Read Hatam IMAM NYA IDE MIDYAI 18 Bible Online

IMAM NYA IDE MIDYAI 18 - Hatam bible

IMAM NYA IDE MIDYAI 18

¹TUHAN cuk Musa,

²bipai sut nicukti dini bak mben Israel, “Dani ne TUHAN ba, jide Allah ri.

³Harin dima jiyai bram timiei minu Mesir po mpia di jibong eisi nipou pima kin timiei minu Kanaan di mpia di nogindini dibuwak je ug eisi dima igyai kepti nya a.

⁴Ma jipwoi dingon ba, jiyai igbit diggai serti nya. Dani ne TUHAN ba, jide Allah ri.

⁵ Ma jibit dimbrap tutti nya kin diggai serti nya di diyai bak jeni. Gino jiyai nok gima lene jingwes ngun. Dani ne TUHAN ri.”

⁶Lene TUHAN tri tut nicukti dini. Harin dima ayem njita tut tungwagom leu ade adig-ajoi nya a.

⁷Harin dima aba niyem njita tut apmemti biyai nimmai bak acig-apmem cem a.

⁸ Harin dima aba niyem njita tut acig nitnem bat nya bihi biyai nimmai bak acig a.

⁹ Harin dima ayem njita tut akwohop kin akwohop ndrim di nicig ter di ndig ei ig bei gom bit na kin gi hi di ndig ei ig bei hiter cem a.

¹⁰Harin dima ayem njita tut agnyon bat nya a. Leu gima abiyai nimmai bak nanti.

¹¹Harin dima ayem njita tut akwohop di jicig ne jicig gom rin lo, nipmem ter a. Nok gima cem harin dima ayem njita tut no di jipmem ne jipmem gom rin lo, nicig ter a. Lewo noni ne akwohop hi ri.

¹² Harin dima ayem njita tut acig nikwohop a. Lewo ajem noni apmem mien.

¹³Harin dima ayem njita tut apmem nikindig-nikinjoi sop nya a. Lewo ajem yoni apmem bat nya ri.

¹⁴Harin dima ayem njita tut apmum nitnem a. Lewo ajem noni apmem.

¹⁵ Harin dima ayem njita tut agnyot a. Lewo noni ne apmot nitnem ri.

¹⁶ Harin dima ayem njita tut akindig nitnem a.

¹⁷ Harin dima ayem njita tut sop po ayem njita tut nipou su pima nipmisop kin nidrot sop a. Leu gino yoni itig mbier tut na lene nibon munti dima kei bi.

¹⁸Harin dima awak atnem nide adig-ajoi nya gino atnem no niyaisi jo yo a.

¹⁹ Harin dima ayem njita tut sop gom mpe di ningkek kan mun a. Lewo no map kui noti yo.

²⁰ Harin dima ayem njita tut hiter nitnem a. Abon munti dima bindei ba, map kui nati.

²¹ Harin dima akes amunggwom bat hi ei mem gima ibui ba, ibikuk yok bak kwar Molokh a. Lewo nibon munti dima binim kep TUHAN di nok jide Allah ninyenga.

²² Harin dima pinai hi yem njita tut pinai hi a. Lewo Allah kou sut nibon munti dima.

²³ Harin dima pinai nya kin sop nya igyem njita tut mindhe a. Lewo nibon munti di sibut dima bindei ba, map kui jeti.

²⁴Ma jibindei ba, map kui jeti drek dip nibon munti dima yok au. Lewo yo di ibong ei minu Kanaan nipou jeni bigyo ibindei ba, map kui yokti tug hon igyai kepti dima. Gima rino TUHAN jji yok leu itimieisi leu binhyepo jiya luei yohoti bu.

²⁵Map kui ide dihyeiti drek dip igyai munti di kinei bibor dima. Gima rino TUHAN kes hukum ei yo dima dip apino rok yok bijji yok leu ide dihyei dima.

²⁶Noro suar jibit TUHAN de nicuk jeti nya kin nikos tutti nya. Harin dima ngkiai di ibong timiei ei jikieti ibon kep nibon munti di kinei bibor dima a.

²⁷Lewo yo di ingat rin ei minu dima nipou jeni bigyo dima ibon kep igyai munti dima hagom leu api map kui ide dihyeiti drek dip.

²⁸Gino jibindei map kui jide dihyei dimati lene TUHAN mirok je bijji je leu jide dihyei cem noyam kin timiei minu Kanaan po rok yok bijji yok leu ide dihyei pima.

²⁹Jikan tut bipia tungwa tou rino bon mun di bindei tungwatu igyai ngkek ttin ser dima nggre kin Allah de limwa nya bu bi.

³⁰Gima rino TUHAN pai “Ma jibit dicuk jeti nya di diyai bije lene ma jiyai bram yo di ibong ei minu Kanaan nipou jeni bigyo nya igyai kepti nya au. Ma jibindei ba, map kui jeti tug hon nibon munti dima yok au. Dani ne TUHAN ba, jide Allah ri.”