Read Hatam YEREMIA 15 Bible Online

YEREMIA 15 - Hatam bible

YEREMIA 15

¹ TUHAN pai bida “Mbro nok gino Musa kin Samuel ikwei ya Doho bei bimbrap gau yo dini lo, dingon nggriu sut yok kan bi. Ma ajji yok ug ei minu ting leu Doho bei hak ug.

² Gino ihig ser na bipia yuug ei siritou i? Lene ma abuhup ‘TUHAN pai bije bipia yo di didimig yok ei mem gima imai tug hon nsuwer ajar ne nnaba imai nok gima ug! Yo di dikos tut mem itug midut tug hon pran ne nna ba imai ei pranti nok gima ug! Yo di dikos tut mem itug midut tug hon ninggum ne nnaba imai inggum nok gima ug! Yo di dikos tut mem itug ndei hukum dino ide siceu nya ikat yok ug ei ingkiaisi ne nnaba mitug ndei hukum ei ingkiaisi nok gima hak ug!’

³Da di TUHAN dikos tut bipia hukum ninyeng bitai micut igkep yok. Yoni mikrop tug hon pran leu api nsien nya mikri ingut ba, ha nya mipuk ingut lene mindhe di iten-pos nya migya kep ingut bingwig.

⁴ Midibindei ba, tungwatu dihyeisi dini hagom igyai ngkek ttin ser yok drek dip Manasye di Hizkia nipmot niyai munti nya ei minu ndig Yerusalem tirigi ninyeng tak kep timiei Yehuda binok nibou ndig mem yok.”

⁵TUHAN pai “Je di timiei minu ndig Yerusalem e, tou rima ngondut je i? Tou riningon buhun tut mun di cut igkep je i? Tou rima kwei cem kep je bihig ser je tut jiyaijoti i?

⁶Jikou sut Da bijikiek jinghim bak Dani tu. Gima rino dikon dinda bidihwen je leu api mijisar lewo bit bon doom dingon tut je bu kan bi.

⁷Dicom je leu jide minu ndig hagom noyam kin no di com gandum nisina bai di pri didiei. Mbro nok gino jinok Ditde limwa nya lo, midibindei sar jeni kin jimunggwom bat nya lewo jikou sut gi jittin ser jiyai munti di kinei bibor nya.

⁸Jide minu dima mpung tut kibom nya ba, imangti dor njiriek iggum di jo muk nipimat nimangti. Diyai nimai bak jide pinai pilei nya bimai hanyen ei ipilei yo apino ipmem bat nya ingon ngguk tut yok. Dibindei ba, nihwen mun cig gom hwen yok mem mpia njap apino ittin ba, ingon digit bibor.

⁹Sop ndig di nipmot bat nya ibou muhwindacan imai bingwig leu noni ba, ninghuisi mbris bram yok lewo ninnei cun. Nide njap di niyaijo niti nya wer mmun ken leu api ningon buhun tut yo di ingwes om noni. Midicuk jide siceu nya leu binhyepo ihwen yo di imai bingwig bigyo ei jikieti. Da di TUHAN disimbot dat tu.”

¹⁰Dingon kinei bibor! Nggon rino dipmem srek tut da i? Suar disrep tut bikwop timiei minu dini bidipai kep yahagom. Mbro nok gino ditde ningwam jo bak yo di hiter bi ba, yo di hiter cem ide ningwam jo bida bi lo, yahagom imbriom da.

¹¹TUHAN e, gino diyai ditde midyai nok gi kei bidimbrap gau ditde siceu nya ei Aho bei tirigi mun di buhun cut igkep yok bi lene nna ba ide nimbriomti dima cut igkep da hak ug. (

¹²Bit bon hi ki ngkimom nitu kukiau kan bi. Gi bi ne notou iki ngkimom nitu di ngkimom-tembaga srigsi di tukan nya ikwen ei nite bei mpia nijjai i?)

¹³TUHAN pai bida “Midipinak siceu nya ndam Ditde limwa nya leu binhyepo ipos ide mitiei kin ndigban bingwig leu yok drek dip sisar di ibon bidem minu dini hagom.

¹⁴Midibindei ba, inok awak mem ide siceu nya ei ingkiaisi di ingat bou igyai him bigyo. Lewo Ditde nigga biborti noyam kin hum di cig-cai bijo ninno bijo kikau.”

¹⁵Lene dipai “TUHAN e, hagom jo nibreisi mem Na. Ma ayok ngon kep da ba, ampu da cem. Ma abirop hanyen bak yo di ihwen bit da kin yo di ico kep da. Ma aom angon tut yok kikau bihwen da au. Ma akan kep bipia yo dima ingwes pri gau da drek dip anyenga.

¹⁶Ambrap bit da leu api dimiap kep ahyet hagom. TUHAN Allah Di Sindem Bibor e, diceu riNani. Gima rino ahyet bindei ba, dingon kei bibor bidingon nggei-hi-nggei.

¹⁷Dibon nituti mem gima dipriet kin yo di icat ei munti kin yo di isimbot kep biyam tut mun di mipror yon bi. Digwam bidangkom bit leu nok acuk dati apino dingon sibui nindig bibor.

¹⁸Nggon rino dinghuisi wei kikau i? Nggon rino dibokti di ullen jut hanyen bi i? He akos tut mem abingon da leu binhyepo dingon wok ba, dingon cut leu Nani noyam kin minyei di pingge mem bed di biang mpia ngei e?”

¹⁹Lene TUHAN buhup “Gino angkwei hanyen ndam Da lene midijoi sut na leu api anok Ditde awak hanyen bu. Gino ambrap-mbrap wai bu bi noro atri tut nihyet di bon ninyeng leu api midisindui sut ba, anok nabi mem Da hanyen bu. Apino ade limwa nya minduk yam kwei bingwig kep na. Suar ma aug nggok-nggok nyen yok bu au.

²⁰Midibindei ba, anok ngug ngkimom-tembaga bou yo dima igyai him. Mbro nok gino ihwen bit na lo, ibindei timek na kan bi. Lewo midingat rin bit na leu binhyepo diya srak ko hagau na. Miditeu na ba, angwes ngun.

²¹Midikwek na leu yo di imbuk bibor nya di ihwen bit na ide nisindemti. Da di TUHAN disimbot dat tu.”