Read Hatam YESAYA 59 Bible Online

YESAYA 59 - Hatam bible

YESAYA 59

¹Ma jikan bipia TUHAN ninghuisi jet bibor ser gima teu je bijingwes ngun ba, nitingou nam bibor ser gima miap kep jihyet au.

²Lewo jide nibon munti di kinei rino bindei dino Noni miap kep jide nadi bi a. Jide sisar di jibon nya rino bikwas jeni leu Allah ba.

³Jibon mun tunggwei tug hon gi jisuglai mun kin gi jiba jingon di gom biyai mun bi ba, tug hon gi jiba nisibut biyai jibou tut tungwatu nya bijiyai nimai biyok cem.

⁴Jittei jide munhyet bijiya ei nikei noho bei lene jibipai kep hiter mikui-kausi. Nisren-srausi tti kin je bi. Jisuglai mun ba, jiba jingon com mun di ugwai-gwai he. Jitin ei jingon kanti mem gima jipai kep hiter ba, jibibon mun di kinei.

⁵Jingon kanti di jitin ei nya biang nimai bidem kep wou piet nidinggwei. Gino jiki nidunggwei dima lene wou piet hei baham je. Jingon kanti di jitin ei dima ngat ningat hi mem je bi ba, noyam kin gino jiba anggungga naham bibien sinsun!

⁷ Jitin ei jingonti tut mun di kinei bijo-jo yam dip kikau leu api jingon ya mem nituti di jibindei mbut jingon kanti dima haninyai. Jihig jingon ei yo di ingon ngun nyati bi noro jiyai nimai biyok hak. Ninggekti kin nibindei sarti jo bidem jimbutti nya hagom.

⁸Jibrim jingkek mem ningon gomti bi. Jibon munti nya hagom igbit bi. Jimbutti nya ngot yam-pa yam nyen apino yo di ibit je ingwes ngun bi.

⁹Mben Israel ipai bak Allah “Nogindini nikan tut nggon rino ateu nye di ningwes ngun leu yo di ico kep nye inda nsi bi a. Nibet ningon mem nipigati lo, nidinditi nggai nye.

¹⁰Nidem kep yo di igyai tu di itibap-tibap wai. Nindrat mpia mem mpia nuhuk pijumti binikinoi noyam kin gino nimbut mem mmun-mmau. Mbro nok gino ningat rin ei yo di igyaijo nya ikieti lo, ninok yo di imai su.

¹¹Nittinti kin ningon nggukti jo kep nye ba, ninggok tut ningon nisrenti noro gima pek kep mem nye bi. Niyok ningon mem no di miteu nye biningwes ngun lo, gima mikui-kausi he.

¹²Ningat ne nibon mun di kinei mang bibor tut Na tu. Nyende sisar nya pai kep nye ba, ninok yo di igyai mun tunggwei ninyen. Ningon huk niti tut nyende nibon mun kineisi nok nijit binikan tut nyende sisar nya tu.

¹³Nikon Nani nok nyende TUHAN bi ba, naham nimbuk kep Na binikou sut Na cem lene nikou sut gi nibit nyende Allah tu. Nico kep yo di hiter ba, nico tunggwei puig di nijit cem tu. Nikan-kan nyenti srawir ba, nisuglai munti hei leu nuhui him.

¹⁴Nibison Ade nikos tutti nya ug ei puig nghas ba, nibindei ningon srenti jo ting leu su. Nikiek ningha bak nikei nikos tutti di igbit ba, nison nijit-jausi ug ei puig nghas tu.

¹⁵Yo di ingon sren nya hi bu bi. Lene no di om no leu niyai munti di kinei nya wer nimbiam drek dip mun di kinei dima sindam.” TUHAN ngat tu. Ningon buhun drek dip gi ningon srenti hi jo bu bi.

¹⁶ Noni nggap leu sut gi hi kiju bimbrap gau yo di itug ndei nihwen bit yokti bi a. Gima rino Noni ba nisindemti biteu Nide limwa nya bingwes ngun leu lene bindei ba, yoom kep ide nitok joti nya.

¹⁷ Noni miba ningon sren-srausi kin niteu yok bingwes ngunti bijuk No dem kep sinsun pran kin topi yeng ngkuong di ngkiem kei. Noni mibrim ningkek bipui nihyet tut gima ngkwei mun di hagom bijo nijoti nok gi nipou noro buhup niyai munti di igbit bi nya hanyen.

¹⁸Noni mibirop bak Nide siceu nya bit leu ide nibon munti di ibon kep nya. Mben ngkiai di ibong bidem mios di ting nya cem yahagom mingwes ngun leu Nide hukum di kes ei yok dip bi.

¹⁹Nide nisindemti kin ninyeng jei biborti mibindei ba, yo di ibong nite bei mpia nipriti kikau ug ei nite bei mpia nicutti yahagom mittin tut Noni. Noni misu kep yok nok minyei di ningwa sindem bibor di kui mpia tug hon hou di nimig ten bibor.

²⁰ TUHAN pai bak Nide limwa nya “Midihwou ei minu ndig Yerusalem leu binhyepo diteu je di jittin ser jide sisar tu nya jahagom bijingwes ngun.

²¹Dibon nipreu ei mem jeti nok gini. Diyai Ditde nisindemti kin dingginausi bije bijo ninno bijo kikau. Njap di ammani kui ne ma jiba dihyet bingginau jimunggwom bat nya leu binhyepo ibingginau imunggwom bat nya leu nintun him yamti di bram yam ug ei nintun him yamti di bram yam gi bram bu bijo ninno bijo kikau.”