Read Hatam IMAM NYA IDE MIDYAI 5 Bible Online

IMAM NYA IDE MIDYAI 5 - Hatam bible

IMAM NYA IDE MIDYAI 5

¹Ma tungwatu iba mindhe-ndhe nya bibikuk yok bak drek dip ide sisar di nok gini. Gino nibou nya ihig tungwagom kwei biya ei nikei noho bei lene no dima pai brei sut mun di noni ngat bou niyai him kin gi miap ei nitingou nsi cem bak nikei dima bi lene bit bon ningwes ngun kan bi.

²Gino tungwagom bisinggre bingget mun di map kuisi nok mindhe ningut di mpiei bi lo, hammi tirigi noni kan tut mun di noni yai dima rino map dima kui noniti ba, ningon mui.

³Gino tungwagom bisinggre bingget hiter de mun di map kuisi bi lo, hammi tirigi noni kan tut mun di noni yai dima lene map dima kui noniti ba, ningon mui.

⁴Gino tungwagom preu ei sut mun nyeng hi tug hon gi heng ugwai-gwai lene hammi tirigi ningon huk niti bikan tut lene ningon mui su.

⁵Tut sisar dini yok hagom lene suar no di ningon mui pai jit nide sisar.

⁶Lene ma noni jem domba e, he kambir niwek e, ningut gom kwei bak TUHAN biluei sisar dima. Lene suar imam bon midut nibiyai nikos ser sisarti leu binhyepo TUHAN mikos ser no dima nide sisar.

⁷Gino no di bon sisar dima ma domba e, he kambir e, mem gima biluei nide sisar hi bi lene ma noni krau ha tekukur can e, he hakimoi mbrei can e, kwei. Haba gom mem nibon midut nibiyai nikos ser nide sisarti lene haba gom bu mem nibon midut nindig mindhe titut kep hum.

⁸Ma no dima krau ha dima hacem kwei bak imam leu binhyepo noni mikos ha gi nigom mem nibon midut nibiyai nikos ser sisarti. Ma imam sibui ha dima nikimam noro nibou ne mikos bittun leu au.

⁹Lene ma imam dima hek ninggrom poi bibiprok nimbar hum dok nitta leu api hek ninggrom niken bisiber ei nikiou nok nibon midut nibiyai nikos ser sisarti di no dima bon kin gi bisinggre bi.

¹⁰Lene ma imam ndig ha gi nican kep hum bit leu nok TUHAN nicukti. Nok gima lene imam mibon midut mem no dima leu binhyepo TUHAN mikos ser nide sisar.

¹¹Gino no dima ma ha tekukur can kin hakimoi mbrei can bi lene ma noni ug yai tepun kilo can kwei nok mun di biluei sisar dima. Lene ma mini zaitun kin biei nggrai di ui-gwang kei srig tepunti au. Lewo tepun dini mem nibon midut nibiyai nikos ser sisarti lene mem nibon midut njita nibipai sigyo bak Allahti pima bi.

¹²Lene ma noni ttei tepun dima kwei bak imam leu binhyepo noni kam ei ninda bia bei gom nok mun di bindo bipia no dima yai hagom bak TUHAN. Lene ma imam dima ndig tepun dima kep hum ei nimbar hum dokti nok nibon midut nibiyai nikos ser sisarti.

¹³Gima rino imam dima mibon midut leu binhyepo TUHAN mikos ser no dima nide sisar. Lene ma tepun niken jo mem imam nya igyem kep bit leu nok gi po TUHAN nicukti tut gandum ngat di indig kep hum pima.

¹⁴Lene TUHAN yai nidimig sutti dini bak Musa.

¹⁵Gino tungwagom ningon bbwe lene yai mun di bikos ser nide sisar bak TUHAN bi kin gi bisinggre bi lene ma noni jem domba e, he kambir nikre ningut gom e, kwei nok mun di noni ngkwei hanyen bak TUHAN mem nibon midut nibiyai nikos ser sisarti. Lene ma mindhe dima nibok bit leu nok nibok di ice tut mem TUHAN De Prak Meng.

¹⁶Ma noni kum TUHAN de ningwam dima bak imam nya bikum eisi bu ei ningat can leu ningot gom lene nok. Lene ma noni yai mindhe dima bak imam leu binhyepo imam dima mibon midut nibiyai nikos ser sisarti apino TUHAN mikos ser nide sisar.

¹⁷Tungwa tou rino pigau TUHAN nicuk yokti nya lo, bon sisar kin gi bisinggre bi lene bit bon ningwes ngun kan bi.

¹⁸Suar noni jem domba e, he kambir nikre di bok-ba bi ningut gom e, di nibok bit leu nok nibok di ice tut mem TUHAN De Prak Meng kwei. Lene ma imam bon midut nibiyai nikos ser sisarti apino TUHAN mikos ser no dima nide sisar di bon kin gi bisinggre bi dima.

¹⁹Tug hon nisinati dima lene tungwagom mikum TUHAN de ningwam leu no drek dip nide sisar di noni bon tut TUHAN.