Read Hatam YESAYA 5 Bible Online

YESAYA 5 - Hatam bible

YESAYA 5

¹ Ma jimiap kep dihyet lewo diba doia bikiek disut gom bitut nide miai ba anggur nghousi. Disut dima ninyeng tak kep miai ba anggur nghousi ei nungug tou di nnum bibor kei gom.

²Noni kkin dihyei bibon beden lene com tig hagom leu leu api ta anggur nikioi di kei bibor eisi. Noni hok ig jibei gom ser mpia dima bibon ba, gom mem gima ibikimut anggur ngei eisi. Lene noni bet ningon mem nijam di ba anggur dima ngat ningat. Noro mpe dino noni puk ningat ne ngat lo, hagom hyenha bibor.

³Gima rino disut pai “He je di timiei minu ndig Yerusalem kin Yehuda nya e, ma jigwam nok nikei ba, jikos tut mem dani kin ditde miai ba anggur dima.

⁴Notou dinyohou miai ba anggur dima bu i? Lewo dimpig bou kep bidicom dahanggwap tut wer ninno tu. Nggon rino anggur dima ngat ningat di hyenha lene ngat ningat di nyop kei hi biDa bi i?

⁵Gima rino dibibon miai ba anggur dima nok gini. Dinggek ngug di bikrop ttai mpia dima hagom leu api disindui sut mindhe-ndhe di ipijuk bi nya igyem ningat bitem dihyei tut.

⁶Disindui sut ba anggur dima ba, mintu-minta mijei gau hagom. Dipe nimeng bidohom minta leu bu bi. Noro disindui sut ba, cibou nggwen kin tigau nggwen ceu hagom. Dicuon ser bumbuhui nhyema kwei sut biget ba, but eisi bu bi.”

⁷TUHAN Di Sindem Bibor Nide miai ba anggur nghousi dima ne mben Israel ri. Timiei Yehuda nya ne ba anggur nikioi di noni ta eisi nya ri. Noni yok ningon mem gima ingon sren-srau noro yahagom imbuk bibor. Ningon ya mem gi yahati tut mun di nijit noro yo di inso tut nikei nikos tutti di sren bi nya ighyet tibim ei nitingou nsi.

⁸Buhun bibor mem je di jipek ig nya bijiyai miai di hiter nide leu binhyepo jibikum jide mun di jinyeng tut nya bu! Jei bi ne minu dima bon nibresti mem nindigsi nya bi. Leu ba, je dima he mijibong ser.

⁹Dimiap TUHAN Di Sindem Bibor di heng tut “Ig ndig ngat di kei-kau dini hagom mingwak ba, tungwatu nya igibong ser bi.

¹⁰Ningat di ntun miaisi mingat kei bi lene miai ba anggur nghousi di yem hanjop nsi simnai ba, gi ikimut ba anggur ngat eisi ningei midem liter simnai he. Gandum njep di nibuhunti liter sratus gom gi indim mingat ningat liter simnai he.”

¹¹Buhun bibor mem je! Jide midyai di jiyai kep rino jidut kep mun di pu je ba, gima hwen je bijibou ngwak sibui sut bijo kikau leu njap tekti dimo ug bipek mmun kep.

¹²Nggong mbrei kin gitar kin mun di jimpig-mpig nyen kin porei nibimbiti tibim ba, ba anggur ngei pu je ei pestati lo, jiba jiyai ngat Allah de midyai kin mun di bon nya.

¹³Gima rino jiyai munti dima bindei dino siceu mikat Ditde limwa di ingon hukti bi nya bikri inda bibindei ba, isima ug a. Nibou nya kin limwa nya mimai inggum kin inggobiau cem ug a.

¹⁴Minu nimai nya ide hap niji bininsi bet mem gima pinde pinjoi ndig di inyeng jei ei minu ndig Yerusalem nya bitut limwa di igyai nillei ei pestati dima yahagom.

¹⁵Bikwop tungwagom-gom mitug ndei nimmai sut nonti ba, no di kon nonti mitug ndei ninyeng di cut.

¹⁶Noro TUHAN Di Sindem Bibor ndo tut ninyeng jeisi tug hon gi bon mun di igbit. Noni mindo tut Nide nikwes-kwausi tug hon gi gwam nok nikei mem Nide limwa nya.

¹⁷Kambir mien kin domba mien nya igyem abris meng ei ig kumti bidem minu ndig dima hagom ba, njita dima midem mem yok.

¹⁸Buhun bibor mem je di jibon sisar bijo kikau!

¹⁹Jipai “Nnaba TUHAN Allah Israel Di Kwes yai nibou tut midyai haninyai hak ug! Nnaba Noni bindei mbut ningon kanti hak leu binhyepo nyeni ingat ba, ikan tut ug.”

²⁰Buhun bibor mem je di jiba gi kei kin gi piga kin gi nyop bikiek-kiek nyen bibindei gi kinei kin gi dindi kin gi mpo cem a!

²¹Buhun bibor mem je di jikan bipia jingon ki ba, jintin kimbo bibor cem a!

²²Buhun bibor mem je di jinok nidut kep anggur ngei cig nya! Jibrim jingkek tut jiba ndia ngei di ten bisrig yamti mem gima pu je!

²³Noro jiba gima biyai mitiei nibingot kep jeti leu binhyepo jibikes yo di ibon mun tunggwei bingwes ngun lo, jibikkin ser yo di ibon mun di igbit nya leu binhyepo itug ndei nikei nikos tutti di sren kei bi.

²⁴Jirok TUHAN Di Sindem Bibor Nide ningginausi ei ba, jingwes om kep Allah Israel Di Kwes Nide nicuk jeti nya cem tu. Gima rino jide nigau nya mikroi cem jide mitou nya mui ba, hagom mibit hou bingwig noyam kin pas ntam kin minta mui di hum yem di ngwig ei humti.

²⁵TUHAN gga nide limwa nya bitin ei mem gima kes hukum ei yok dip. Nungug nya mporo ugwa-kwei. Nimbiam ngut mijo-jo wai bidem kep mumpiang di jo-jo wai ei puigsi nya. Mbro nok gima lo, TUHAN gga yok bikes hukum ei yok dip kikau.

²⁶TUHAN mijem mben ngkiai di ibong minu ting leu api yoni mibrim imig kwei!

²⁷Yo dima itin ei mem gima ikon pran bikwop mmun-njap. Imuhup ngwig ba, igikan niiman kin nibong mai cem bi sren.

²⁸Tibor di ide nya nggwen kei ba, ikri tibor mem gima ikes bindei siceu cem. Kuda di ide nya imig ndungwak ngkiem kei bidem tig hum lene ide kroba pran nimig sibui bidem hou di nimig ten bibor di mbut sindem.

²⁹Tentara di ide nya igyau-yau nyen bidem kep singa di sindi ttem mun di yem leu api briug binang tut ba, hi di mipas leu kan bi.

³⁰Yo di ibong bidem minu Israel nisurti-nipekti mimiap tentara ighyet sra tut pran nibimbiti di nindig bibor bidem kep muk di tti-tti nyen nibimbiti. Jingat i! Minu Israel dindi bimpung-piet tut ningon buhun biborti ba, nipigati wer dindi-kai tut.