Read Hatam YEREMIA 2 Bible Online

YEREMIA 2 - Hatam bible

YEREMIA 2

¹TUHAN cuk da,

²leu binhyepo duug tri tut nihyet dini bak timiei minu ndig Yerusalem yahagom. “Je di mben Israel e, dikan kep nijam di jinok sop wak cam di ningon gom. Mpe dino sindi siwak yam ne angon ngakei Da nindig bibor. Mpe dima lene abit Da kak puig di bie ug ei iggum ndigsi di bon beisi kin njita hi bi.

³Je di mben Israel e, dinyeng tut je mem Dangkom. Jinok dingon him ngat bidingon mbris tut je cem. Dikes hukum ei yo di ihwen bit je nya yahagom dip. Da di TUHAN disimbot dat tu.”

⁴Je di jintun Yakub him bijinok keret Israel nya jahagom e, ma jingig jitingou mem TUHAN nicuk jeti!

⁵Noni pai, “Jidigup bat-jidigai bat nya ingat Ditde mun di diyai tunggwei hi di bindei dino yaham imbuk kep Da nya rimindei ngan i? Ikuk yok bak kwar di bon ninyeng bi di bindei ba, yonti cem ibon inyeng bi.

⁶Mbro nok gino diteu yok ba, ingwes ngun leu minu Mesir lo, ingkek ndok tut Da. Dinyohou yok ei mpia ngoisi di wer iggum dip kin iggum ndigsi di wer mboi-mbang kin ningakti di kinei bibor cem. Tungwatu nya iwin minu ei sirima bi ba, ikriau binjiriek mpia dima.

⁷Dibuwak yok kwei ei minu di bon ninnumti leu api igyem njita beisi nya nindig bibor ba, ibong kei igwam kei. Noro ibindei ba, map kui Ditde minu dima ba, ibimangkrei hanjop nsi di dipek mem yok.

⁸Ide imam nya hi di hig ser Da ‘TUHAN ug ei siritou i?’ nok bi. Mbro nok gino ikrau Ditde niggai serti lo, ikan tut Da bi. Ide nibou nya yaham imbuk kep Da lene ide nabi nya itri tut nihyet tug hon Baal ninyeng ba, yahagom ikuk yok bak kwar di ibon inyeng bi nya.”

⁹TUHAN pai “Nogindini midiba mbrap bit Ditde limwa nya ba, dibuwak yo di intun yok him nya cem ug ei nikei noho bei.

¹⁰Ma juug ei nite bei mpia nicutti ei mios Siprus nintig dip lene jicuk tungwagom ug ei nite bei mpia nipriti ei minu Kedar. Mijo nibreisi mem je bipia mun di nok gini hi pek kep mem tungwatu nya nipou kwei bipek ammani kep bi sren.

¹¹Mbro nok gino mben hiter ide kwar bon ninyeng bi lo, gimbun iba kwar hiter bu biluei ide kwar dima nohoti bi sren. Mbro nok gino dibindei ba, Ditde limwa nya igyai inyeng jei lo, ikon ide kwar di ikuk yok bak di sindem bi nya bigya luei Dohoti tu.

¹²Gima rino mpia-bbed him e, ma augwa-kwei ba, anggap leu cem adigit tut cem!

¹³Lewo Ditde limwa nya ibon sisar ninyeng can tu. Mbro nok gino dinok minyei niyaijo nijep nibousi mem tungwatu nya lo, iba inghim biDa leu api ibon ide bak di ki ei dip di bit bon minyei ut eisi kan bi.”

¹⁴“Mben Israel inok awak ba, intun awak nya him cem bi. Nggon rino ide siceu nya yuhuk yok noyam kin yuhuk mindhe i?

¹⁵Ide siceu nya inok singa di yau binggok yok bibindei ba, ide minu noyam kin iggum ndigsi. Ide minu nya timek bingwig bidem kep nok ha he bong.

¹⁶Je di mben Israel e, mben Memfis kin Tahpanhes ikak jibou nta bingwig leu je tu.

¹⁷Jenti jibindei ba, mun dini yok hagom cut igkep je. Jikes Da di TUHAN di dinok jide Allah ei ba, jiba jinghim bak Dani tirigi dinyohou bie tut je kak jimbutti ei pui sinon.

¹⁸Nggon rino jibisau ug ei minu Mesir i? Mijidut Minyei Nil ningei e? Nggon rino jibisau ug ei minu Asyur i? Mijidut Minyei Efrat ningei e?

¹⁹Jide sisar mibindei ba, hukum cut igkep je. Jitug ndei nihwen bit jeti drek dip gi jikou sut Da di dinok jide Allah. Nogindini jitug ndei niwei kin nidut drek dip gi jiba jinghim bak Dani bijikon dinyeng bi. Da di TUHAN dinok jide Allah Di Ninyeng Jei Bibor ba, Disindem Bibor cem disimbot dat tu.”

²⁰TUHAN Di Ninyeng Jei Bibor pai “Je di mben Israel e, jikou sut gi jinok Ditde limwa nya. Jibit dihyet bijikuk je biDa cem bi ninno tu. Noro jikuk je bak kwar di ninyeng kwar Ningat Ntun Himti bidem mbigdip nya kin biei ndig di nggrou kei nibehei nya hagom.

²¹Dita je bijinok ba anggur nikioi di kei bibor. Noro tini bu ne jinok ba anggur di ngoi-nga di bit bon ngat ningat kan bi.

²²Mbro nok gino jiba sabun di sindem bibor bikek minyeiti lo, nirom di kui je jo nibreisi bou diyai him.

²³Jiba jingon di jei pai sut jenti bipia nirom kui je bijikuk je bak Baal bi sren! Ma jiyok jiyai kep midut nya di jibon ei Mbang Briep Hinom ug e. Jikan kep jide sisar leu api ma jipai jit hak ug! Jinok unta niwek di nibou buwei di nang-nang nyen di bit bon hi kat bi.

²⁴Unta dima nang kikau ug ei iggum ndigsi di nok ha ngunti. Gino nibou buwei nok lene bit bon hi kat noni kan bi. Noro buhun mem unta nikre kat noni bi. Lewo tirigi pri ei niwek dip lene niwek dima kuk no mem nikre.

²⁵Je di mben Israel e, ma juhuk bram kwar nya ba, jahara yok au. Leu mbigom ne jimig bok ba, jinnei di sor mibindei ba, jikibou dut. Noro jibuhup ‘E bi! Bit bon nikes kwar nya ei kan bi. Ningat ningwes ei yokti ba, niba noho rok yok kikau.’ ”

²⁶TUHAN pai “Bit leu nok no di nggimang igkei mmai sut nonti tirigi yo di igya ser nya ikat noni nok gima cem mben Israel bitut nibou ndig nya kin yo di igya kui yok kin imam nya kin nabi nya yahagom mimmai sut yonti.

²⁷Jahagom mijimmai sut jenti lewo jihig biei ttou gom nok jicig ba, jihig tig nitindak gom nok jipmem. Jikwei kuk je biDa bi noro jikes Da ei. Tirigi mun di buhun cut igkep je lene jahara Da leu binhyepo diteu je bijingwes ngun.

²⁸Jide kwar di jibon bou jinda him yuug ei siritou i? Gino mun di buhun bibor cut igkep je lene ma jahara kwar dima yok leu binhyepo iteu je bijingwes ngun gino isindem mem gima iteu je! Je di timiei Yehuda e, jide kwar nimangti noyam kin jide minu ndig nimangti!

²⁹Mindei rino bindei dino jijoi sut Da bi i? Nggon rino jaham jimbuk kep Da i?

³⁰Dikes hukum ei je dip mikui-kausi he lewo tirigi disok kep je lene jingkek ndok. Jinok singa di yau-yau nyen ba, jihwen jide nabi nya bimai su.

³¹Je di mben Israel e, ma jimiap kep dihyet. Dibon Danti bidinok iggum ndigsi kin nindibutti bou jiyai him e? Gi bi lene nggon rino jingkek ndok ba, jibit jenti jingon kanti lene jingkwei hanyen ndam Da bu bi sren i?

³²Bon sop gwam nitta pilei ningon prion ser nide mas di noni bimau nonti e? Bon sop wak cam ningon prion ser sinsun di noni juk mem pesta niwak yamti e? Noro jingon prion ser Da ninno tu. Bit bon dikwop nijam dima nijeisi kan bi.

³³Jingon ki tut gi jiba nikrar binggok puig mem yo di ingon pri kep je. Jiyai munti di kinei dima bibrim sop sundal nya ingonti!

³⁴Yo di yuhui mbum kin yo di ingon ngun di jibui yok nya inggrom rus jide sinsun bibor tu. Noro yo dima ne ninggimang kep mun cig nya di ikat yok inggrom rino rus jide sinsun bibor bi. Mbro nok gima lo,

³⁵jipai sut jenti ‘Nyeni ningon ngun. Ningat ne TUHAN ningon sibui sut nye bu bi.’ Noro Da di TUHAN midikes hukum ei je dip lewo joom ser jide sisar.

³⁶Jidor haninyai ndam ngkiai nya ide kwar nya ba, jahara yok leu binhyepo impu je! Noro mben Mesir mibindei ba, jingon ngkwei leu yok dem kep nok gi jingon ngkwei leu mben Asyur.

³⁷Mijiba jingon di ngkwei leu yok kin gi jiba nimmai sut jenti bikes minu Mesir ei ba, jingkwei hanyen. Da di TUHAN dikou sut yo di jiba jingon com yok dima. Gima rino yoni mimpu je bi sren.”