ne igbit ri. Nogindini dipai sut mun di nijep bije ba, gima ne mimun di jikan tut bigyo ri.

⁷Nipou yo ne bi noro nogindini rino dibibon a. Jigimiap tut mun nyeng dima bigyo sren leu binhyepo jipai bipia jikan bidem tut mun dima hagom tu au.

⁸Dikan tut bipia bit bon hi ba ningon com je bi. Lewo habiei ei nimbie him yahagom ikan tut bipia jinok yo di itunggwei sut yam hyet. Gima rino jigikan tut bi a. Nihyet ninnir ndia gom cem gitibim ei jitingou nsi bi sren.

⁹Doom kep Ditde niggati leu binhyepo tungwatu nya mikon dinyeng bidem minu. Doom kep niggati dima nyahan drek dip je leu binhyepo dibibindei sar je bi.

¹⁰Diba ninghuisi wei di noyam kin hum bibingon je noyam kin perak di tukan kwen ei humti bibindei ba, pimbai kei.

¹¹Dibon gima drek dip Danti lewo disindui sut ba, hi bibon dinyeng bikinei bi. Dikwas Ditde nikei-kau-keisi nindrim hi tut tungwa hi cem bi.”

¹² TUHAN pai “Je di mben Israel di didimig je ei su e, ma jingig jitingou mem dihyet lewo Dani ne jide Allah bijo kikau ri. Dani ne gi nimbie him rin ba, Dani ne gi nohon keti rin cem.

¹³Dibon dihyeisi dini nikiou bou dinda him bidikes bijo nijoti ba, diba niban bijun mpia-bbed him cem. Gino dihig dihyeisi kin mpia-bbed him kwei lene ikwei didiyam.

¹⁴Ma jahagom jidem yam ei ba, jimiap! Bit bon kwar di tungwatu nya ikuk yok bak nya hi ndo igbit no di didimig ei mem gima njei bihwen minu Babel bi sren. Noni miyai igbit dingon kanti.

¹⁵Dani rino dipai sut bidijem noni kwei. Dibie tut noni bitig di ningon kanti pek kep mem no ug a.

¹⁶Jikwei bijidideu Da ba, jimiap kep dihyet. Dipai brei habiei leu nipou pima kwei su lene dibindei ba, Ditde nipaisi nya pek kep bijingat bou jiyai him kikau tu.” Nogindini TUHAN Allah pinak da kwei biyai Nide nisindemti bida.

¹⁷Je di mben Israel jide Allah di kwes-kwau di teu je ba, jingwes ngun pai “Dani ne jide TUHAN Allah ri. Dingginau je tut mun di bon ninyeng mem je ba, di bie tut je kak puig di suar jimbut kak cem.

¹⁸Mijiyok ngon kep Ditde nicuk jeti nya ug ma jide nibong kei nigwam keisi midem kep minyei di pingge bi. Ba, jide ninggei-hi-nggeisi midem kep muk ngei di roi ei ningeisi di kes hon bi sren cem.

¹⁹Ba, jide nintun him yamti di bram yam nya midem kep iggum ndung nimangti ba, dicuon ser igyaisi leu binhyepo hi bindei sar yok bi sren.”

²⁰ Jinang ba, jingwes ngun leu minu Babel hak ug bijitri tut nihyet dini ug ei tirima-tirima lene jiba nimbos-hi-mbos kin ningon nggei-hi-nggeisi bitri tut “Gi TUHAN teu Nide awak di Israel ba, ningwes ngun tu!

²¹Mpe di po Noni bie tut yok ug ei iggum ndigsi di ngak-cai lene imai inggobiau bi. TUHAN ki nungug tig ba, bindei biam minyei su leu nungug tig dima mem yok.

²² Ningwes ngunti hi jo mem yo di ibon mun di kinei nya bi. Gima ne TUHAN de nisimbot datti ri.”