Read Hatam YESAYA 60 Bible Online

YESAYA 60 - Hatam bible

YESAYA 60

¹Minu ndig Yerusalem e, ma akiju ba, apiga digai dihyeisi dini lewo No di teu na ba, angwes ngun dima Nide nipigati com kwei ba, Allah nikei-kau-keisi piga digai na tu.

²Mbro nok gino nidinditi minggai kep dihyeisi dini lene nindibutti kieng kep ngkiai nya lo, TUHAN de nipigati micom ndei na ba, tungwatu nya mingat nikei-kau-keisi di kwei ei jikieti bou igyai him.

³Ngkiai nya mingwig kep ade nipigati. Ninjeng di piga digai na mibindei ba, nibou ndig nya minduk yam kwei ndam na.

⁴Ma amian ttai na ba, ayok ayai kep mun di sindi pek kep mem na! Ade limwa nya imbus yam ei su ba, sindi induk yam kwei ndam na. Apmot bat nya no ikwei leu minu ting kwei lene tungwatu nya yuusap apmisop bat nya kwei.

⁵Mpe dino angat gima lene ma ayai nillei ba, angon nggei-hi-nggei lewo gima yok hagom mibiwin kep angonti. Ngkiai nya mikon ide ndigban kwei lene kibar minyei mikwei sut mitiei nindig bibor ba, injei bak nani.

⁶Mben Midian kin Efa kin Syeba yahagom mikon ide mas kin biei nggrai di ui-gwang kei ei ide unta nya imang bibor dip bijem yok kwei leu api yoni minggei sut TUHAN niyai munti nya!

⁷Mben Kedar kin mben Nebayot mijem ide domba nya kwei mem ade midut nindig domba nikre ei nimbar hum dokti di bindei ba, TUHAN joi sut na. Lene Noni miba Nide nikei-kau-keisi bimau Nide Ig bimpung kei.

⁸Kibar minyei di mbut sindem noyam kin bumbuhui ei minyei ngwa dip kin hakimoi di dwop juk kwei ei nibasti dima kwei leu hantou i?

⁹Kibar minyei dima kwei leu minu ting bimpung tut Allah de limwa nya di induk yam kwei ei itimieisi hanyen. Yoni ipwoi perak kin mas kwei ba, mibinggei sut TUHAN di nok mben Israel ide Allah Di Kwes-Kwau di bindei ba, ngkiai nya ikon Nide limwa nya inyenga.

¹⁰TUHAN pai bak minu ndig Yerusalem “Ngkiai nya miwin ngug tig di bikrop ttai jide minu ndig bikinding ba, kei hanyen. Nibou ndig ngkiai nya mikuk yok binok awak mem na. Nipou ne dikes hukum ei na dip drek dip dingon di sibui sut na nindig bibor. Noro tini bu ne dijoi sut nani bidingondut nani bu.

¹¹ Ade dimbou pmem mikau mem mmun-njap leu binhyepo nibou ndig ngkiai nya mingkwei-ngkwei nyen tut ide mitiei binjei hagom bak nani binok ade awak nya.

¹²Noro ngkiai nya kin ide nibou nya di ikuk yok bina bi mitimek bingwig.

¹³Tungwatu mirim biei ut di kei-kau nya kwei leu baham Libanon binjei hagom bak nani. Biei dima ne berangan kin eru bitut buom cem rin ba, irim kwei leu binhyepo ibimau Ditde Ig di nok mpia di diyati.

¹⁴ Yo po ico kep na pima imunggwom bat nya mikwei kuk yok ei amig him bikon anyenga. Yo po ingwes om kep na pima yahagom miba ibiau bicom mpia ei aho bei binggei sut na. Yoni mijem anyeng ‘TUHAN De Minu’ kin ‘Sion’ cem kin ‘Mben Israel Ide Allah Di Kwes-Kwau Nide Minu’ cem.

¹⁵Midikes na hanyen bihigom bi dingon misibui sut na bi disindui sut na ba, anok mpia nintiti bu bi. Noro midibindei ba, ade nikei-kau-keisi jo ninno ba, tungwatu nya igyai nillei tut na bijo kikau.

¹⁶Ngkiai nya kin ide nibou ndig nya minyohou na noyam kin sop gom di nyohou nimunggwom. Mpe dima lene mijo nibreisi mem na bipia Da di TUHAN diteu na ba, angwes ngun. Da di TUHAN di disindem bibor dikwek na tu.

¹⁷Midipwoi mas kwei biluei ade ngkimom-tembaga bidiba perak biluei ade ngkimom nitu. Midiba ngkimom-tembaga biluei ade biei sra bidiba ngkimom nitu biluei ade tigya. Yo di inyeng tak kep na mico kep na bu bi noro iba ningon sren-srausi kin ningon di kwes kin yamti binyeng tak kep na.

¹⁸Nimbuk tut yamti kin nibindei timek yam bingwigsi kin mun di buhun bibor nibimbiti mitibim kwei ei jikieti bu bi. Midiya srak ko hagau na dem kep nok ngug tig di krop ttai na apino anggei sut Da lewo diteu na ba, angwes ngun.

¹⁹ Mpe dima lene asuar mpia njap di com mem njap kin bed mmun di com mem mmun bu bi. Lewo Da di TUHAN ne nipigati dijo ninno jo kikau mem na ri. Ditde nikei-kau-keisi mipiga digai na.

²⁰Da di TUHAN midinok nipigati dijo ninno jo kikau dor njiriek mpia njap kin bed mmun mem na. Nijam ningon ngguk biborti mingwig hon nohonti.

²¹Ade limwa nya mibrim ingkek mem mun di igbit. Yoni miba yo kep minu dima bijo ninno bijo kikau. Inoyam kin biei kioi gom di dipai tes bidita leu binhyepo bindo tut Ditde nikei-kau-keisi ei nibreisi.

²²Lene gima he bi. Lewo nitig mbier tut yamti hi di mien bibor di bon ninyeng bi rin lo, midigek kep mpia nok mben nindig bibor biyai nisindemti ba, ninyeng jei cem. Dani ne TUHAN rin ba, midiyai dibou tut leu binhyepo gima pek kep mem na dem igbit tto boua.”