Read Hatam YEREMIA 10 Bible Online

YEREMIA 10 - Hatam bible

YEREMIA 10

¹Je di limwa Israel e, jingig jitingou mem TUHAN nisok kep jeti.

²Noni pai “Ma jiyai bram ngkiai nya ide niyai kepti nya au. Mbro nok gino ngkiai nya ittin tut bindo di bibon ninggap leusi ei mpia-bbed him lo, jeni ma jidigit tut au.

³Mun di ikuk yok bak bit leu igyai kepti nya bon ninyeng bi bibor. Yuug wim biei ei bahamti leu api icuk tukan biei leu binhyepo bibon biei dima nok kwar di tungwatu nya ikuk yok bak.

⁴Leu api iba mas kin perak bimau kwar dima lene iba paku bipek kin nikiou leu binhyepo tti bicut ug ei dihyeisi au.

⁵Kwar dima dem kep nok tungwatu di nijit bi nya di imbrap kan bi ba, imbut imig cem kan bi di itas ei miai bimen dumti. Ba, suar tungwatu nya ikon-kon nyen yok he. Gima rino ma jittin mun dima yok au. Lewo dem mem gima ibon mun di kinei sut je ba, isindem mem gima ibon mun di kei sut je cem kan bi.”

⁶TUHAN di kwes-kwau e, hi di noyam kin Nani bi. Anyeng jei bibor bisindem bibor cem.

⁷ Tou rino kuk no bak Na di anok nibou ndig mem ngkiai nya yahagom i? Ningat ne adem mem gima ikuk yok biNani nok gi igbit a. TUHAN e, yo di ingon ki nya di isrig ngkiai nyati bitut nibou ndig di ide nya cem hi dem mem ibinai kin Nani bi sren.

⁸Yo dima yahagom ibbwe ba, ingon mbum cem. Lewo iba biei nitu bibon ide kwar di ngginau yok tut mun di bon ninyeng kan bi.

⁹Iba mas kin perak di igyai kwei leu minu Spanyol kin minu ndig Ufas birap kin kwar dima. Gima yok hagom ne mun nibon bou ninda him leu nikilis kep mun cig nya kin nikinding kep mas cig nya ri. Iba minghas di nok nghei nta di pimber kin gi sieng kei bibon kwar nya ide sinsun. Nibien kep minghas cig nya iba ingon di sok kep yonti binap sinsun dima nok mungkun kei.

¹⁰Noro Nani ne TUHAN Allah di nijit-jau ba, Allah di yai niyaijo bak tungwatu nya cem nibou ndig di niyaijo kikau cem ri. Gino angon sibui lene dihyeisi dini ugwa-kwei bibor. Gino agga lene ngkiai nya igya mem kan bi. (

¹¹Je di limwa nya e, suar jipai sut biyok bipia kwar ngot di ipai tes mpia-bbed him kin dihyeisi dini kan bi dima yok ne mibindei sar yok ug ri. Yoni misar leu dihyei ninjek dip dini bihigom ri.)

¹²TUHAN ba nide nisindemti bipai tes dihyeisi dini. Noni ba ningon di ki bibon minu nya hagom lene ba nintin kimboti bikes mpia-bbed him bijo nijoti.

¹³Noni ba nicukti he bibindei ba, minyei nibimbi bong ei niban di bikwas minyei leu yam[4] ei mpia-bbed him. Noni bindei hei bumbuhui bikiju kwei leu dihyei nohon keti. Noni bindei hei kigyei cem ba, ninjeng srei bigetti leu api bipinak hou cem kwei leu nijo bou dip.

¹⁴Tungwatu nya ingat gima yok lene ingon huk niti bipia ingon mbum ba, ingon dor niti bi. Tukan mas nya igwam nimmaiti. Lewo ide kwar nya di ikuk yok bak di ibon bou inda him dima nitrowai he ba, ninnei joti bi.

¹⁵Kwar di ikuk yok bak nya bon ninyeng bi ba, dem mem tungwatu nya iba ighyet bicig bipai kinei cem. Mpe dino tto bou dem lene kwar nya misar bingwig.

¹⁶Yakub de Allah noyam kin kwar di ikuk yok bak dima yok bi. Noni ne no di pai tes mun nyeng hagom ri. Ninyeng rino TUHAN Di Sindem Bibor ba, Noni dimig Israel binok Nide limwa.

¹⁷Je di timiei minu ndig Yerusalem e, siceu nya igyon ttai je tu! Gima rino ma jipian ndigban bijinang tut!

¹⁸Mpe dini ne TUHAN micom mben Yehuda yahagom ug ei ingkiaisi. Noni mibindei sar jahagom bijingwig hak ug. Gima ne TUHAN De nisok kep jeti ri.

¹⁹Lene timiei minu ndig Yerusalem yahara “Nyende nibokti buhun ba, bit bon jut hanyen kan bi. Nipou yo lene nikan bigya minahau mem mun di buhun dini noro dem tut gima nahau mem kan bi.

²⁰Nyende prak meng nya rik-ta ba, kuk di nibohok nya cem hagom bitun bingwig. Nyende munggwom nya ipror bingwig leu nye tu. Hi dima hok prak meng ba, pindur minghas eisi hanyen bi.”

²¹Da dibuhup “Ide nibou di ibie tut nye nya ingon mbum. Yahara TUHAN leu binhyepo Noni ndo ningon kanti biyok cem bi. Gima rino igyai mun bipek kep bi ba, siceu nya ibindei bintek gimahap ug ei tirima-tirima.

²²Ma jingig jitingou mem! Nibimbiti tibim kwei leu nite bei mpia nijjai tut ngkiai nya di ibindei di nugwei bong. Tentara di ide nya mibindei ba, minu ndig hagom ei minu Yehuda minok iggum ndigsi ba, dem kep ha ngunti. Leu api nsien bigbehei nya mitot yaham ei mpia dima yok.”

²³TUHAN e, dikan tut bipia tungwa hi di sindem mem gima kos tut mun di mipek kep mem noni bidimig nide niyaijo nimbutti cem kan bi.

²⁴TUHAN e, ambas nye lo, ma ambas nye bibor biniyai nidut bibor au. Ma akes hukum ei nye dip ei mpe dino agga bibor au. Lewo nyeni nahagom minisar biningwig ug ri.

²⁵Ma asiber Ade nigga biborti ei ngkiai nya di ikon Nani nok ide Allah ba, ikuk yok biNa bi dip hak ug. Lewo ihwen Ade limwa nya bisar bibor ba, ihwen nyende minu cem bitimek tu.