Read Hatam YESAYA 66 Bible Online

YESAYA 66 - Hatam bible

YESAYA 66

¹ TUHAN pai “Gwamti lene bilen mem digwati ba, dihyeisi lene bilen mem dimig ri. Bon jingot ig di nok mindei mem Da i? Nghim nsi mem dibong nyahan eisi rigitou i?

²Dangkom dipai tes mun dima yok hagom bou dinda him! Dijoi sut yo di iba ibou coi mem Da kin yo di ittin ser ide sisar kin yo di ittin tut Da kin yo di ibit dihyet.

³Noro mben dima ibon mun bit leu yonti ingon kanti. Ingat Njap Nigwam Kep Ninghuisi tug hon nisinati di bindei ba, diyai ttin. Mem yoni ne midut di ibon nya hagom noyam. Ibon midut nindig sapi nikre noyam kin midut nindig tungwatu ba, ibon midut nindig domba pmot noyam kin ibon midut nidahat nsien nikimam ba, ibon midut nindig gandum ngan noyam kin midut nindig na ninggrom ba, ibon midut nindig biei nggrai di ui-gwang kei noyam kin ibon midut nikuk no bak kwar nya. Midut dima yok ter leu yam bou igyai him bi.

⁴Gima rino midibon mun igbit dingon kanti bidikes mun di buhun di ittin tut nya ei yok dip. Lewo mpe dino dihig yok lene hi di buhup dihyet bi. Mpe dino dimbrap bit yok lene hi di miap kep dihyet bi. Mbro nok gino ikan tut bipia dingon mpo tut mun di kinei lo, ibon kikep mun di kinei dima rok him.”

⁵Je di jittin tut TUHAN bijibit nihyet e, ma jingig jitingou mem mun di Noni pai bije “Mbro nok gino jiba jingon di gom bibit Da lo, bihi di isrig jikieti ingon kinei sut je ba, ikou sut gi ijem isut bit je. Iba ighyet bicig je bipai ‘Handei kon ba, TUHAN kiju bindo Nide ninyeng jeisi brei bije lene bindei ba, jingon nggei-hi-nggei biningat bou niyai him.’ Noro yoni ibiyai nimmai biyonti.

⁶Jimiap i! Nibimbiti di bong dihyeiti binok kru di cut no nugwei jo kep minu ndig a. Nihyet no tibim kwei leu Ditde Ig a. Nihyet dima ne TUHAN nihyet di Noni kes hukum ei nide siceu nya dip ri!

⁷ Ditde minu ndig di kwes-kwau dem kep sop gom di srek tut nimunggwom nipou tirigi ninghim dut tut nimunggwom ba, ningkek kan ninghim di dut tut nimunggwom di misrek tut bigyo.

⁸Tou rino miap tut mun di nok gima tu i? Tou rino ngat mun di pek kep nok gima bou niyai him tu i? Noro mben Israel isrek hammi tirigi njap di Sion sindi ninghim dut tut nimunggwom.

⁹Ma jikan bi a duusap Ditde limwa nya kikau ug bipek njap di isrek lo, disindui sut yok bisrek bi au.” TUHAN simbot dat tu.

¹⁰Je di jingon ngakei minu ndig Yerusalem e, ma jiyai nillei bit. Je di jingon ngguk tut minu ndig dima e, nogindini ma jingon nggei-hi-nggei.

¹¹Mijingat jingwes ei minu ndig Yerusalem de nibong kei nigwam keiti noyam kin munggwom mien gom di dut kep nipmem nido ngei.

¹²Lewo TUHAN pai “Midiyai nibong kei nigwam keisi di dem kep minyei di biam kikau bije. Ngkiai nya mipwoi ide ndigban di inyeng tut nya di dem kep minyei di kui mpia bigyai bije. Ba, mijidem kep munggwom di dut kep nipmem nido ngei cem di nipmem hon kin no cem di nipmem prios-prios nyen bipai-hi-paisi cem.

¹³Midigwam ser je di jingat rin ei minu ndig Yerusalem jingon ba, jinoyam kin munggwom di nipmem gwam ser ningon yo.

¹⁴Tirigi mun dima pek kep mem jeni ne mijingon nggei-hi-nggei ba, jinghuisi sindem cem kwes cem ba, jidem kep minta di nimeng ngun-ngau kei. Leu api Ditde nisindemti mimpung ei Ditde awak nyati noro Ditde siceu nya mitug ndei Ditde nigga yoti.”

¹⁵Ningat ne TUHAN mikwei sut hum a. Noni mikui Nide kroba pran di dem kep hou di nimig ten bibor lene bindei hei nigga biborti bikon nihyet kep yok bibor.

¹⁶Lewo Noni miba hum kin singau simeda bikes hukum ei yo di ide nitunggweisi nya jo brei niyai him dip apino imang bibor di itug ndei hukum dima imai drek dip.

¹⁷TUHAN pai “Yo di ibindei kwes yonti mem gima injei nimpung bit yam ug ei mitou nghousi di ipigig ser mem kwar nya[27] ba, ikuk yok bak dima yahagom mipror noyam kin yo di igyem na kin ncup nghui kin njita hiter di bindei ba, tungwatu nya igyai ngkek ttin ser.

¹⁸Dikan tut ide nikan-kan nyenti kin ide nibon munti nya. Midikwei[28] bidinduk tungwatu nya leu ngkiai nya di ibong bidem dihyeisi dini hagom ba, ibicom yam. Tirigi idem yam ei su ne yoni mingat Ditde nisindemti bou igyai him,

¹⁹lene midikes mun di bindo ninyeng gom ei ikieti. Mididimig ibou poi di ingwes ngun leu api dipinak yok ndam ngkiai nya di ibong ei minu ting bibor di imiap tut Dani bi sren yo kin gi ingat Ditde ninyeng di jei biborti kin Ditde nisindemti bou igyai him bigyo nya. Midipinak yok ug ei minu Spanyol kin Libia[29] kin Lidia di bon nikri kep tibor cig nya kin Tubal kin Yunani nya. Yoni mitri tut Ditde ninyeng jei biborti ei mben ngkiai dima yok ikieti.

²⁰Yoni mibuwak jisut bat di jide mben nya yahagom hanyen leu minu dima yok kwei nok mun di kei di injei biDa. Yoni miba kuda kin keledai kin unta kin kroba pran kin kroba nitu di kuda kri bibuwak yo dima kwei ei Ditde nungug di kwes-kwau[30] ei minu ndig Yerusalem. Igyaisi dima noyam kin mben Israel igyai kepti di iba bokor di nirom kuisi bi bittei gandum di ikwas tut Da kwei ei Ditde Ig ri.

²¹Midita yo dima ibou poi di igyai midyai nok imam kin ibou poi bu di igyai midyai noyam kin yo di intun Lewi him.

²² Jide nintun him di bram yam nya kin jide keret ninyeng mijo bingkiem-kiau kikau noyam kin mpia-bbed him di nijep kin dihyei di nijep di jo ngkiem-kiau tug hon Ditde nisindemti.

²³Nimpung tungwatu nya yahagom mikwei kuk yok biDa ei minu ndig Yerusalem bikwop Bed Jep kin Njap Nigwam Kep Ninghuisi.

²⁴ Mpe di ikiju bingkwei hanyen ug ei ide ig lene mingat nimbiam di ikiek imig jou tut Da bou igyai him. Njingwoi di bipio ingut dima yok mimai ba, hi dima mu hum di yem yok kan bi. Gima ne mun di biyai yo di ikriau bicap kep nya yahagom igyai di ttin bibor ri.”