Read Hatam YESAYA 6 Bible Online

YESAYA 6 - Hatam bible

YESAYA 6

¹ Ari bingwam di Nibou Ndig Uzia mai eisi ne dingat-hi-ngat bidingat TUHAN. Noni gwam ei Nide banggo mbrei di jo nai ba, kei-kau-kei. Nide sinsun ninda jei nggai kep TUHAN De Ig ninsi titut yam.

²TUHAN De nipai testi di ibon inyehei muhwindagom bibikwop yok ba, inok hum njeng di sror igya bikrop ttai Noni. Iba inyehei can binggai kep iimaisi lene iba inyehei can bu binggai kep ingut lene iba inyehei can bu bimba-mba nyen.

³ Lene yahagom ighyet kui yam bipai, “TUHAN Di Sindem Bibor kwes-kwau o! Kwes-kwau o! Kwes-kwau o! Dihyeisi dini mpung tut nikei-kau-keisi o.”

⁴ Ighyet di tibim dima bindei ba, TUHAN De Ig nikiou hagom ugwa-kwei leu api ninsi mpung tut hum mmup di ndok bibor.

⁵Lene dikan “Buhun bibor! Bit bon singwes ngun kan bi! Lewo side sisar ribindei dino map kui sihyet di tibim ei suhui him hagom ba, sibong bit yo di ighyet wer mpiahi tut TUHAN. Mbro nok gima lo, singat Nibou Ndig bou siyai him tu ba, Noni ne TUHAN Di Sindem Bibor ri.”

⁶Mpe dima lene mun di Allah pai tes di bon ninyehei pima ningut gom mba tut hum mbom gom di noni ba koi biket leu nimbar hum dok kwei ndam da.

⁷Noni ba hum mbom dima bingget duhui ngkek bipai “Hum mbom dini ngget ahui ngkek ba, nogindini angon mui bu bi lewo TUHAN kos ser ade sisar tu.”

⁸Lene TUHAN nihyet tibim ei ditingou nsi bipai “Midipinak tou i? Midisok dihyet ei tou nya dip i?” Lene dibuhup “Ditin ei su. Apinak da hak ug!”

⁹ Gima rino Noni sok nihyet ei da dip bak Nide limwa nya bipai biyok “Mbro nok gino jingig jitingou mem nihyet ninno lo, jimiap bi. Mbro nok gino jimian huk ninno lo, jingon dorti tut cem bi.”

¹⁰Noni pai bida “Ma abindei ba, yo dini ingkek ndok cem idat kep itingou cem imut igyai cem ser nhyema iba igyai ngat mungkun cem iba itingou miap mungkun cem iba ingon bisrip huk cem leu api ingkwei hanyen ndam Da bidibindei ba, ikei hanyen cem au.”

¹¹Dihig ser Noni “TUHAN e, ug ei mpe di tou leu api inok gini bu bi i?” Noni buhup “Ug ei mpe di minu ndig nya hagom timek bingwig ba, bon timiei nya hi bu bi ug e. Ug ei mpe di ig hagom ngwak ba, hi bong ser bu bi. Ug ei mpe di ide dihyei ninda rom titut yam minok iggum ndigsi bu ug e.

¹²Midijji timiei minu ndig nya hagom ug ei ingkiaisi apino ide dihyei ninda rom titut yam minok ha he bong.

¹³Mbro nok gino tungwagom leu ibou simnai bong ser nide ig bimbut bi lo, noni cem mitug midut. Noro noni minok asar ninjem di iwim lo, ningwam jo nijoti. Ningwam dima ndo tut nijam di nidipti bu tirigi Ditde limwa di igyaisi jo nya minok nitriti mem Ditde limwa di ingon kwes hanyen bu.”