Read Hatam IMAM NYA IDE MIDYAI 22 Bible Online

IMAM NYA IDE MIDYAI 22 - Hatam bible

IMAM NYA IDE MIDYAI 22

¹Lene TUHAN cuk Musa,

²bipai sut nicukti dini bak Harun kin nimunggwom bat nya “Ma jinyohou dimig mun di mben Israel ibikuk yok bak Dani pijum ei nok gi igbit. Leu binhyepo jibimangkrei dinyeng di kwes-kwau bi. Dani ne TUHAN ri.

³Gino jigom di ntun Harun him di map kui noti dideu mun di kwes di mben Israel ibikuk yok bak Dani lene harin dima no dima yai midyai nok imam ei nimbar hum dokti bu a. Nicukti dima bijo ninno bijo kikau. Dani ne TUHAN ri.

⁴Harin dima jigom di ntun Harun him di bras mbrei yem kin no di nggwen nikei bisi di bindei hei nuom dima yem munkwas di kwes a. Nok bibou nindigsi nya isimbot dat bipia no dima pwoi hanyen ug e. Gino noni ngget nimai ngut ba, nide minyei hei kwei cem lene map kui noti drek dip.

⁵Gino noni ngget mindhe-ndhe kin tungwatu di map kuisi lene map kui noti cem drek dip.

⁶Bikwop no di map kui noti tug hon nisinati hi gom hi gom lene ma gwam tut map di kui noti dima kikau ug bipek mpia nicutti kep. Tirigi mpia cut leu su lo, kek minyeiti bigyo lene ma noni yem njita di kwes di ikwas tut TUHAN dima au.

⁷Tirigi mpia cut leu su ba, noni pwoi hanyen tu lene disindui sut ba, noni yem njita di kwes pima ug. Lewo gima ne nide njita di yem kep ninggum ri.

⁸Harin dima jigom yem mindhe-ndhe di mai ei ninghui kin gi hi di mai tug hon mindhe di niten-pos di ttem ninghui a. Gino yem lene map kui noti. Dani ne TUHAN ri.

⁹Suar je di imam jahagom jibit nicukti nya dini di ditri tut bak jeni. Gino jibit bi lene jitunggwei sut ba, mijimai drek dip lewo jitunggwei sut nicukti nya di kwes dima yok. Dani ne TUHAN rin ba, dinyeng tak kep jeni pijum.

¹⁰Ma je di imam kin jide ig bei nsi nya he jiyem njita di limwa nya ikwas pijum tut Dani. Harin dima hiter kin no di bong bit jeni kin no di tug ndei nimuhup tug hon midyai di yai mem jeni igyem njita nikwas dima a.

¹¹Noro awak nya di imam ba mitiei biwim nya kin awak nya di isrek ei nide ig lene disindui sut ba, igyem kep njita nikwas di imam ma bou no dima.

¹²Harin dima imam nipmisop di wak tungwagom di nok imam bi yem njita nikwas dima a.

¹³Noro tut nipmisop di wer kibom tu kin gi hi di nijjep kes ei di bon nimunggwom hi bi di ngkwei hanyen bibong bit nicig ei nide ig ba, nicig ninyeng tak kep lene disindui sut ba, yem njita nikwas di je di imam jima bou je dima ug. Jide ig bei nsi nya he rima igyem njita nikwas dima.

¹⁴Gino tungwagom di nggre kin jide ig bei nsi nya bi yem njita nikwas di limwa nya ibikuk yok bak TUHAN dima kin gi bisinggre bi lene suar noni luei njita dima hanyen bak imam. Lene ma no dima ngkwei ningat can leu ningot gom lene nok bikum eisi bu.

¹⁵Harin dima je di imam jibimangkrei njita nikwas di mben Israel ibikuk yok bak Dani pijum,

¹⁶tug hon gi jisindui sut ba, no di dem mem bi yem njita dima a. Niyai munti dima bindei hukum micut igkep noni drek dip ningon di mui. Dani ne TUHAN rin ba, dibindei kwes njita nikwas di ibikuk yok biDa dima.”

¹⁷Lene TUHAN cuk Musa,

¹⁸bipai sut nicukti dini yok bak Harun kin nimunggwom bat nya kin mben Israel yahagom. Gino mben Israel gom kin ngkiai gom di bong timiei ei mben Israel ikieti cem jem mindhe di ibui kep nibon midut nindig mindhe titut kep humti bit leu nipreu ei mem TUHANti ba, bit leu nijoi sutti lene suar noni jem mindhe nikre kwei,

¹⁹lo, ma mindhe dima ne nikre di kei bibor ba, bok-ba bi cem rin leu binhyepo TUHAN ningon cut hon.

²⁰ Ma jijem mindhe di bok-ba kwei ba, jibikuk je bak TUHAN au. Lewo ningon micut hon bi.

²¹Gino tungwagom jem mindhe di ibui kep nibon midut nibiyai ningon kwes kin Allahti bit leu nipreu ei mem TUHANti ba, bit leu nijoi sutti cem lene suar noni jem mindhe di kei di bon nibok-bati bi leu binhyepo TUHAN ningon cut hon.

²²Ma jijem mindhe di niyai tu kin gi nimig dahat kin gi bok-ba kin gi buhwei com di nuom kuisi kin gi ninggwenti hwen ningkek dip kin kudis yem ba, jibikuk je bak TUHAN au. Ma jiba mindhe di nok gima bikuk je bak Tuhan tug hon nibon midut njita nibipai sigyo bak Allahti au.

²³Tut mindhe di jibui bijindig kep hum bit leu jijoi sutti ne nok gino jikwas gi nitta wer kei lai-lai de lo, dwai. Noro gino jiba neheng di buhun bikuk je bak TUHAN lene Noni mice tut mindhe di nok gima bi sren.

²⁴Ma jikwas mindhe di ndia pinggin ninggrip tig di kinei kin gi ikwai leu kin gi bok binem ei bei ninsi kin gi bok bicom leu cem ba, jibikuk je bak TUHAN au. Harin dima jiyai munti di nok gima mbut ei jide minu dima a.

²⁵Ma jiba mindhe nihyen kep di jipek leu ngkiai nya bikuk je bak TUHAN tug hon nibon midut njita nibipai sigyo bak Allahti au. TUHAN ngat mindhe dima nok mindhe di bok-ba rin ba, ningon cut hon bi.

²⁶Lene TUHAN binut bu bipai bak Musa,

²⁷tut sapi pmot kin domba pmot kin kambir pmot di sindi beb ba, suar ya bit nipmem mem njap muhwindacan ug e. Njap muhwindacan dima leu ug api dem mem jibui mindhe dima kep nibon midut njita nibipai sigyo bak Allahti.

²⁸Harin dima jibui sapi nipmem kin domba nipmem kin kambir nipmem bitut nipmot ba, jindig kep hum ei njap di noyam a.

²⁹Gino jijem mindhe di jibui kep nibon midut nibipai sigyo bak Allahti lene ma jibit nicukti di jo tu. Leu binhyepo TUHAN ningon micut hon mun di jibui dima.

³⁰Ma jiyem mikwau di jibui dima ei njap dima. Ma jikes gima poi mien bijo mem njap di hyep au.

³¹TUHAN pai “Ma jibit dicuk jeti nya. Dani ne TUHAN ri.

³²Ma jibimangkrei dinyeng di kwes-kwau au. Suar mben Israel yahagom ikuk yok bak Dani nok Allah Di Kwes-Kwau. Dani ne TUHAN rin ba, dibindei jingon kwes.

³³Diteu je bijingwes ngun leu minu Mesir leu binhyepo dinok jide Allah. Dani ne TUHAN ri.”