Read Hatam YEREMIA 18 Bible Online

YEREMIA 18 - Hatam bible

YEREMIA 18

¹TUHAN pai bida,

²“Aug ngat noop kep igtuyap cig ei nide ig leu api midipai sut dingon kanti bina ei sirima.”

³Gima rino duug ei nide ig bidingat lo, tukan dima ba mun di nok kroba nimig di sibui-sibui nyen biyai nide midyai.

⁴Gino noni op igtuyap ninggop gom ei mun di nok kroba nimigti ba, bibon dibijig di kei-kau haigtu bigyo lene noni ba ninggop gom dima boop dibijig ninyeng hiter bu bit leu ningon kanti.

⁵TUHAN sok nihyet ei da dip bak Nide limwa di mben Israel bipai biyok,

⁶“Je di mben Israel e, apo Dani dibibon jeni noyam kin noop kep igtuyap cig di bibon igtuyap dima bi e? Lewo diba dinda boop je noyam kin no dima di op igtuyap a.

⁷Gino jam dem ne dikos tut mem dohom mben gom cem midinggek tut ide ninyeng tak kepti bingwig cem dibindei sar yok cem,

⁸apino mben dima ittin ser ide sisar leu api midiluei dingonti tut yok.

⁹Ne gino dikos tut bipia diwin mben gom kin ide ninyeng tak kepti ba, disindem tut yok,

¹⁰noro mben dima ibit dihyet bi ba, ibon sisar lene midiluei dingonti tut yok.”

¹¹TUHAN pai bida “Nogindini ma atri tut bak timiei Yehuda kin timiei minu ndig Yerusalem nya bipia dikos dat bipia ditte tut yok leu api midikes hukum ei yo dip. Ma asok kep yok leu binhyepo ikiek yo leu igyai munti di kinei bibor nya leu api ikinding igyaijoti kin igyai munti nya bikwes.

¹²Noro yo dima mibuhup ‘Nittin ser sisar mem mindei i? Minibit nyenti ningon kanti kikau! Bikwop nahagom ningkek ndok ba, niyai kep mun di mbuk bibor bit leu nyenti ningon kanti!’ ”

¹³TUHAN pai “Ma ahig ser bikwop mben dihyeisi dini hagom bipia mun di nok gini pek kep nipou su e, he bigyo e? Mben Israel ibon mun di kinei bibor tu!

¹⁴Es di jo ei nungug tig dip ei Libanon hi jet bingwig bi sren. Minyei hou dibiam kwei leu nungug him dima hi pingge bi sren.

¹⁵Noro Ditde limwa nya ingon prion ser Da leu api indig biei nggrai di ui-gwang kei bak kwar nya. Ikinoi kak puig timiei di suar imbut kak nya lene ite leu puig timiei nya ba, israwir kak puig di hi dime kep bisur yam bigyo cem tu.

¹⁶Yoni ibimangkrei minu dini bibindei ba, tungwatu nya igyai ngkek ttin ser ba, ingon mpo tut. Yo di injiriek mpia dini mikit ibou leu ba, minga leu sut lewo ingon buhun tut.

¹⁷Midibindei ba, Ditde limwa nya mipri didiei ei ide siceu nya yoho bei dem kep nok hou di kui leu nite bei mpia nipriti di bindei ba, dihyei ntui nindig bibor. Gino mun di buhun bibor cut igkep yok lene midiba dinghim bak yoni ba, dimpu yok bi cem.”

¹⁸Lene yo dima ipai biyam “Jikwei ba, igyok ingon gom mem gima ihwen Yeremia. Nongkom he rino tri tut Allah nihyet binye bi. Noro ide imam nya di ingginau nye kin ide andigpoi di ingon ki di ipingok nyeni ingonti kin ide nabi di itri tut Allah nihyet binye mingat rima mem nye kikau yo. Jikwei ba, ipai kep Yeremia ei nikei noho bei leu binhyepo noni bindin nye kikau bu bi.”

¹⁹Gima rino dingat nadi bidipai “TUHAN e, ma angig atingou mem dihyet. Ayok ngon kep ditde siceu nya di ikkin kep dinghapti.

²⁰Niba gi kinei birop niyai munti di kei ne igbit rin e? Noro yo dima itig ndep jui ser da ba, imem kep ser nituti tirigi dicut eisi. Ma akan kep mpe di dimbrap bit Na bidiya hacan mem yok ser nhyema Ade ningon sibui bibor tut yokti micut leu yok.

²¹Noro TUHAN e, nogindini ma asindui sut yok ba, imunggwom bat nya imai inggum cem itug midut tug hon pran cem pinai nya imai leu itnem bat nya cem munggwom nya imai leu ipmem bat nya cem nsuwer ajar hwen andigpoi nya cem pinai pilei nya ikon pran apino igyai nimai cem hak ug.

²²Ma acuk yo di imbuk nya kros bingwig ei yo dima ide biyati mem gima ipos mun nyeng hagom bingwig leu yok bibindei ba, yahara drek dip ide ningon ttin biborti. Yo dima itig jui bimem kep ser nituti tirigi dicut eisi bindin bon ser da.

²³Noro TUHAN e, akan bidem tut ide nuhum yam nsi mem gima igyai nimai bida. Ma akos ser igyai munti di kinei kin ide sisar au. Ma abui yok ba, anjei yok bibou icut ug e. Ma aba angon sibut biborti biyai yok.”