Read Hatam YESAYA 9 Bible Online

YESAYA 9 - Hatam bible

YESAYA 9

¹ Tungwatu nya po imbut mem nidinditi pima ingat nipigati di piga bibor bu tu. Ninjeng gom piga digai yo di ibong dideu minu nimai nya ide bu.

² TUHAN e, abindei ba, ingon llei bibor bimbos-hi-mbos. Ingon llei sut Ade nisingat tut yokti nya dem kep nok yo di ingon llei sut gandum di ikos kwei leu beisi kin yo di ikwas ndigban di ipos nya tut yam.

³Lewo Na di TUHAN abindei ba, biei di iprion ei inghat dip pima dahat leu su. Adahat tom di iceu bibui yok tu. Abindei sar ngkiai nya di yoom Ade limwa nya bimbuk tut yok pima bingwig bit leu nok abindei sar tentara Midian nipou mimbrek tu pima.

⁴Hum miyem tentara di ikon pran bit Ade limwa nya ide srop kin ide sinsun di ngwoi-ngwau hagom.

⁵Munggwom gom srek mem nye tu! Igyai mot gom mem nye tu! Mot dima ninyeng mitak kep nye. Tungwatu nya mijem ninyeng ‘Nikei Di Ningon Ki’ kin ‘Allah Di Sindem Bibor’ kin ‘Icig Di Niyaijo Kikau’ kin ‘Nibou Ndig Nibong Kei Nigwam Kei’ cem.

⁶Ninyeng mitak kep limwa nya nok nibou ndig di ntun Daud him ba, sindem bibor. Nide limwa nya mingon kwes kin yam kikau. Nide nicukti di nijit nya kin ningon sren-srausi minok cou nipmem mem ninyeng di tak kep nogindini cem bijo ninno bijo kikau cem. TUHAN Di Sindem Bibor yai nibou tut niyai munti dima yok hagom.

⁷ TUHAN simbot dat tut hukum di Noni mikes ei mben Israel dip tu.

⁸Mben Israel kin timiei Samaria nya yahagom mikan tut bipia TUHAN rino kes hukum ei yok dip. Nogindini ikon yonti ba, ingon jei bipai biyam,

⁹“Ig di niba tig bata biwin nya lus ningwig tu. Noro miniba tig nitu biwin hanyen bu. Siceu wim biei ara nya hagom tu. Noro miniba buom Libanon di kei bibor nya biluei hanyen bu.”

¹⁰TUHAN dor pip ide siceu nya[6] mem gima ihwen bit yok tu.

¹¹Minu Siria hap niji ei nite bei mpia nipriti kwei ba, minu Filistin hap niji ei nite bei mpia nicutti kwei mem gima ipinde minu Israel titut yam. Mbro nok gima lo, TUHAN nigga yokti jo kep ba, Noni mikes hukum ei Nide limwa nya dip.

¹²Mbro nok gino TUHAN Di Sindem Bibor kes hukum ei yok dip tu lo, iginso yonti tut gima ba, igittin ser ide sisar bingkwei hanyen ndam Noni bigyo.

¹³Gima rino TUHAN kes hukum ei nibou mben Israel bitut ide limwa nya yahagom dip mem njap gom ngat he. Noni kwam minu Israel bicom nibou kin nipu ei.

¹⁴Nibou dima ne ndigpoi ndig nya kin yo di inyeng jei nya ri. Nipu dima ne nabi di iba ningginausi di igbit bi bingginau yok di ibindei srawir yok nya ri.

¹⁵Ide nibou nya ibindei srawir ide limwa nya ba, igyok nisinsiou ei yokti cem.

¹⁶Mben dima ikes ide niba ningon com Allahti ei ba, ide niyaijoti kinei lene ighyet nya hagom kinei-kinau cem tu. Gima rino TUHAN teu pinai pilei hi di ningwes ngun bi ug a. Noni ngondut kibom nya kin moibihi nya cem bi noro gga yok kikau ba, kes hukum ei yok dip yo.

¹⁷Mben dima ide nibon mun kineisi yem mpia bidem kep hum di yem war nggig-nggwenti. Ninjeng dem kep hum di yem bahamti di nimmup kui di brou pimo.

¹⁸TUHAN Di Sindem Bibor gga bibor ba, Nide hukum dem kep nok hum di cig-cai ba, Nide limwa nya rinok war nggig-nggwen di hum yem ningwig a. Hi di ngondut nide adig-ajoi bi.

¹⁹Tungwatu nya bidem minu dima hagom ibrim-nggok njita di igyem bigyem-yem wai. Noro igikan niyem mun di ndei inggumti bi. Gima rino ibiyem yonti imunggwom bat nya inghui cem!

²⁰Keret Manasye kin Efraim nya yonti ikiju bihwen yam leu api yahacem ikiju bihwen keret Yehuda bu. Noro TUHAN gga yok bikes hukum ei yok dip bijo kikau yo.