Read Hatam IMAM NYA IDE MIDYAI 17 Bible Online

IMAM NYA IDE MIDYAI 17 - Hatam bible

IMAM NYA IDE MIDYAI 17

¹TUHAN cuk Musa,

²biyai nicukti dini yok bak Harun kin nimunggwom bat nya kin mben Israel yahagom.

³Gino mben Israel gom bui mindhe nok nide sapi e, he domba e, he kambir e, bak TUHAN ei mben Israel ide prak meng yati kin prak meng yati nisai cem,

⁴lo, jem mindhe dima kwei bak TUHAN biya tut kui dimbou ei TUHAN De Prak Meng nuhui bi lene no dima ba ninggrom di kiber dima bipigau TUHAN nikos tutti nya. Suar jibibon no dima tereu nok no di nggre kin Allah de limwa nya bu bi.

⁵Gima ne TUHAN ningon kanti tut nicukti dima rin leu binhyepo mben Israel ijem mindhe-ndhe nikwas di ibui kep ei ngoi dumti hagom ug ei TUHAN De Prak Mengti. Suar ijem mindhe di ikwas dima bak imam ei dimbou TUHAN De Prak Meng nuhui ba, ibui ei sirima mem nibon midut nibiyai ningon kwes kin Allahti.

⁶Lene suar imam ba mindhe ninggrom biprok nimbar hum dok nitta ei bei dimbou TUHAN De Prak Meng nuhui leu api ndig nimmau kep hum bibindei ba, TUHAN mijoi sut ninghap di ngge kei dima.

⁷Suar mben Israel igyai ingon gom bak TUHAN kikau lene ma ibui mindhe-ndhe ei ngoi dumti nya mem ibikuk yok bak nung di isibut nya au. Suar ibit nicukti dima bijo ninno bijo kikau.

⁸Gino mben Israel gom e, he ngkiai gom di bong timiei ei mben Israel ikieti e, ikwas mindhe mem nibon midut nindig mindhe kep humti kin nibon midut hiterti cem,

⁹tut TUHAN lene suar noni bui mindhe nikwas dima ei bei dimbou TUHAN De Prak Meng nuhuigya. Gino noni bui mindhe dima ei mpia ttou nsi hiter lene ma jibibon noni tereu nok no di nggre kin Allah de limwa nya bu bi.

¹⁰ Gino mben Israel gom e, he ngkiai gom di bong timiei ei mben Israel ikieti e, yem mikwau di ninggrom huisi lene TUHAN mikes hukum ei no dima dip. Ma jibibon no dima tereu nok no di nggre kin Allah de limwa bu bi.

¹¹ Bikwop mindhe di ninnei tau nuhwap nsi hagom ninnei no jo ei ninggromti. Gima rino TUHAN cuk mben Israel leu binhyepo iba mindhe-ndhe ninggrom hagom biprok nimbar hum dok nidip leu binhyepo bidip tut Nide limwa nya ide sisar hagom. Ninggrom ne ninnei rin ba, ciu ser sisar.

¹²Gima rino harin dima mben Israel kin ngkiai nya di ibong timiei ei mben Israel ikieti cem igyem mikwau di ninggrom huisi a.

¹³Gino mben Israel gom e, he ngkiai gom di bong timiei ei mben Israel ikieti kat ha kin mindhe-ndhe hiter cem di dipigig ser bi lene suar no dima bindei hei mindhe dima ninggrom ei dihyeisi leu api tig dihyei kep.

¹⁴Bikwop mindhe di ninnei tau nuhwap nsi hagom ninnei no jo ei ninggromti. Gima rino TUHAN ggai ser mben Israel dima igyem mikwau di ninggrom hugsi a. Bikwop no di yai kep niyai munti di TUHAN ggai ser dini lene ma ibibon noni tereu nok no di nggre kin Allah de limwa nya bu bi.

¹⁵Bikwop mben Israel gom e, he ngkiai gom e, di yem mindhe di nonti mai ei ninghui kin mindhe di mai drek dip mindhe di niten-pos di ttem ninghui lene suar no dima tot nide sinsun bikek minyeti tut. Suar noni gwam kikau ug bipek mpia nicutti kep leu api map kui noti bu bi.

¹⁶Gino noni bit nicukti dima bi lene suar biang niyai munti dima nibuhunti.