Read Hatam IMAM NYA IDE MIDYAI 14 Bible Online

IMAM NYA IDE MIDYAI 14 - Hatam bible

IMAM NYA IDE MIDYAI 14

² tut nibon midut nibiyai inghuisi kwesti niabiati tungwagom kei hanyen leu bras mbrei di yem noni. Ma ibuwak no dima kwei ndam imam mem njap dino imam misimbot dat bipia map kui noti bu bi.

³Lene ma imam dima buwak no dima ug ei mben Israel ide prak meng yati dima nisai bingig niyai kep noni. Gino bras mbrei dima pren leu noni,

⁴lene ma imam dima cuk no dima bikrau ha di kwes di myaijo can ba, rop buwom ttou gom ba, kos mong ngwoi nikomti gom cem hai minta hisop nintam gom cem kwei.

⁵Lene ma imam dima cuk no dima bipia kos haba gom nikimam gau dibijig di itau minyei leu minyei bousi eisi.

⁶Lene ma noni bikrau kin haba gom bu bitur tut niyaisi kin buwom ttou gom kin mong ngwoi gom kin hisop gom pima ei ha ninggrom di srig minyei pimati.

⁷Lene ma noni ba ninggrom dima biprok no di miyai nibon midut ninghuisi kwes hanyenti leu bras mbrei di yem noni mbimuhwindacan leu api simbot dat bipia no dima kei su. Lene ma noni kes ha di niyaisi jo bimba ug ei ngoi dumti.

⁸Lene ma no dima ba minyei bitot nide sinsun ba, kak nibou cem kek minyeiti cem bibindei ba, map kui noti bu bi. Lene ma isindui sut noni bingkwei hanyen kwei ei ide prak meng yati dima bibong ser nide prak meng lo, hei-hei nyen au bibou njap muhwindacan ngwig ug e.

⁹Lene ma noni kak nibou kin nuhui nta kin niyai nggrop nta kin ninta-nta nindigsi di hei bidem ningkek dip hagom cem lene ba minyei bitot nide sinsun ba, kek minyeiti cem mem njap gi nimuhwindacan bibindei ba, map kui noti bu bi.

¹⁰Lene ma noni jem domba pmot nikre ningut can kin niwek ningut gom di ide njap ug ei ari bingwam gom ba, bok-ba bi kwei ba, ttei tepun di mini zaitun srigsi kilo ningai kin mini zaitun ningei liter niken kwei mem njap gi nimuhwindaningai.

¹¹Lene imam dima mibuwak no dima bitut mun di noni ttei kwei dima hagom biya kui dimbou ei TUHAN De Prak Meng nuhuigya.

¹²Lene ma imam dima yai domba pmot nikre ningut gom bitut mini zaitun niken ba, yok ei mem nibon midut nibikum Allah de ningwam. Lene ma noni pigig sut mun di bon ninyeng ei TUHAN niyai him dini ei mem imam dima.

¹³Lene ma imam dima bui domba pima ei mpia ttou nsi di kwes di ibui mindhe mem nibon midut nibiyai nikos ser sisarti kin nibon midut nindig mindhe titut kep humti eisi. Suar noni yai nok gima lewo mindhe di mem nibon midut nibikum Allah de ningwam kwes-kwau bibor noyam kin mindhe mem nibon midut nibiyai nikos ser sisarti pima lene ninghui mijo mem imam nya igyem.

¹⁴Lene ma imam dima hek domba ninggrom poi mien bitur ninda pijum eisi bibingget no dima nitingou meng kin nindapmem kin nimig ndapmem bei ninda com.

¹⁵Lene ma noni hug mini zaitun pima poi mien ei nonti ninda biabei ei ninda prak.

¹⁶Lene tur ninda pijum eisi ba, bimpug TUHAN De Prak Meng mbimuhwindacan.

¹⁷Lene ma noni yai mini zaitun ei ninda bia bei bisrig domba pmot ninggrom pimati lene ba ninda pijum bingget no dima nitingou meng kin nindapmem kin nimig ndapmem bei ninda com.

¹⁸Lene ma noni siber mini zaitun ei ninda bia bei niken ug ei no dima nibou nggram him. Tug hon nisinati dima lene imam mibon midut niyai ninghuisi kwes hanyen.

¹⁹Lene ma imam dima bui mindhe mem nibon midut nibiyai nikos ser sisarti leu binhyepo bindei ba, map kui no dimati bu bi. Gima ngwig lene ma noni bui mindhe mem nibon midut nindig mindhe titut kep humti,

²⁰bindig kep hum bitut njita nibipai sigyo bak Allahti ei nimbar hum dokti. Tug hon nisinati dima lene imam mibon midut niyai ninghuisi kwes hanyen di bindei ba, map kui no dimati bu bi.

²¹Ne gino no dima nuhui mbum ba, ttei mun dini yok hagom kwei bak imam mem nibon midut ninghuisi kwes hanyenti dima kan bi lene ma noni jem domba pmot nikre ningut gom kwei nok mun di bon ninyeng mem nibon midut nibikum Allah de ningwam mem imam dima. Lene ma noni kon tepun di mini zaitun srigsi kilo gom kin mini zaitun ningei liter niken kwei.

²²Lene ma noni krau ha tekukur e, he hakimoi mbrei ningut can e, kwei. Haba gom mem nibon midut nibiyai nikos ser sisarti lene haba gom bu mem nibon midut nindig mindhe titut kep hum.

²³Ma noni kon mun dini yok hagom kwei biyai bak imam kui dimbou heisi ei TUHAN De Prak Meng mem njap gi nimuhwindaningai ei nijam di bindei ba, map kui noni bu bi.

²⁴Lene ma imam dima yai domba pmot bitut mini zaitun lene pigig sut hacem ei nok mun di bon ninyeng ei TUHAN niyai him bijo ei mem imam dima.

²⁵Lene ma noni bui domba pmot behek ninggrom poi mien lene tur ninda pijum eisi bibingget no dima nitingou meng kin nindapmem kin nimig ndapmem bei ninda com cem.

²⁶Lene ma noni hug mini zaitun pima poi mien ei nonti ninda biabei ei ninda prak.

²⁷Lene tur ninda pijum bei ninda com eisi bibiprok TUHAN De Prak Meng mbimuhwindacan.

²⁸Lene ma noni ba mini zaitun poi mien di jo nindati bingget mun po noni ba domba ninggrom bingget pima nok no dima nitingou meng bei ninda com kin ninda pmem bei ninda com kin nimig ndapmem bei ninda com.

²⁹Lene ma noni siber mini zaitun niken di jo ei ninda bia bei ei no dima nibou nggram him. Tug hon nisinati dima lene noni mibon midut niyai ninghuisi kwes hanyen.

³⁰Lene ma noni kos hakimoi pima gom nikimam.

³¹Gini mem nibon midut nibiyai nikos ser sisarti. Lene ma noni kos hakimoi hiter mem nibon midut nindig mindhe titut kep humti bitut njita nibipai sigyo bak Allahti. Tug hon nisinati dima lene noni mibon midut gi ninghuisi kwes.

³²Gini ne nicukti tut nibon midut gi ninghuisi kwes mem no di nuhui mbum di bras mbrei yem lo, gimbun mem noni ttei mun pima yok hagom kwei kan bi ri.

³³Lene TUHAN pai nihyet bak Musa kin Harun,

³⁴tut ig di nisgwa nut yem. Nicukti dini yok mimbut mem nijam di mben Israel icoi ug ei minu Kanaan di TUHAN yai biyok nok ide.

³⁵Gino ig ceu gom ngat nisgwa nut di yem nide ig lene ma noni pai sut bak imam.

³⁶Lene ma imam dima cuk ig ceu bipia ug kon nide ndigban hagom ug ei nisai nipou ug e leu api imam dima micoi ug ei ig bei bingig niyai kep. Gi bi lene imam misimbot dat bipia map kui ndigban dima hagomti.

³⁷Tirigi imam ngig niyai kep nisgwa nutti dima bingat lo, niwer nimahaisi kin ningwoisi dima yem dring bidem kep nok prap yem dring lene,

³⁸ma imam dima hei ug ei nisai binggam mbou bingkiem-kiau kikau mem mmun-njap muhwindacan.

³⁹Lene ma noni kwei hanyen mem njap gi nimuhwindaningai bingig niyai kep mbigom kin bu. Gino ngat lo, nisgwa nutti dima kieng kep dring,

⁴⁰lene ma noni cuk ig ceu bibei tig di nisgwa nutti yem dima bicom hagom ug ei mpia ttou nsi di map kuisi ei ngug sai leu ide prak meng yati dima.

⁴¹Lene ma noni cuk ig ceu bikak dring plester ei ig bei dima nidip hagom leu leu api com ninnir hagom ug ei mpia ttou nsi di map kuisi ei minu ndig dima nisai.

⁴²Lene ma ig ceu ba tig nijep biluei tig di sgwa yem pima. Lene ba plester nijep biluei plester di sgwa yem pima bu.

⁴³Gino ig ceu dima bei tig ba, kak plester di nisgwa nutti yem cem leu lo, nisgwa nutti dima yem ig dima bikieng kep dring hanyen,

⁴⁴lene ma imam dima ngig niyai kep ig dima mbigom kin bu. Gino sgwa dima yem ig hanyen lene gima bindei ba, map kui ig dimati tu.

⁴⁵Suar tungwatu inggek ig dima bingwig bikon tig kin biei kin plester hagom bicom ug ei mpia ttou nsi di map kuisi ei minu ndig dima nisai.

⁴⁶Tungwa tou rino micoi ug ei ig bei dima nipou tirigi inggek ig bigyo lene map mikui noni kikau bibou mpia kimbas ug e.

⁴⁷Tungwa tou rino bong ser ig bei dima ba, yem njita eisi nipou tirigi inggek ig dima bigyo lene ma noni ba minyei bitot nide sinsun.

⁴⁸Gino imam dima kwei ngig niyai kep ig dima ei niabiati tirigi ig ceu ba plester nijep bihwen hanyen tu lene ngat lo, nisgwa nutti dima yem ig dima bu bi lene ma noni simbot dat bipia map kui ig dimati bu bi. Lewo ig ceu kak plester bitut nisgwati hagom bingwig bihigom tu.

⁴⁹Lene ma imam dima bon midut di bindei ba, ig dima kwes hanyen tug hon nisinati dini. Ma noni krau haba can ba, rop buwom ttou gom lene kos mong ngwoi nikomti gom ba, hai hisop nintam gom cem bikwei sut.

⁵⁰Lene ma noni kos haba gom nikimam gau dibijig di itau minyei leu minyei bousi eisi.

⁵¹Lene ma noni yai buwom ttou kin hisop kin mong ngwoi bikrau ha gi nican bitut niyaisi bitur hagom ei ha di noni kos dima ninggromti ba, bitur ei minyei pimati cem. Lene ma noni biprok ig bei dima mbimuhwindacan.

⁵²Tug hon nisinati dima lene noni mibon midut ig di kwes tug hon ha ninggrom kin minyei leu nibousi kin ha di niyaijo kin buwom ttou kin hisop kin mong ngwoi.

⁵³Lene ma imam dima kes ha di niyaijo bimba ug ei ngoi dumti ei minu ndig dima nisai. Tug hon nisinati dima lene noni mibon midut nibindei kwes ig dima hanyen leu binhyepo bindei ba, nipuig kwes.

⁵⁴Gini ne nicukti tut bras mbrei di yem tungwatu nya,

⁵⁵kin nisgwa nutti di yem sinsun kin ig cem,

⁵⁶kin buhwei di com tungwatu nya kin yoni ingkek dip di nonti bok bidwoi ri.

⁵⁷Nicukti dini yok ndo igbit mun di pwoi kei kin mun di map kuisi.