Read Hatam IMAM NYA IDE MIDYAI 26 Bible Online

IMAM NYA IDE MIDYAI 26 - Hatam bible

IMAM NYA IDE MIDYAI 26

¹ Lene TUHAN pai “Harin dima jibon kwar bou jinda him ba, jiwin kwar kin nidihim tig di jikilis mem gima jikuk je bak a. Dani ne TUHAN ba, jide Allah ri.

²Ma jibit Njap Nigwam Kep Ninghuisi kin njap ndig nindigsi nya nicukti nya. Lene ma jiba jibou coi mem Dani ei gumihyep di jimbus pijum ei mem jikuk je bak Dani eisi. Dani ne TUHAN ri.

³ Gino jiyaijo bit leu nok dikos tutti nya ba, jibit dicuk jeti nya,

⁴lene midibindei ba, biget but mpe di jisuar biget apino njita ningat mintun jide miaisi him ba, biei ngat mintun jide biei nda nya him.

⁵Njita ningat nindig bibor mintun him jide miaisi nya apino mpe di tto bou dem mem jipuk ba anggur ngat lo, no jike jide gandum nintam hagom kin yam yo. Ba, mpe di tto bou dem mem jigimahap gandum ngan lo, no jipuk kep ba anggur ngat yo. Jide njita midem mem jiyem kep jinggum dor njiriek ba, mijibong kei jigwam kei ei jide minu dima.

⁶Midibindei ba, mpia nimbu-brati mikieng kep jide minu dima apino mijibong mai lene jittin tut jide siceu nya hi bi. Midicok tut mindhe-ndhe di niten-pos nya leu minu dima ba, nikon pranti mikieng kep jide minu bu bi cem.

⁷Mijiyai nisindemti mem jibindei timek jide siceu nya.

⁸Mijiyai nisindemti mem gima jibou muhwi he di jikon pran igkei jibindei timek ibou sratus gom. Lene mijiyai nisindemti mem gima jibou sratus gom di jikon mbrap igkei he jibindei timek ibou sribu simnai.

⁹Midinjei mun di kei bak jeni lene midibindei ba, jignyot bat kin jidrot bat nya imang bibor. Midibindei ba, gi preu po dipreu ei mem jeni pima mipek kep mem je.

¹⁰Njita ngat di mpung bipias hagau mintun him jide miaisi nya ba, mijiyem kep njita dima kikau mem nijam ari bingwam nitindur gom. Nipek kepti dima mibindei ba, jicom njita ningat gi nitimiei di jike kin yam leu leu binhyepo bon ningwakti mem gima jinju njita ningat di sindi ntun him hagom eisi bu.

¹¹Midibong ser Ditde Prak Meng di ningat rin ei jikieti. Lene midiba dingha bak jeni bihigom bi.

¹² Midingat rin bit je. Midinok jide Allah lene mijinok Ditde limwa nya.

¹³Dani ne TUHAN ba, jide Allah di teu je bijingwes ngun leu minu Mesir leu binhyepo jinok awak bu bi ri. Dibindei dahat nisindemti di co kep je pima tu leu api dibindei ba, jiyati kwes.”

¹⁴ Lene TUHAN binut bu bipai “Gino jimiap kep dihyet ba, jibit dicuk jeti nya bi ba,

¹⁵jipigau gi preu po dipreu ei mem jeni pima ba, jibit dimbrap tutti kin didimig sutti nya bi,

¹⁶lene midikes hukum ei jeni dip. Midibindei ba, mun di buhun micut igkep je. Nok nsuwer kin ningkek dut di nindig bibor di bit bon pren hanyen leu jeni kan bi. Apino gima bindei ba, jiyai tu ba, jimbriong kikau cem. Mbro nok gino jiyai miai lo, mijiyem ningat di ntun him dima bi lewo jide siceu nya mikwei bindei timek jeni bigya kep ningat di ntun him nya bingwig leu je.

¹⁷Midikes hukum ei jeni dip apino jide siceu nya mibindei timek jeni. Lene yo di isibut tut jeni nya minyeng tak kep je. Mbro nok gino hi huk je bi lo, jingon ttin apino jinang-nang wai.

¹⁸Gino hukum dima hagom cut igkep je leu su lo, jibit Dihyet bi lene midikum ei hukum di micut igkep jeti mbimuhwindacan bram yam bu.

¹⁹Jinggei-nggwang tut jenti nindig bibor noro midibindei timek je. Biget mibut bi apino jide dihyei mingak-cai bingkiem bibor tereu nok ngkimom nitu.

²⁰Mijicom jahanggwap mikuisi lewo njita ningat mintun him jide miaisi him ba, biei ningat mintun him jide biei di jita nya cem bi.

²¹Gino jaham jimbuk kep Da kikau bijibit dihyet bi lene midikum ei hukum di micut igkep jeti bu ba, micut igkep je mbimuhwindacan bram yam.

²²Midipinak mindhe-ndhe di niten-pos nya kwei ei jikieti. Mindhe-ndhe dima yok mittem jimunggwom bat nya ba, yaham jide mindhe-ndhe di jihyen kep nya bimai bingwig ba, ibindei ngwig jeni cem. Apino jimangti poi mien he. Gima hagom mibindei ba, jide puig nya tereu nok mpia di ha he bong.

²³Gino hukum dima hagom cut igkep je leu su lo, jimiap kep dihyet cem bigyo ba, jaham jimbuk tut Da kikau,

²⁴lene midimbas jeni ba, midikum ei hukum di micut igkep je bu ba, micut igkep je mbimuhwindacan bram yam ba, gima buhun bibor dor njiriek gi nipou nya.

²⁵Midibindei ba, pran di nok hukum di cut igkep je mikiju ei jikieti lewo jipigau Ditde gi preu po dipreu ei mem je pima tu. Gino jinduk yam ei jide minu ndig nya leu binhyepo jingwes ngun lene midikes nsuwer di bit bon pren hanyen leu je kan bi ei jeni dip apino jigwam lo bi di jikes jenti ei jide siceu indati.

²⁶Njita mingwig leu jeni apino sop ibou simnai isuar komfor di inon roti eisi gom ngat he mem inon roti di jo bak yoni eisi. Mbro nok gino ikwas roti dima tut je bijiyem bingwig leu lo, ninggum mihwen je kikau.

²⁷Gino hukum dima hagom cut igkep je leu su lo, jaham nimbuk kep Da kikau ba, jibit dihyet bi cem,

²⁸lene midiba dingon di sibui bittem jeni ba, midikes hukum mbimuhwindacan bram yam ei jeni dip bu ba, gima buhun bibor dor njiriek gi nipou nya.

²⁹Ninggum di buhun mihwen jeni leu api mijibui jimunggwom bat nya bijiyem kep jinggumti.

³⁰Lene midicok tut mpia di jikuk je kikep bak mun di mipror yon eisi nya di jo bidem mbigdip nya ba, midinggek jide nimbar di jindig kep biei nggrai di ui-gwang kei kikep eisi ba, midicom jide nimai ngut nya ei jide kwar di tti tu pima yok dip cem. Midiba ningon him wei,

³¹binggek jide minu ndig nya bitimek bingwig ba, midinggek jide mpia di jikuk je kikep bak mun di mipror yon eisi nya ba, midirok jide mindhe-ndhe di jibui bijindig kep hum mem nibon midutti nya cem.

³²Midibindei sar jide minu nisurti-nipekti hak apino jide siceu di ipos jide minu dima bigyati inga leu sut nisarti.

³³Midibindei kiju pran ei jide minu ba, dibindei bijintek gimahap ug ei jingkiaisi. Bohou micom jide dihyei nisurti-nipekti lene jide minu ndig di timek bingwig nya mijo hak nijoti nya.

³⁴Mpe di jibong ei jingkiaisi ei mpia di dicom je ug eisi leu lene bohou micom jide dihyei nisurti-nipekti. Nipek kepti dima mibon nituti mem dihyei dima bong hak kep ninghuisi.

³⁵Ei nijam di jide dihyei dima jo hak bitimek bingwig lene bon nituti mem dihyei bong kep ninghuisi biluei ari bingwam gi nimuhwindacan nimangti po jipigau nicukti eisi tirigi po jibong ei jitimieisi pima.

³⁶Je di jingat rin ei jingkiaisi ei mpia di dicom je ug eisi dima lene midibindei ba, jittin bibor apino hou di bong biei mengti di sigak mibindei bijinang. Mbro nok gino siceu nya ikon pran ba, yuhuk je bi lo, mijinang-nang wai. Mbro nok gino hi bindei timek je bi lo, mijicut bijikinoi-kinoi wai hak.

³⁷Mbro nok gino bihi yuhuk je bi lo, mijindrat yam bijitti ug ei dihyeisi. Ba, bit bon mijahau mem jide siceu nya kan bi.

³⁸Mijimai bijingwig ei jingkiaisi di dicom je ug eisi nya lewo minu dima mipinde je bijisar hak ug.

³⁹Jibou poi di jimai bi ba, jingwes ngun ei jingkiaisi dima ne mijikinei-kinau drek dip jide sisar kin jidigup bat-jidigai bat nya ide sisar.

⁴⁰Noro ei mpe dima lene jide nintun him yamti di bram yam nya mittin ser ide sisar kin idigup bat-idigai bat nya ide sisar. Yo dima isrep tut Da ba, yaham imbuk kep Da cem,

⁴¹apino ibindei dino dikes hukum ei yok dip ba, dicom yok ug ei ingkiaisi ei minu di ide siceu nya ide drek dip ide sisar. Gino jide nintun him yamti di bram yam nya dima yoom yonti ba, ikum ningwam di ibon bak Dani drek dip ide sisar kin ide nikiek nimig jou tut Dati cem,

⁴² lene midiyok ngon kep gi preu di dipreu ei mem Yakub Ishak Abraham nya. Midiwin Ditde nipreu ei mem yokti tut minu Kanaan ba, midingkwei minu dima bak Ditde limwa di mben Israel hanyen.

⁴³Noro suar dibindei dihyei dima noyam kin ha ngunti ba, timiei nya ibong ser bu bi nipou ug e. Leu binhyepo ningat ne dihyei dima bong kep ninghuisi hak. Lene suar Ditde limwa nya itug ndei hukum ba, ikum ningwam di ibon bak Dani drek dip gi po igibit didimigsi kin dicuk yokti nya bi pima.

⁴⁴Noro tirigi ingat rin ei ingkiaisi ei minu di ide siceu nya ide lene midikes yoni ei ba, midibindei sar yoni bingwig cem bi. Leu gino dibindei sar yok lene gima bindo bipia dibindei bitun gi preu di dipreu ei mem yok lo, Dani ne TUHAN ide Allah ri.

⁴⁵Midiwin Ditde nipreu ei mem yokti di dipreu ei mem idigup bat-idigai bat nya tirigi po dindo tut Ditde nisindemti bak ngkiai nya yahagom tug hon gi diteu Ditde limwa nya bingwes ngun leu minu Mesir pima. Gima hagom nok leu binhyepo Da di TUHAN dinok ide Allah.”

⁴⁶Nipas kepti dima rino TUHAN niggai serti kin nicukti nya di Noni sok ei Musa dip ei Nungug Sinai bak mben Israel ri.