Read Hatam IMAM NYA IDE MIDYAI 4 Bible Online

IMAM NYA IDE MIDYAI 4 - Hatam bible

IMAM NYA IDE MIDYAI 4

¹Lene TUHAN sok nihyet ei Musa dip,

²bak mben Israel bipia gino tungwagom bon sisar kin gi bisinggre bi biyai mun tunggwei TUHAN nicuk yokti nya ninyeng gom lene ma no dima bon midut nok gini.

³Gino no di bon sisar kin gi bisinggre bi dima ne Imam Nibou Ndig rin apino niyai munti dima bindei dino mben Israel yahagom ingon mui lene ma noni ndig sapi nikre di nehen pap di bok-ba bi ningut gom kep hum bak TUHAN leu binhyepo Noni mikos ser Imam dima nide sisar.

⁴Ma noni jem sapi dima kwei biya tut kui dimbou ei TUHAN De Prak Meng nuhuigya. Lene ma noni kes ninda ei sapi dima nibou dip bibui ei bei Prak Meng nuhui.

⁵Lene ma noni hek ninggrom poi buug sut ug ei Prak Meng nsi.

⁶Lene ma noni tur ninda pijum ei ninggrom pimati bibiprok bei ban mbrawin di jo ser Ninsi Di Kwes-Kwau nuhui mbimuhwindacan.

⁷Lene ma noni tur ninda pijum ei ninggrom pimati hanyen bidip ninggai di tug nimbar hum ndok mem biei nggrai ei Gumihyep Di Kwes him nuhuisi bitaisi. Lene ma noni hek sapi ninggrom niken ba, siber ei nimbar hum dok bei dimbou hui ei Prak Meng niyati dima nikiou.

⁸Lene ma noni digo sapi ninggwo hagom,

⁹kin nikimbu hacem bitut nimmau di joti nya kin nisingau igdo hi di kei bibor leu.

¹⁰Lene ma noni ndig hagom kep hum ei nimbar hum dokti bit leu nok niyai kepti tirigi po noni ndig sapi kep hum mem nibon midut nibiyai ningon kwes kin Allahti pima.

¹¹Noro ma noni kon sapi ninghui kin ningkek kin nibou kin nimig kin ninsi nindigsi nya kin ninak ba,

¹²ug sut ei mben Israel ide prak meng yati dima nisai bikes ei mpia ttou nsi gom di ipigig sut ei mem gima icom atriem ndung eisi ba, ndig hagom kep hum ei sirima.

¹³Lene gino bikwop mben Israel yahagom ibon sisar kin gi ibisinggre bi bigyai mun tunggwei TUHAN nicuk yokti nya ninyeng gom lene,

¹⁴tirigi ide sisar dima jo nibreisi tu lene ma ibipbur bijem sapi nikre di nehen pap ningut gom kwei bigya tut kui TUHAN De Prak Meng nuhui. Lene ma iba sapi dima bikuk yok bak leu binhyepo imam nya ibon midut nibiyai nikos ser sisar.

¹⁵Ma nibou mben Israel ikes inda ei sapi dima nibou dip bibui ei sirima.

¹⁶Lene ma Imam Nibou Ndig hek ninggrom poi bikon buug sut ug ei Prak Meng nsi.

¹⁷Lene ma noni tur ninda pijum ei ninggrom pimati bibiprok bei ban mbrawin di jo ser Ninsi Di Kwes-Kwau nuhui mbimuhwindacan.

¹⁸Lene ma noni tur ninda pijum ei ninggrom pimati hanyen bidip ninggai di tug nimbar hum ndok mem biei nggrai ei Ninsi Di Kwes him nuhuisi bitaisi. Lene ma noni hek sapi ninggrom niken ba, siber ei nimbar hum dok bei dimbou hui ei Prak Meng nikiou.

¹⁹Lene ma noni kon sapi pima nimmau bindig hagom kep hum ei nimbar hum dokti.

²⁰Ma Imam Nibou Ndig yai gini hagom bit leu nok niyai kepti tirigi po ndig sapi kep hum mem nide sisar pima. Nok gima lene Imam Nibou Ndig mibon midut mem mben Israel yahagom ide sisar di ibon kin gi ibisinggre bi dima leu binhyepo TUHAN mikos ser ide sisar.

²¹Lene ma noni kon sapi dima ninghui hagom buug sut ug ei mben Israel ide prak meng yati dima nisai bindig hagom kep hum bit leu nok niyai kepti tirigi po noni bui sapi mem nide sisar pima. Gini ne nisinati mem imam gom bon midut nibiyai nikos ser sisarti di mben Israel yahagom ibon kin gi ibisinggre bi ri.

²²Lene gino nibou mben Israel gom bon sisar kin gi bisinggre bi biyai mun tunggwei TUHAN nicuk yokti nya ninyeng gom lene,

²³hammi tirigi nide sisar dima jo nibreisi mem noni tu rino ma noni jem nide kambir nikre di bok-ba bi ningut gom kwei mem nibon midut nibiyai nide nikos ser sisarti.

²⁴Ma noni kes ninda ei kambir nibou dip bibui ei nimbar hum dok nite bei mpia nijjai ei mpia ttou nsi gom di imam nya idigo mindhe bindig titut kikep eisi.

²⁵Lene ma imam gom tur ninda pijum ei kambir dima ninggromti bibidip ninggai nya di tug nimbar hum dok nuhuisi bitaisi him leu api siber niken ei nikiou.

²⁶Lene ma imam dima ndig nimmau hagom kep hum ei nimbar hum dokti bit leu nok niyai kepti tirigi po noni ndig sapi kep hum mem nibon midut nibiyai ningon kwes kin Allahti pima. Nok gima lene imam mibon midut mem nibou mben Israel nide sisar di noni bon bisinggre bi dima leu binhyepo TUHAN mikos ser nide sisar.

²⁷ Gino mben Israel gom bon sisar kin gi bisinggre bi biyai mun tunggwei TUHAN nicuk yokti nya nyeng gom lene,

²⁸tirigi nide sisar dima jo nibreisi mem no tu lene ma noni jem kambir niwek di bok-ba bi ningut gom kwei mem nibon midut nibiyai nide nikos ser sisarti dima.

²⁹Ma noni kes ninda ei kambir nibou dip bibui ei nimbar hum dok nite bei mpia nijjai ei mpia ttou nsi gom di imam nya idigo mindhe bindig titut kikep eisi.

³⁰Lene ma imam gom tur ninda pijum ei kambir dima ninggromti bibidip ninggai di tug nimbar hum dok nuhuisi bitaisi him bisiber niken ei nikiou.

³¹Lene ma imam dima digo nimmau hagom leu bit leu nok gi po noni digo nimmau mem nibon midut nibiyai ningon kwes kin Allahti pima leu api ndig hagom kep huma. Lene TUHAN mijoi sut ninghap di ngge kei dima. Nok gima lene imam mibon midut mem limwa gom dima nide sisar di noni bon kin gi bisinggre bi dima leu binhyepo TUHAN mikos ser nide sisar.

³²Ne gino no dima jem domba ningut gom kwei mem nibon midut nibiyai nide nikos ser sisarti dima lene ma domba dima niwek di bok-ba bi.

³³Ma noni kes ninda ei domba nibou dip bibui ei nimbar hum dok nite bei mpia nijjai ei mpia tou nsi di imam nya idigo mindhe bindig titut kikep eisi.

³⁴Lene ma imam gom tur ninda pijum ei domba dima ninggromti bibidip ninggai di tug nimbar hum dok nuhuisi bitaisi him bisiber niken ei nikiou.

³⁵Lene ma imam dima digo nimmau hagom leu bit leu nok gi po noni digo nimmau leu mem nibon midut nibiyai ningon kwes kin Allahti pima leu api ndig hagom bitut njita di no dima yai bak TUHAN kep hum. Nok gima lene imam mibon midut mem limwa gom dima nide sisar di noni bon kin gi bisinggre bi dima leu binhyepo TUHAN mikos ser nide sisar.