Read Hatam YESAYA 65 Bible Online

YESAYA 65 - Hatam bible

YESAYA 65

¹ TUHAN pai “Ditin ei mem dibuhup Ditde limwa nya ide nadi noro ingat nadi biDa bi. Ditin ei mem diya um yok noro ikwei nggok Da bi. Mbro nok gino ditin ei mem dibuhup ‘Ditindei kep jihyet lo,’ mben dima ingat nadi biDa bi.

² Ditin ei mem diya um Ditde limwa nya bikwop mmun-njap noro yaham imbuk kep Da ba, ita ibou ei ide mun di mbuk bibor nyati bingkek ndok cem.

³Yoni ibindei bidingon sibui sut yok kikau noro immai sut yonti bi. Ibon midut nikuk no bak kwar nya ba, indig biei nggrai di ui-gwang kei bak ei ide nimbar hum dokti bidem ide miaisi nya.

⁴Induk yam ei hak mihyeti kin nimai jui dip nya mem mmun leu binhyepo iko binggok tut nimai ingwes nya. Igyem kep na nghui bidut mikwau di ngkiai nya ipigig ser mem ide kwar nya ningei cem.

⁵Imbrua ser tungwatu nya bipai ‘Jiya bileu nye bijingget nye au! Nimbres nye leu je lewo nikwes-kwau!’ Noro diyai ngkek ttin yok bidingon mpo tut yok! Dingon sibui sut yokti dem kep nok hum di sror di imu hanyen kan bi.

⁶Dikos tut hukum di micut igkep yok ba, hagom jo ei Doho bei tu. Midiba diyai ngat igyai munti nya he bi. Midibirop hanyen biyok,

⁷drek dip ide sisar kin idigup bat-idigai bat nya ide sisar. Ibon mun kinei sut Da tug hon gi indig biei nggrai di ui-gwang kei bak ide kwar di ikuk yok bak kikau nya ei nungug tou di ide ig kwar yati nya. Midibuhup biyok bit leu ide nibon munti di ibon ei nijam gi nipou pini jug.”

⁸TUHAN pai “Tungwatu nya icom ba anggur ngat di ningei joti nya bi. Noro ipot binok ba anggur ngei bidut. Nok gima cem midibindei sar Ditde limwa nya yahagom hak bi. Lewo bihi leu yoni ikieti no yoom yonti binok awak mem Dani yo.

⁹Midinjei mun di kei bak mben Israel di intun keret Yehuda him ba, ide nintun him yamti di bram yam nya igyai Ditde dihyei di bon nungug him nya nok ide dihyei ninda rom. Yo di didimig yok ei su nya miyoom yonti binok awak mem Da bibong ei mpia dima.

¹⁰ Yoni mikuk yok biDa ba, domba di ide nya kin sapi di ide nya migya kep minta nghousi bitat ei Briep Bou Him Saron kin Mbang Briep Akhor.

¹¹Noro mun dima mipek kep mem yo di iba inghim biDa kin yo di iba igyai ngat Ditde nungug Sion di kwes-kwau[26] kin yo di ipwoi mun di ibikuk yo bak kwar Gad Meni nya di bindei di itug ndei mun di kei ba, bindo mun di pek kep mem igyaijoti cem biyok bi.

¹²Jahagom mijimai nimbiam. Lewo mpe di dihig je lene jigibuhup bi. Ba, mpe di dimbrap lene jigimiap kep dihyet bi. Jikos tut bipia jico kep Da bijibon kep mun di kinei he.

¹³Gima rino dipai bije bipia yo di ikuk yok biDa migyem njita noro jimai jinggum. Yoni midut ndia ngei noro jimai jinggobiau. Yoni migyai nillei noro jigwam nimmaiti.

¹⁴Ningat ne yoni miba ingon di nggei-hi-nggei bimbos-hi-mbos nyen noro jiba jingon di ngguk bibor bipim.

¹⁵Yo di didimig yok ei su nya miba dinyeng bisigion je bipai “Nna ba TUHAN Di Ninyeng Jei Bibor yai nimai bije noyam kin yo dima!” Noro midiyai ninyeng nijep bak yo di ibit Dihyet.

¹⁶Bikwop timiei minu dima gom-gom dino hara mun di kei mahara Allah di ningon gom mem gima njei mun di kei bak. Bikwop tungwagom-gom di preu ei mem hiter mipreu ei tug hon Allah di ningon gom ninyeng. Lewo mun di buhun di cut igkep yok nipou yo pima pror leu yok ba, ibbwe ser tu.”

¹⁷ TUHAN pai “Midipai tes dihyeisi kin mpia-bbed him di nijep bu leu api mun di pek kep mem tungwatu nya nipou su hagom mipror hanyen bipren leu ibou ngwakti.

¹⁸Ma tungwatu nya igyai nillei ba, ingon kei bibor tut mun di dipai tes nya. Midipai tes minu ndig Yerusalem di nijep bu. Mpia dima mimpung tut yo di imbos-hi-mbos bingon llei bibor.

¹⁹ Dingon millei sut minu ndig Yerusalem kin timiei nya. Tungwatu nya igyai nggwei mikibor ba, yahara hiter bimpu yok bu bi.

²⁰Munggwom ngwoi nya mimai ujau bu bi ba, andigpoi nya ide njap ug ei ari bingwam mang bibor. Tungwatu nya mipai sut yo di ide njap ug ei ari bingwam sratus gom bipia inok pilei he yo. Ba, ikan bipia yo di imai urung nya ne yo di imai drek dip hukum di dikes ei yok dip ri.

²¹Tungwatu nya mingot ide ig bibong kikau ser leu api yoni ita ba anggur nikioi bipuk ningat bigyem.

²²Yo di hiter miba yokep ig kin ba anggur ngat dima bi. Lewo Ditde limwa nya ide njap ug ei ari bingwam mang bibor dem kep nok bimem di niyati nddong apino yoni mingat ingwes ei ide midyai di ngat ningatti.

²³Ide midyai nya hagom mingat ningat di kei. Mun di buhun bibor mibindei mai imunggwom bat nya bi sren. Midinjei mun di kei bak Ditde limwa nya kin ide nintun him yamti di bram yam nya bijo ninno bijo kikau.

²⁴Nipou tirigi ingat nadi bingwig bigyo lene midibuhup ighyet. Nipou tirigi ikes ighyet hon ba, ingat nadi bingwig bigyo lene midibirop hanyen biyok.

²⁵ Nsien mbrei di niten-pos nya mitai njita bit domba mien nya. Singa nya mitai njita noyam kin sapi nya lene wou nya yaham tungwatu bu bi. Mun di mbuk kin nirom ndokti mijo ei Ditde nungug di kwes-kwau dima nisurti-nipekti bu bi.”