Read Hatam YESAYA 8 Bible Online

YESAYA 8 - Hatam bible

YESAYA 8

¹TUHAN pai bida “Ma ayai tig pas nindig bibor leu api aba hurup nindig bipas eisi ‘Nibrim Kep Mun Sinti Cig’ kin ‘Nipos Kep Mun Haninyai Cig.’

²Lene ma ahig Imam Uria kin Zakharia di Yeberekhya nipmot bat cin di aba angon com yok nya kwei leu binhyepo ingat tig pas dima bou igyai him.”

³Lo bi lene bed poi bu ditnem nghop. Mpe dino srek tut nipmot lene TUHAN pai bida “Ajem apmot ninyeng ‘Nibrim Kep Mun Sinti Cig’ kin ‘Nipos Kep Mun Haninyai Cig.’

⁴Lewo nipou tirigi noni hara ‘Arig e, amei e,’ kan bigyo lene nibou ndig Asyur mikwei kon pran bit mben Damsyik kin mben Samaria bipos ide ndigban kin mitiei hagom bingwig leu yok.”

⁵TUHAN pai bida mbigom kin bu,

⁶“Timiei Yehuda nya ikou sut Minyei Pmot Syiloah di biam nyahan lene inghuisi mpig sut Nibou Ndig Rezin kin Nibou Ndig Pekah.

⁷Gima rino Da di TUHAN midinduk nibou ndig Asyur kin nide tentara yahagom kwei ba, ikon pran bit timiei Yehuda nya. Tentara dima minjei siceu noyam kin Minyei Efrat di kui mpia di yon gau nipimbien hagom.

⁸Yoni micok tut dihyei Yehuda noyam kin minyei di su di kui sur jikimam behei biprioi mun nyeng hagom.” Allah Ningat rin bit nye! Noni kieng ninyehei gau ide minu dini binyohou nye.

⁹Je di ngkiai nya e, ma jiba jingon di digit nduk yam ei gom! Je di jibong dihyei nohon keti nya e, ma jimiap kep dihyet! Ma jiba jingon di digit binjei siceu. Igbit ri! Ma jiba jinghuisi di mpig bibor binjei siceu.

¹⁰Ma jinyohou kos dat jingon kanti nya! Noro jingon kanti dima mipek kep mem je bi sren. Nna ba jisimbot kep biyam ninno noro gima yok mikui-kausi he. Lewo Allah Ningat rin kin nye.

¹¹TUHAN sindem tut da bipingok dingonti leu binhyepo dibit puig di timiei Yehuda nya ikak dima bi. Bipai bida,

¹² “Ma aba na kum yo di yuhum yam nsi ba, attin tut mun di yoni ittin tut au.

¹³Ma ayok ngon kep bipia Da di TUHAN Di Sindem Bibor dingon kwes-kwau. Ma attin tut Dangkom he.

¹⁴ Dingon kwes-kwausi rinok tig mma nindig di bindei ba, timiei Yehuda nya kin mben Israel indrat bicut. Dinok bon di timiei minu ndig Yerusalem nya ibiam.

¹⁵Imang bibor mindrat tig dima bicut ba, ibok-ba leu api ibiam bona.”

¹⁶Je di jiya kui da e, ma jipwoi nihyet di Allah kes ei da dip ba, jinyohou nihyet dima.

¹⁷ TUHAN ku No binding leu Nide limwa di intun Yakub him nya igyai him noro diba dingon com Noni bidiyok dingon mem Noni.

¹⁸Dani kin dimunggwom bat nya di TUHAN yai bida nahagom ningat rin ei sirini. TUHAN Di Sindem Bibor di bon Nide banggo mbrei ei Nungug Sion cuk nye ndam Nide limwa di mben Israel ba, ninok bindo mem yok.

¹⁹Noro limwa dima yok micuk je ndam yo di nung kui yok kin yo di inda dut nya di yahamui nyahan ba, inggimu-nggimei leu binhyepo indo bindo bije. Yo dima mipai bije “Suar nyeni iko binggok tut nimai ingwes nya tut mun di bitut yo di igyaijo nya.”

²⁰Noro ma jibuhup biyok, “Ma jimiap kep TUHAN nipingok jeti! Yo di ipai mun tunggwei sut nipingok jeti dima ibon ide mun di igyok ingon mem hi bi.”

²¹Timiei Yehuda nya minggum bibor ba, ingon ngguk bibor cem leu api ibong sinsiou nyen bidem minu. Ninggum di hwen yok mibindei ba, ingon sibui nindig bibor leu api ighyet wer mpiahi tut ide nibou ndig cem tut Allah cem. Mbro nok gino imian huk mpia-bbed him kin,

²²dihyeisi dini lo, yoni mingat mun di bindei di ingon buhun bibor kin nidinditi he ba, yuug dor ei nidinditi di dindi-kai dima.

²³Noro nijam di biang ningon buhun biborti dima moom kep minu dima kikau bi. Nipou ne TUHAN ningwes om keret Zebulon kin Naftali nya ide hanjop nsi di igya niti dima. Noro ei nidipti bu Noni mibindei ba, ide minu dima leu Muk Ninggimau nintig dip kikau ug ei nite bei mpia nipriti binjiriek Minyei Yordan kin hanjop Galilea di ngkiai nya ibong ser dima cem hagom mibon ninyeng di jei bibor.