Read Hatam IMAM NYA IDE MIDYAI 1 Bible Online

IMAM NYA IDE MIDYAI 1 - Hatam bible

IMAM NYA IDE MIDYAI 1

¹Lene TUHAN nihyet tibim kwei leu Prak Meng bihig Musa kwei lene TUHAN tri tut Nide nicukti nya binoni,

²leu binhyepo mben Israel ibit hagom. Gino tungwagom ba nide mindhe bikuk no bak TUHAN bindig titut kep hum ei nimbar hum dokti lene ma noni jem ningut gom leu nide sapi kin domba kin kambir nya kwei.

³Gino noni jem nide sapi ningut gom kwei lene ma noni dimig nikre di bok-ba bi. Suar noni jem sapi dima kwei ba, ya tut kui dimbou ei TUHAN De Prak Meng nuhui leu binhyepo TUHAN joi sut noni.

⁴Lene ma noni kes ninda ei sapi nibou dip leu api TUHAN ningon micut hon niyai munti dima bikos ser nide sisar.

⁵Lene ma noni bui sapi dima ei dimbou hui ei Prak Meng niyati leu api imam nya di intun Harun him migyai ninggrom bak TUHAN leu api ibiprok nimbar hum dok di jo hammi dimbou hui ei Prak Meng niyati dima nitta bitaisi.

⁶Lene ma no dima et sapi ningkek leu lene digo ninghuigya.

⁷Lene ma imam nya indig hum ei nimbar hum dokti leu api ikes biei hum bijo dip.

⁸Lene ma ikon sapi ningut bikes ei humti bitut nibou kin nimmau cem.

⁹Noro ma no dima ba minyei bipiap bei ninghopti kin nindimuhum cem nipou ug e. Lene ma imam dima ndig sapi ningut titut kep hum ei nimbar hum dokti. Lene TUHAN mijoi sut ninghap di ngge kei dima.

¹⁰Gino tungwagom ba nide domba ningut gom e, he kambir ningut gom e, bikuk no bak TUHAN lene ma noni dimig nikre di bok-ba bi.

¹¹Lene ma no dima bui mindhe dima ei nimbar hum dok nite bei mpia nijjai. Lene ma imam nya yehek ninggrom bibiprok nimbar hum dok nitta bitaisi.

¹²Niabiati no dima digo mindhe dima tu lene ma imam gom kon bikes ei nimbar hum dokti bitut nibou kin nimmau cem bindig kep hum.

¹³Noro ma no dima ba minyei bipiap bei ninghopti kin nindimuhum cem nipou ug e. Lene ma imam dima yai mindhe dima ningut titut bak TUHAN leu api ndig kep hum ei nimbar hum dokti. Lene TUHAN mijoi sut ninghap di ngge kei dima.

¹⁴Gino tungwagom ba nide ha bikuk no bak TUHAN lene ma noni krau ha ningut gom leu ha tekukur e, he hakimoi mbrei e, kwei.

¹⁵Lene ma imam gom krau ha dima kwei biya kui nimbar hum dok lene sibui nikimam leu api ndig nibou kep hum ei nimbar hum dokti. Lene ma noni pot ha dima ninggrom ba, biprok nimbar hum dok nitta.

¹⁶Lene ma noni digo ninggimang bitut mun di joti nya hagom leu lene com ei atriem ndung nijoti ei nimbar hum dok nite bei mpia nipriti.

¹⁷Lene ma imam dima srat ha dima ningut hacan hammi ninyehei noro suar ninyehei nya jo nijoti ba, ndun him. Lene ma noni ndig hagom kep hum ei nimbar hum dokti. Lene TUHAN mijoi sut ninghap di ngge kei dima.