Read Hatam IMAM NYA IDE MIDYAI 25 Bible Online

IMAM NYA IDE MIDYAI 25 - Hatam bible

IMAM NYA IDE MIDYAI 25

¹ TUHAN mbrap bit Musa ei Nungug Sinai bicuk noni,

²bipai sut nicukti dini yok bak mben Israel. Gino jicoi ug ei minu di TUHAN miyai bije lene suar jiba nisinati dini binggei sut TUHAN. Bikwop ari bingwam gi nimuhwindacan lene ma jikkin dihyei ba, jindim njita bou eisi au.

³Ma jindim njita bou ei jide miaisi ba, jipe biei anggur ninda di mui ei jide miai ba anggur kioisi nya ba, jimbus ningat di ntun jide dihyei dima him cem kikau mem nijam ari bingwam muhwindagom.

⁴Noro bikwop ari bingwam gi nimuhwindacan lene suar jikes sidumti dima pijum hak ei mem TUHAN. Ba, suar jisindui sut ba, sidumti dima jo hak ei nijam ari bingwam nitindur gom dima bijiyai miai eisi ba, jindim njita bou eisi ba, jipe jide ba anggur ninda di mui nya cem au.

⁵Gino gandum kin ba anggur di jinyohou bi nya ningat ntun him ei jide sidumti mikuisi lene ma jimbus gima yok keyam bijiyok ei mem jenti au. Lewo ari bingwam nitindur gom dima ne ari bingwam di dihyei dima bong hak kep ninghuisi ri.

⁶Mbro nok gima lo, njita ningat mintun him ei sidumti dima lene TUHAN sindui sut ba, jeni kin awak jide nya kin yo di itug ndei imuhup tug hon midyai di igyai mem jeni kin ngkiai nya di ibong timiei ei jikieti nya ba, jipuk bijiyem ningat di ntun him sindam mikuisi.

⁷Nicukti dini bitut mindhe-ndhe di jihyen kep nya kin mindhe-ndhe bigbehei di hek nya di ingat rin ei jide minu cem. Nna ba jiyem kep mun nyeng hagom di hei sindam mikuisi ei sidumti dima hak ug.

⁸Ma jikum ei ari bingwam nitindur mbimuhwindacan bram yamti sindam leu api nimangti midem nijam ari bingwam ningot bitai ba, muhwindatai.

⁹Leu api ug ei ngon bou gi nisimnai ba, bed gi nimuhwindacan di nok njap nibon midut nibiyai nikos ser mben Israel yahagom ide sisarti lene ma acuk tungwagom miep pun mbrei tirima-tirima bidem minu dima nisurti-nipekti.

¹⁰Suar jidimig ari bingwam gi ningot muhwi dima pijum ei mem nibon midut nibikwek yo di ibong bidem jide minu dima yahagom ba, igyati kwes. Lene ma jingkwei ndigban di jitri-bijipek hanyen bak niceu bat gi nimbie him nya mem ari bingwam dima. Gino niceu mai su lene jingkwei hanyen bak nide nintun him yamti di bram yam nya lene nok. Lene ma jibindei awak di juubon yok nya ba, igyati kwes hanyen bingkwei hanyen ug ei ide ig bei.

¹¹Ma jindim njita bou ei sidumti dima au. Gino gandum kin ba anggur ningat ntun him ei jide sidumti dima lene ma jimbus gima yok keyam bijiyok ei mem jenti au.

¹²Ma jidimig ari bingwam nitindur gom dima pijum ei mem jenti. Nna ba jiyem kep mun di hagom di hei mikuisi ei sidumti dima hak ug.

¹³Ei nijam ari bingwam dima lene ma jingkwei dihyei ttou nsi di jipek tu nya hagom hanyen bak dihyei ceu gi nimbie him.

¹⁴Gima rino gino jitri dihyei hanjop nsi hi bak je di mben Israel gom di jitig mbier tut yam ba, jipek dihyei hanjop nsi gom leu yam cem lene ma jiba jingon di gom bitri-bipek dihyei dima.

¹⁵Suar dihyei dima bon nibok bit leu nok ari bingwam di njita ngat mintun dihyei dima him nimangti nipou tirigi Ari Bingwam Ningkwei Hanyenti di nidipti bu dem bigyo.

¹⁶Gino jikwop lo, ari bingwam nimang ndig lene hanjop nsi dima nibok kui. Ne gino jikwop lo, ari bingwam nimangti poi mien lene ma nibok cut. Lewo gi jitri ne ningat di jike kwei leu beisi dima nimangti ri.

¹⁷Ma je di mben Israel di jitig mbier tut yam jiris yam au. Noro ma nittin tut TUHANti bindei ba, jibit jide Allah nihyet.

¹⁸Ma jibit TUHAN nikos tutti kin nicuk jeti nya hagom leu binhyepo mpia mbum-bra ei minu dima.

¹⁹Njita ngat mintun dihyei dima him apino jide njita midem mem jeni ba, jibong kei jiwam kei ei sirima.

²⁰Noro mpaba bihi ihig ingon eisi tut gino indim njita bou cem imbus ningat keyam cem bi mem ari bingwam gi nimuhwindacan pima lene igyem njita mindei ngan i?

²¹Dwai! TUHAN minjei mun di kei bak ide dihyei hanjop nsi nya mem ari bingwam gi nimuhwindagom ba, njita ngat ningat nimangti di dem mem ari bingwam nitindur ningai mintun him.

²²Mpe di jindim njita bou ei jide miaisi mem ari bingwam gi nimuhwindaningai lene njita ngat po jike kwei keyam mem ari bingwam gi nimuhwindagom pima niken no jo mem gima jiyem kep yo. Nok gima cem jide njita ngat di jike keyam ei pima midem mem jeni kikau ug bipek bed di jike njita ngat kwei keyam mem ari bingwam gi nimuhwindaningai dima kep.

²³Harin dima jitri jide dihyei hanjop nsi nya bijibipek mitiei bihigom a. Lewo dihyei dima ne jide rin bi. Noro Allah nyeng tut dihyei dima. Jeni tereu nok ngkiai nya di timiei hi sindui sut ba, jiyai miai eisi he.

²⁴Gino jitri dihyei hanjop nsi nya tut yam bijibipek mitiei lene suar jisindui sut dihyei ceu gi nimbie him ngat dima pek dihyei nide dima hanyen ei mem nonti.

²⁵Gino limwa Israel cut ei nuhui mbumti apino tri nide dihyei hanjop nsi drek dip lene suar nide bat di dideu gom pek dihyei dima hanyen hak ug.

²⁶Gino no dima bon nide bat di gwam dip di ningat-ngat hi mem gima pek dihyei dima hanyen bi noro ei nidipti bu lene noni nyeng ba, nide mitiei dem mem bipek dihyei dima hanyen,

²⁷lene suar go bak no po pek dihyei pima ba, nibok bit leu nok ari bingwam di njita ningat ntun him nimangti nipou tirigi Ari Bingwam Ningkwei Hanyenti di nidipti bu dem bigyo. Tug hon nisinati dima lene dihyei ceu gi nimbie him dima mitug ndei nide dihyei hanyen.

²⁸Noro gino noni sindem mem gima pek nide dihyei hanyen bi lene no po pek dihyei leu noni pima ninyeng tak kep dihyei dima kikau ug bipek Ari Bingwam Ningkwei Hanyenti gi nidipti bu. Ei ari bingwam dima lene dihyei dima mingkwei hanyen bak dihyei ceu gi nimbie him pima bihigom.

²⁹Gino tungwagom tri ig gom ei minu ndig di ngug tig krop ttai lene dem mem gima pek nide ig dima hanyen ei nijam ari bingwam gom. Ari bingwam gom dima ne ikwop leu njap ngon bou po pek ig dima.

³⁰Noro gino noni pek ig dima ei nijam ari bingwam gom dima bi lene dem mem gima pek ig dima hanyen kan bi. Ig dima nok no po pek ig pima kin nide nintun him yamti di bram yam nya ide kikau. Lene no po pek ig pima mingkwei ig dima hanyen ei Ari Bingwam Ningkwei Hanyenti bi.

³¹Mem ig ei minu mien di ngug tig krop ttai bi nya lene nicukti di tut dihyei hanjop nsi pima dem mem ig dima cem. Ig ceu gi nimbie him bon nisindemti mem gima pek ig dima hanyen. Lene suar no di pek ig dima ngkwei ig dima hanyen bak ig ceu gi nimbie him bihigom ei Ari Bingwam Ningkwei Hanyenti.

³²Noro dem mem gima yo di intun keret Lewi him ipek ide ig di inyeng tut nipou nya hanyen ei minu ndig di TUHAN dimig ei mem yok tu nya bit leu ijoi sutti.

³³Gino no di ntun keret Lewi him tri nide ig ei minu ndig dima gom lo, pek gima hanyen bi lene suar jingkwei ig dima hanyen bak noni ei Ari Bingwam Ningkwei Hanyentiti. Lewo yo di intun keret Lewi him ide ig ei minu ndig nya dima ne ijem bou yok nok ide kikau ei mben Israel ikieti.

³⁴Noro harin dima yo di intun keret Lewi him itri ide minta nidumti di jo ttai ide minu ndig nya a. Lewo dihyei hanjop nsi nya dima ne mben Lewi ide bijo ninno bijo kikau ri.

³⁵ Gino mben Israel gom di bong ei jikieti cut ei nuhui mbumti ba, mai ninggum rin lene suar jimpu noni noyam kin gi jimpu no di ngkiai. Leu binhyepo noni bong gingga ei jikieti.

³⁶Ma jibidip huk noni tut mun nibitem leu mun di jikwas nok ningwam tut noni au. Noro ma jittin tut jide Allah lene ma jisindui sut ba, no dima bong ei jikieti hak ug.

³⁷ Harin dima jiba mitiei di jikwas tut noni bibrim nibittem leu noni a. Harin dima jiba nibok di kak bibor bitri njita bak noni a.

³⁸Gima ne nicukti leu TUHAN ba, Noni ne jide Allah di teu je bijingwes ngun leu minu Mesir ri. Noni yai minu Kanaan bije leu binhyepo Nonti nok jide Allah.

³⁹ Gino mben Israel gom di bong ei jikieti cut ei nuhui mbumti leu api tri nonti nok awak bak jeni lene ma jibibon noni nok awak di jicuk-cuk nyen kep midyai au.

⁴⁰Suar jibibon noni nok no di bong bit jeni di tug ndei nimuhup tug hon midyai di yai mem jeni kikau ug bipek Ari Bingwam Ningkwei Hanyenti.

⁴¹Mpe dima lene ma jisindui sut ba, noni kin nimunggwom bat nya yehei leu jide ig bingkwei hanyen ndam ide bat nya kin idigup bat-idigai bat nya itimieisi hanyen.

⁴²Yo di intun mben Israel him ne TUHAN de awak nya ri. Noni rino teu yok bingwes ngun leu minu Mesir. Gima rino harin dima jitri jenti biyam nok awak a.

⁴³Ba, harin dima jiba jihyet biyai yo di intun mben Israel him di itri yonti bak jeni nok awak a. Ma jittin tut jide Allah.

⁴⁴Gino jisuar awak nya lene ma jiba mitiei biwim yok leu ngkiai nya di ibong ttai je.

⁴⁵Nok gima cem disindui sut jiba mitiei biwim ngkiai nya di ibong timiei ei jikieti imunggwom bat nya. TUHAN sindui sut ba, jima imunggwom bat nya di isrek ei jikieti dima bou je hak ug.

⁴⁶Nok gima cem Noni sindui sut ba, jimunggwom bat nya miba yok kep awak dima yok nok ide kikau. Noro harin dima juubon yo di intun mben Israel him di itig mbier tut je nok awak ba, jiba jihyet biyai yok a.

⁴⁷Gino ngkiai gom di bong ei jikieti nyeng bibor lene mben Israel gom cut ei nuhui mbumti leu api tri nonti nok awak bak ngkiai di nyeng dima ne bak nide ig bei nsi nya cem,

⁴⁸lene dem tut gima mben Israel dima nide bat hi pek noni hanyen. TUHAN sindui sut ba, nide adig-ajoi nipinai hi e,

⁴⁹he nipmum hi e, he nitom hi e, he yo di igwam-gwam yam dip di dideu hi e, pek noni hanyen. Lene TUHAN sindui sut ba, gino no dima tug ndei mitiei nok gi dem ei nidipti bu lene ma pek nonti ba, niyati kwes.

⁵⁰Suar awak dima simbot kep tut mun dini bit ngkiai di pek no tu pima. Suar yoni ikwop ari bingwam nimangti leu ari bingwam di tri nonti nok awak kikau ug bipek Ari Bingwam Ningkwei Hanyenti gi nidipti bu. Leu api ikos tut nibok mem gima bipek nonti hanyen ba, nibok dima bibit leu no di yai midyai nimuhup niyai bakti.

⁵¹Gino nijam ari bingwam gi nipou nya tirigi Ari Bingwam Ningkwei Hanyenti dima dem bigyo bijei yo lene suar ba mitiei nindig bibor bipek nonti leu gi wer awak a.

⁵²Ne gino nijam ari bingwam nya nipou tirigi Ari Bingwam Ningkwei Hanyenti dima nicunti cun bibor bidem bigyo lene suar ba mitiei lai-lai de he bipek nonti leu gi wer awak a.

⁵³Gima noyam kin no di yai midyai mem bibikwop nijam ari bingwam gom lene nok. Lene harin dima niceu ba nihyet biyai awak dima a.

⁵⁴Gino hi pek noni hanyen leu awak tug hon nisinati dima bi lene suar niceu kes noni kin nimunggwom bat nya bigyati kwes ei Ari Bingwam Ningkwei Hanyenti.

⁵⁵Harin dima juubon mben Israel hi nok awak bihigom a. Lewo mben Israel ne TUHAN de awak nya ri. TUHAN rino teu yoni bingwes ngun leu minu Mesir. Noni ne TUHAN ba, ide Allah ri.