Read Hatam IMAM NYA IDE MIDYAI 16 Bible Online

IMAM NYA IDE MIDYAI 16 - Hatam bible

IMAM NYA IDE MIDYAI 16

¹Niabiati Harun nipmot bat cin itug ndei hukum nimai drek dip gi imbut tut hum di igbit TUHAN ningon kanti bi lene TUHAN pai bak Musa,

²“Ma acuk akindig di Harun bipia coi ug ei Ninsi Di Kwes-Kwau di jo sinsun mbrawin nite dima kwei dem igbit tto bou di dipreu ei mem noni tu he. Lewo dindo Danti tug hon bumbuhui di nggai kep ser Da ei nai Brua Gi Preu nibeng dip ei sirima. Leu gino noni bit gi dicuk nati dini bi lene noni mimai drek dip.

³Suar Harun jem sapi nikre di nehen pap ningut gom kwei mem nibon midut nibikos ser sisarti. Lene ma noni jem domba nikre ningut gom kwei mem nibon midut nindig mindhe titut kep humti. Gima hagom ngwig lene midice tut gima noni coi ug ei Ninsi Di Kwes-Kwau.”

⁴Leu api suar Harun so kep yok tut nidimigsi dini. Nipou tirigi Harun coi ug ei Ninsi Di Kwes-Kwau bigyo lene ma noni kek minyeiti nipou ug e leu api juk nide sinsun ndok di jei kin sinsun nimig cun kin mun di noni bikri kep nintig bou kin topi di inap leu minyahas linen pima hagom.

⁵Lene ma mben Israel ijem mindhe kwei bikes ei Harun nindati nok gini. Ma ijem kambir nikre ningut can kwei mem nibon midut nibikos ser sisarti ba, ijem domba nikre ningut gom kwei mem nibon midut nindig mindhe titut kep hum.

⁶Lene ma Harun bui sapi nikre ningut gom mem nibon midut nibikos ser nide sisar kin nide bat nya ide sisar cem.

⁷Lene ma noni jem kambir ningut can pima ug ei Ditde Prak Meng nuhuigya.

⁸Ei sirima lene ma noni ba tig njep can pima biko binggok tut kambir nya. Leu api noni pas inyeng ei tig njepti nok gini “mem TUHAN” ei gi di hiti lene “mem Azazel” ei gi di hiti.

⁹Lene ma Harun bui kambir gi hi di noni ko binggok tut mem TUHAN nok nibon midut nibikos ser sisarti.

¹⁰Lene ma noni kes kambir di mem Azazel pima biya ei Doho bei tut niyaisi leu api jji kambir dima ug ei iggum ndigsi ndam Azazel leu binhyepo dikos ser mben Israel ide sisar.

¹¹Tirigi Harun bui sapi nikre pima mem nibon midut nibikos ser nide sisar kin nide bat nya ide sisar,

¹²lene ma noni ket hum mbom leu nimbar hum dokti ei bokor gomti buut bikwei sut lene kam biei nggrai di ui-gwang kei mbican ei ninda bia bei leu api bimbut tut ug ei Ninsi Di Kwes-Kwau.

¹³Lene ma noni ndig biei nggrai di ui-gwang kei dima ei hum mbomti ei Doho bei leu binhyepo nimmup di brou kui binggai kep ser Brua Gi Preu nibeng ba, bit bon Harun ngat nibeng bou niyai him bimai bi. Leu gino noni ngat lene noni mimai.

¹⁴Lene ma noni tur ninda pijum ei sapi pima ninggromti bigimahap bei Brua Gi Preu nibeng leu api bigimahap bei nuhui cem mbimuhwindacan.

¹⁵ Gima ngwig lene ma Harun bui kambir mem nibon midut nibikos ser mben Israel ide sisar leu api hek ninggrom poi kwei ei Ninsi Di Kwes-Kwau bigimahap Brua Gi Preu nibeng kin nuhui cem bit leu nok niyaisi tug hon sapi nikre ninggrom pima.

¹⁶Tug hon nisinati dima lene noni mibon midut di bindei ba, Ninsi Di Kwes-Kwau dia-diau kei leu binhyepo map di tug hon mben Israel ide sisar mikui ninsi dimati bi. Suar Harun kinding Ditde Prak Meng ninsi nindigsi nya nok gima cem lewo Prak Meng niyati dima ya hacan ei mben Israel ide prak meng nya di map kuisi.

¹⁷Hon tirigi Harun coi ug ei Ninsi Di Kwes-Kwau bibon midut nikos ser sisarti kikau ba, noni hei hanyen kwei leu lene ma nindigsi nya icoi ug ei Ditde Prak Mengti au. Tirigi noni bon midut dima gau nonti kin nide bat nya kin mben Israel yahagom tu,

¹⁸lene ma noni hei biya kui nimbar hum dok lene bon midut di bindei nimbar dima cem dia-diau kei. Ma noni hek sapi nikre kin kambir pima ninggrom poi bibidip nimbar hum dok ninggai di tug nuhuisi bitai dima.

¹⁹Lene ma noni su ninda pijum ei ninggrom pimati bigimahap nimbar ningat mbimuhwindacan. Tug hon nisinati dima lene noni mibon midut di bindei nimbar dia-diau ba, mben Israel ide map kuisi bu bi.

²⁰Tirigi Harun bon midut di bindei Ninsi Di Kwes-Kwau kin ninsi nindigsi ei Ditde Prak Meng kin nimbar hum dok hagom dia-diau kei bingwig leu su lene ma noni jem kambir po mem Azazel pima kwei ei Doho bei.

²¹Lene ma noni yok ninda hacem ei kambir nibou nggram him bipai jit mben Israel ide mun di kinei kin ide sisar kin ide naham nimbuk kep Dati hagom leu binhyepo kes hagom bijo ei kambir dima nibou dip. Gima ngwig lene ma tungwagom di imam ndo nipou su jem kambir dima ug ei nisai bijji kikau ug ei iggum ndigsi.

²²Nok gima lene kambir dima mibiang mben Israel ide sisar hagom buug sut ei iggum ndigsi.

²³ Lene ma Harun coi hanyen ug ei Ninsi Di Kwes bijuk sinsun imam po juk kikep nipou tirigi coi ug ei Ninsi Di Kwes-Kwau bigyo pima leu noni bijo ei sirima.

²⁴Lene ma noni kek minyeiti ei mpia di kwes leu api juk nide sinsun hanyen. Gima ngwig lene ma noni hei ug ei nisai bibui mindhe hi mem nibon midut nibikos ser nide sisar ba, bibui mindhe hi mem nibon midut nibikos ser mben Israel ide sisar cem.

²⁵Lene ma noni ndig mindhe-ndhe di noni bui mem nibon midut nibikos ser sisarti pima nimmau hagom ei nimbar hum dokti.

²⁶Lene ma no di jem kambir bijji ug ei iggum ndigsi ndam Azazel pima cem tot nide sinsun bikek minyeiti nipou tirigi noni ngkwei hanyen ei mben Israel ide prak meng yati bigyo.

²⁷ Lene ma imam nya ikon sapi nikre kin kambir po ibui mem nibon midut nibikos ser sisarti po Harun hek ninggrom bicoi ug ei Ninsi Di Kwes-Kwau mem gima piap sisar pima ingkek kin inghui kin inak hagom ug ei mben Israel ide prak meng yati nisai bindig hagom kep hum.

²⁸Lene ma no di ndig mindhe-ndhe dima kep hum cem tot nide sinsun bikek minyeiti nipou tirigi noni ngkwei hanyen ei mben Israel ide prak meng yati bigyo.

²⁹ Suar mben Israel ibit dicuk yokti dini bijo ninno bijo kikau. Ug ei njap gi nisimnai ei bed gi nimuhwindacan lene ma yoni kin ngkiai nya di ibong bit yok yahagom isindui njita mem nituti poi lene inda jo kep ide midyai nya cem au.

³⁰Gino njap dima dem tu lene ma imam bon midut nibikos ser ide sisar hagom mem yok leu binhyepo map kui yokti bu bi.

³¹Njap dima ne njap nindig rin dem kep nok jide Njap Nigwam Kep Ninghuisi. Suar mben Israel yahagom isindui njita mem nituti poi ei njap dima lene inda jo kep ide midyai nya au. Suar mben Israel ibit dicuk yokti dini bijo ninno bijo kikau.

³²Ma Imam Nibou Ndig di jita ba, jidimig noni ei biya luei nicig dima nongkom bon midut nibikos ser sisar dima. Suar noni juk sinsun imam pima,

³³leu api bon midut di mibindei Ninsi Di Kwes-Kwau kin ninsi nindigsi ei Ditde Prak Meng kin nimbar hum dok kin imam nya kin mben Israel hagom dia-diau kei hanyen.

³⁴Suar mben Israel ibit dicuk yokti dini bijo ninno bijo kikau. Ma imam bon midut nibikos ser mben Israel ide sisar hagom mbigom mem ari bingwam gom lene nok. Gima rino Musa yai hagom bit leu nok TUHAN nicuk noti.