Read Hatam IMAM NYA IDE MIDYAI 11 Bible Online

IMAM NYA IDE MIDYAI 11 - Hatam bible

IMAM NYA IDE MIDYAI 11

¹Lene TUHAN yai nide nicukti bak Musa kin Harun,

²leu binhyepo itri tut hanyen bak mben Israel bipai “Ma jiyem mikwau leu mindhe-ndhe di imbut-mbut nyen ei dihyei njek dip dini,

³di ibon injou nggram kin itai-tai nyen njita he nya.

⁴Noro tut unta nya,

⁵kin minmei mbrei nya,

⁶kin mikwou mbrei nya lene ma jiyem inghui au. Map kui mindhe-ndhe diniti lewo mbro nok gino ittai njita lo, ibon injou di nggram bi.

⁷Lene ma jiyem na nghui au. Lewo map kui na nyati drek dip gi injou nggram noro itai-tai nyen njita bi.

⁸Mindhe-ndhe ninyeng bitai dini ne ma jiyem inghui ba, jingget ingut cem au. Lewo map kui hagomti.

⁹Ma jiyem wau di bon nikra kin ninnan hagom inghuigya.

¹⁰Noro tut mindhe-ndhe nindigsi nya di yaha minyei lo, bon nikra kin ninnan bi lene ma jiyem inghui au.

¹¹Map kui mindhe-ndhe di nok gimati. Ma jiyem inghui ba, jingget ingut cem au.

¹²Tut mindhe-ndhe di yaha minyei di bon nikra kin ninnan bi dima yok lene ma jiyem inghui au.

¹³Lene tut ha nya di inyeng tibim kin daptar dini ma jiyem inghui au lewo map kuisi. Hacam nya,

¹⁴kin kusin nya kin hacam nya,

¹⁵kin miniwou nya,

¹⁶kin handingat mbrei nya kin swen nya kin ha yem wau nya kin kusin ninside nya hagom,

¹⁷kin swen nya kin miniwou nya kin hapug nya,

¹⁸kin kindus nya kin kindus ningwoi nya kin ha undan nya,

¹⁹kin habek nya kin hakom nya kin mingim nya hagom.

²⁰Lene map kui mindhe-ndhe nimien di ibon inyehei nyati cem gi ibon imig bitai nya cem hagomti.

²¹Noro tut gi hi di ibon imig mem gima ipri-pri nyen lene nipuig kwes mem jiyem.

²²Gima rino dice tut gima jiyem hai ceng nya kin akosiber nya kin hai nindigsi nya.

²³Noro tut mindhe-ndhe nindigsi nya di ibon inyehei kin gi ijjei nyahan ei dihyei ninjek dip nya cem lene map kui hagomti.

²⁴Gino tungwagom ngget mindhe-ndhe dini ingut lene map mikui noti kikau bibou mpia kimbas ug e.

²⁵Tungwa tou rino kon mindhe-ndhe dini yok ingut lene suar ba minyei bitot nide sinsun leu lo, map mikui noti kikau bibou mpia kimbas ug e.

²⁶No di ngget mindhe-ndhe di bon ninjou gom lene map mikui noti. Noro map kui mindhe-ndhe di ibon injou nggram kin gi itai-tai nyen njita cemti bi.

²⁷No di ngget mindhe-ndhe di iba indungwak bimbut hagom lene map mikui no dimati.

²⁸Tungwa tou rino kon mindhe-ndhe dini yok ingut lene ma ba minyei bitot nide sinsun leu lo, map mikui noti kikau bibou mpia kimbas ug e.

²⁹Lene map kui mindhe-ndhe dini yokti cem. Njei nya kin minmei nya kin ncup nya kin binggras nya,

³⁰kin mipigig nya kin mpri nya kin migcun nya kin unggormam nya kin koyong nya kin pus nya hagom.

³¹Tungwa tou rino ngget mindhe-ndhe dini yok ingat kin ingut di mai ei cem lene map mikui noti kikau bibou mpia kimbas ug e.

³²Gino mindhe-ndhe dini yok ingut hi cut bingget mun nyeng hi lene mibindei ba, map kui mun dimati. Mun di nok biei sra kin minyahas kin mindhe ngkek kin kron di tungwatu ikrau kep nya. Lene suar yoni itot mun dima ei minyeiti lo, map mikuisi kikau bibou mpia kimbas ug e.

³³Gino mindhe-ndhe dini yok ingut hi cut ei yeng dihyeiti lene map mikui mun di jo ei yeng dihyei dimati hagom. Gima rino suar itam ide yeng dihyei dima binnir-wap hak drek dip mun di cut ei niti dima.

³⁴Gino hi siber minyei leu yeng dihyei dima bindei njita ugwai-gwai lene map mikui njita dimati cem. Lene map mikui minyei di jo eisi cem.

³⁵Gino mindhe-ndhe di map kuisi ingut hi cut bingget mun nyeng hi lene mibindei ba, map kuisi. Gino hi cut bingget yeng dihyei kin komfor di iba igtuyap bibon lene suar itam mun dima hagom binnir-wap hak.

³⁶Ne gino mindhe mai hi cut bingget minyei bousi kin bak minyei lene mibindei ba, map kui gima yokti bi. Noro tut mun nyeng nindigsi lene map mikui hagomti.

³⁷Gino ingut hi cut bingget njita ngan di ibet ei mem ibigimahap ei dihyeiti lene mun dima mibindei map kui njita ngan dimati bi.

³⁸Ne gino mindhe mai hi cut bingget njita ngan di itur ei minyeiti biles lene mun dima mibindei ba, map kui njita ngan dimati.

³⁹Gino mindhe-ndhe di dice tut gi jiyem ninghui dima nonti mai lene map mikui no di ngget ningutti kikau bibou mpia kimbas ug e.

⁴⁰Suar no di yem mindhe dima ninghui ndrim hi ba minyei bitot nide sinsun leu lo, map mikui noti kikau bibou mpia kimbas ug e.

⁴¹Ma jiyem mindhe-ndhe nimien-digau nya kin mun ham nya di ijjei nyahan ei dihyei ninjek dip,

⁴²kin mun di iba inghop bijjei dihyeisi nok wou nya kin mun di ibon imig bitai di idor-dor nyen ei dihyei njek dip nok mipigig nya kin mun di ibon imig mang bibor nok awe nya au.

⁴³Ma jibindei map kui jeti tug hon gima jiyem mindhe-ndhe dini yok au.

⁴⁴ Dani ne TUHAN bidinok jide Allah ri. Gima rino suar jikinding jenti bijikwes-kwau lewo Dani dikwes-kwau.

⁴⁵Dani ne TUHAN rin ba, dibuwak je kwei leu minu Mesir leu binhyepo jikuk je biDa. Suar jikinding jenti bijikwes-kwau lewo Dani dikwes-kwau.

⁴⁶Nicuk jeti dini hagom ne nicukti tut mindhe-ndhe nya kin ha nya kin mun di ha minyei nya kin mun dijjei nyahan ei dihyei ninjek dip nya hagom ri.

⁴⁷Suar jimig mbus mun di kwes kei nya kin mun di map kuisi nya bijo ter leu yam. Suar jimig mbus mindhe-ndhe di kei mem gima jiyem inghui kin gi hi di kinei nya bijo ter leu yam.”