Read Hatam YESAYA 49 Bible Online

YESAYA 49 - Hatam bible

YESAYA 49

¹ Je di timiei minu ting nya e, ma jingig jitingou mem ba, jiyok ngon kep dihyet. TUHAN dimig da ei nipou tirigi dipmem srek tut da bigyo leu api hig da nok Nide awak.

² Noni bindei ba, dihyet tot tungwatu nya ingonti dem kep nok simeda di nggwen-gwau. Noni ku da ei nindansi binyohou da. Noni bindei ba, dinok tibor di nggwen bibor bikrau da kin Nide hampiap di tin ei su.

³Noni pai bida “Na di mben Israel e, duubon na nok awak mem Da. Tungwatu dihyeisi dini minggei sut Da drek dip na.”

⁴Lene dibuhup “Dicom dahanggwap mikuisi bidita dibou ei midyai nyati mikui-kausi.” Mbro nok gima lo, midiba dingon com TUHAN lewo Noni mbrap gau da bibirop hanyen bida drek dip diyai munti nya.

⁵TUHAN dimig da ei nipou tirigi dipmem srek tut da bigyo leu binhyepo dinok awak mem Noni. Noni cuk da leu binhyepo dimbus Nide limwa di mben Israel keyam ba, ingkwei hanyen ndam Noni. TUHAN bindei ba, tungwatu nya ikon dinyenga. Noni ne ditde nisindemti nibousi ri.

⁶ Noni pai bida, “Ditde awak e, midindo midyai nindig bibor bu bina leu binhyepo akinyon eisi. Abindei ba, yo di intun Yakub him nindigsi nya mingkwei hanyen ndam Dani ba, apui ahyet tut keret Israel nya ide ninyeng jeisi he bi. Noro midibindei ba, ade nipigati piga digai ngkiai nya leu binhyepo yahagom igyai gi teu leu sisar kin niyaijo nijep.”

⁷Allah di kwes-kwau di teu mben Israel leu sisar biyai niyaijo nijep biyok pai bak no di ngkiai nya yahagom ico kep di ingon mpo tut cem lene bipai bak no di nibou di yo di isindem nya yuubon nok ide awak cem “Nibou ndig nya mingig igyai kep ayai munti nya leu api yahagom mikiju bigya bikon anyenga. Yo di inyeng jei nya cem mingig igyai kep ayai munti nya leu api mikuk yok ei amig him.” Mun dini yok hagom mipek kep mem yok lewo TUHAN dimig Nide awak ei su ba, mben Israel ide Allah di kwes-kwau ningon gom tut mun di Noni preu ei mem yok.

⁸ TUHAN pai bak Nide limwa nya “Mpe dino nicunti dem mem gima diteu je bijingwes ngun lene midingondut je bidimpu je lewo jahara Da tu. Midiya srak ko hagau je bidiya ser je cem. Midipreu ei mem tungwatu dihyeisi dini hagom tug hon je. Midipindi jide ig kum kroisi leu binhyepo jiba jekep minu dima bijibong kei jigwam kei eisi hanyen.

⁹Midikwek yo di isima ei ig bui nsi nya ba, imbut hanyen. Midibuwak yo di ibong ei nidinditi ba, imbut mem nipigati. Mbro nok gino inok domba di igya-ya nyen ei nungug tou di ngoi-nga bimbut ug ei minu ting lo, njita midem mem yok.

¹⁰ Mpe dima lene yoni inggobiau ba, inggum cem bi. Mpia di wam bibor kin iggum ndigsi di dut bibor mipijuk yok bi. Lewo Da di dingondut yok midiwin kep ingonti bidibuwak yok kep minyei bousi nya.

¹¹Miditin puig ei nungug him mem yok ba, didime simpak bisur yam kei mem imbutti nya.

¹²Ditde limwa nya minduk yam kwei leu minu ting ei nite bei mpia nijjai kin mpia nikimbasti cem leu Sinim[23] ei nite bei mpia nibiho cem.”

¹³Mpia-bbed him e, ma apai doia! Dihyeisi e, ma ayai nillei! Mbigdip nya e, ma jimbos-hi-mbos! TUHAN migwam ser Nide limwa nya ingon ba, Noni ngondut Nide awak di igyai ninghuisi wei nya.

¹⁴Noro timiei minu ndig Yerusalem ipai, “TUHAN kes nye ei ba, ide TUHAN ningon prion ser nye tu.”

¹⁵Gima rino TUHAN buhup, “Bon gima sop hi ningon prion ser nimunggwom e, he ngondut no di noni srek tut bu bi e? Mbro nok gino sop hi ningon prion ser nimunggwom lo, midingon prion ser je kan bi sren.

¹⁶Minu ndig Yerusalem e, diyok ngon kep na kikau ba, dipas kep anyeng ei dinda bia bei.

¹⁷Jei bi ne yo di iwin minu ndig Yerusalem hanyen mikwei yo. Leu api yo di inggek minu ndig Yerusalem bitimek bingwig mimbut.

¹⁸Ma amian ttai na ba, angig ayai kep mun di sindi pek kep mem na. Ade limwa nya imbus yam ei su ba, sindi induk yam kwei bittau kep na. Da di Allah Di Niyaijo dipai tug hon dinyenga bipia ningat ne ma anggei sut ade limwa nya dem kep nok sop di nggei sut mimau di ibimau noni tirigi wak nijjep.

¹⁹Ade minu di nipou timek bingwig binok mpia nintiti pima lene nogindini bu kom bibor ba, nok gi dem mem yo di ibong kei igwam kei eisi bi. Ba, yo di inggek na ba, atimek bingwig mingkwei hanyen ug ei minu ting bihigom.

²⁰Ei nidipti bu ne ade limwa di isrek ei ingkiaisi nya mipai bina ‘Minu dini kom bibor. Ma apek dihyei hanjop nsi di dem mem nye binye leu binhyepo nibong kei nigwam kei eisi.’

²¹Mpe dima lene akan, ‘Tou srek tut munggwom dini yok yahagom bak sa i? Lewo simunggwom bat nya ipror leu sa ba, sipijet hon tu. Ngkiai nya ikat sa bicom sa ug ei singkiaisi lene yahagom ikes sa ei ba, sibong bisangkom. Gima rino munggwom dini yok ikwei leu hantou i? Tou rinyohou yok di bindei ba, imahan tu i?’ ”

²²TUHAN Di Ninyeng Jei Bibor pai bak Nide limwa nya “Midiyai bindo bak keret dihyeisi dini hagom di bindei ba, ibuwak jimunggwom bat nya hanyen kwei. Yoni miyohon jipmot bat nya bikon jipmisop bat nya bikes yok ei inghat dip kwei ndam je hanyen.

²³Nibou ndig nya mibon yonti ba, inok jicig bat nya. Nibou ndig sop nya mibon yonti ba, inok jipmem bat nya. Yoni miba ibiau bicom mpia ei jimig him bikon jinyeng ba, ikuk yok bije binggei sut je. Mpe dima lene mijikan tut bipia Dani ne TUHAN ri. Yo di igyok ingon mem Da miwok Da hanyen bi sren.”

²⁴Gino ahig ser Da “Tou risindem mem gima pos ndigban di tentara gom pos tu nya hanyen leu noni i? Tou risindem mem gima teu yo di nibou pran kat yok tu nya bingwes ngun i?”

²⁵Lene TUHAN buhup “Mun dima mipek kep ri. Miditeu yo di tentara ikat yok tu nya bingwes ngun. Midipos ndigban di nibou pran pos tu nya bingwig leu noni. Lewo midihwen jide siceu nya biditeu jimunggwom bat nya ba, ingwes ngun.

²⁶Midibindei ba, jide siceu nya ibou sibui sut inggrom di idut apino itot yam ba, imai bingwig. Mpe dima lene mijo nibreisi mem tungwatu dihyeisi dini hagom bipia Dani ne TUHAN di teu je bijingwes ngun ri. Yoni mikan tut bipia Dani ne TUHAN bidinok Yakub de Allah di sindem bibor di kwek je tu ri.”