Read Hatam YESAYA 61 Bible Online

YESAYA 61 - Hatam bible

YESAYA 61

¹ TUHAN Di Ninyeng Jei Bibor sindem tut da bidimig da lene cuk da kwei cem leu binhyepo ditri tut nihyet di kei bak yo di yuhui mbum nya ba, diwin kep yo di ingon ngguk bibor nya ingonti. Ditri tut bak awak nya bipia igyati kwes. Bak yo di isima ei ig bui nsi bipia yehei bimbut bihigom.

² Noni cuk da kwei leu binhyepo dimbot kep tut tto bou mem TUHAN teu Nide limwa nya ba, biwin kep yo di ingon ngguk bibor nya ingonti lene birop hanyen bak ide siceu nya cem dima dem tu.

³Noni bindei ba, timiei Sion di ingon ngguk bibor igyai nillei. Yo di ingon buhun bibor nya migyai ningon di nggan-triot hanyen. Noni bindei ba, iba doia di ibinggei sut Allah biluei ningon kineisi. Mpe dima lene idem kep nok biei mon di TUHAN Nonti ta. Igyai munti nya hagom nok igbit ba, kei bibor cem bibindei ba, tungwatu nya ikon TUHAN ninyeng di jei bibor.

⁴Nide limwa nya miwin minu di timek bingwig nya bikinding mpia ttou nsi nya di ha he bong hagom bikei hanyen.

⁵Ditde limwa jen e, ngkiai nya minok awak mem je. Yoni mighyen kep jide domba nya ba, igyai miai mem je lene inyohou jide ba anggur nghousi nya cem.

⁶Tungwatu nya mindat kep jinyeng bipia jeni ne Allah de awak nya bijem jinyeng bipia imam mem ide TUHAN ri. Mijiba jekep ngkiai nya ide mun di inyeng tut nya ba, jingon nggei sut ide ndigban di jiyai leu yok.

⁷Nijam ninim kep jeti kin ningwes pri gau jeti ngwig hon nohonti tu. Mijibong kei jigwam kei ei jide minu ba, jiba jekep ndigban kin mitiei mbican bram yam cem. Mijiyai nillei bijo ninno bijo kikau.

⁸TUHAN pai “Dingat dingwes ei yo di ingon sren-srauti lo, dingon mpo tut yo di isibut nya kin yo di ico kep hiter nya. Midiba dingon di gom biyai amuhup bina bidiba nipreu di jo ninno bijo kikau bipreu ei mem na.

⁹Jide nintun him yamti di bram yam nya inyeng jeisi tibim bidem minu lene ei ngkiai di ikieng kep minu nisurti-nipekti ikieti cem. Dibindei ba, ide ningon nggei-hi-nggeisi mijo nibreisi mem yo di ingat yok bou igyai him yahagom.”

¹⁰ Minu ndig Yerusalem pai “Dillei ngwig sut TUHAN niyai munti nya. Noni ba sinsun nda di ninyeng rino niteu leu sisarti kin nibindei sar siceusi nya bijuk da noyam kin no di pinai kin no di sop di imau yonti mem midut niwak yamti.

¹¹TUHAN Allah Di Sindem Bibor mibindei ba, niteu leu sisarti mehei ei dihyeisi dini dem kep nok njita kioi apino ngkiai nya yahagom minggei sut Noni.”