Read Hatam YEREMIA 20 Bible Online

YEREMIA 20 - Hatam bible

YEREMIA 20

¹Imam Pasyhur di Imer nipmot ninyeng tak kep midyai ei TUHAN De Ig. Mpe dino noni miap kep nihyet di ditri tut biyok lene,

²noni cuk tungwatu nya leu binhyepo ibui da ba, iba biei ner bikibi kep dimig bingkiem kui Dimbou Pmem Benyamin. Dimbou pmem dima ne itu ei TUHAN De Ig nijjai.

³Njap di hyep bu tirigi Pasyhur bindei ba, ikes da leu biei ner di ibikibi kep dimig bidiya-ya nyen lene dipai binoni “TUHAN mijem anyeng Pasyhur bu bi noro mijem anyeng ‘Ningon Ttin Bibor Binggi Minu.’

⁴TUHAN Nonti pai ‘Midibindei ba, angon ttin bibor tut nanti kin asut bat nya cem. Ide siceu nya migyai nimai biyok bou ayai him. Midisindui sut ba, nibou ndig minu Babel ninyeng mitak kep timiei Yehuda nya yahagom. Noni mikat bihi ug ei ingkiaisi ei minu Babel biyai nimai bak nindigsi nya.

⁵Midisindui sut ba, timiei Yehuda ide siceu nya mipos mitiei kin ndigban kin mun di inyeng tut nya ei minu ndig dini bitut mun di nibou ndig minu Yehuda nya inyeng tut nya bingkwei sut hagom hanyen ug ei minu Babel.

⁶Pasyhur e, siceu nya mikat nani kin ade bat nya cem jahagom ug ei minu Babel. Nani kin asut bat nya di aris kep mun biyok ninno tu jahagom mijiyaijo ngwig hon leu api mitig je ei jingkiaisi.’ ”

⁷TUHAN e, disindui sut ba, aba ninsi di mmau biris da tu. Asindem bibor dor njiriek da ba, aom kep da tu. Tungwatu nya yahagom iba da bikek ba, ipa ndip da kikau njap jei cem.

⁸Mpe dino ditri tut nihyet lene suar dahara “Nimbuk biborti o! Nibuhun biborti o!” Leu api tungwatu nya ingwes pri gau da ba, ingon mpo tut da lewo ditri tut ahyet.

⁹Ne gino dikan “Nna ba misingon prion ser TUHAN hak ug ba, sitri tut nihyet tug hon Nonti ninyeng bu bi.” Noro ahyet noyam kin hum mbom di drit ei dingon bei. Dibingon mem gima diku ahyet ei dingonti noro dindei bi.

¹⁰Dimiap tut yo di yahamui nyahan bidem minu ighyet di ipai “Ningon ttin biborti kieng kep minu! Jikwei ba, iba kilak Yeremia bak nibou nya!” Disut bat di dingon kieti nya cem imem kep ser dicutti. Isimbot kep biyam “Ma ibingon mem gima iba ninsi di mmau biris noni leu api noni micut bak nyeni. Leu binhyepo ikat noni ba, iba ingon di mbuk birop hanyen bak.”

¹¹Noro Na di TUHAN asindem bibor ba, atti kin da tu. Yo di ihwen bit da micut lewo isindem bi. Leu api immai sut yonti kikau lewo ingon kanti dima cut igkep da bi. Yo di hiter mingon prion ser ide nimmai sut yontiti bi sren.

¹²Noro TUHAN Di Sindem Bibor e, aba angon di sren-srau bibingon tungwatu nya lewo akan bidem tut mun di jo ei ingonti kin ibou ngwakti cem. Gima rino ma asindui sut ba, dingat yok bou diyai him tirigi abirop hanyen biyok drek dip igyai munti di mbuk bibor lewo dikes ditde munhyet ei andati tu.

¹³Ma jiba doia bikon TUHAN ninyeng. Ma jinggei sut Noni lewo Noni teu yo di ingon ngun nya bingwes ngun leu yo di imbuk bibor nya indati.

¹⁴ Disigion njap di dipmem srek tut da! Nnaba tungwatu nya ingon prion ser nijam di dipmem gwam tut da!

¹⁵Ma asigion no di bindei ba, dicig ningon llei sut nihyet tirigi no dima pai “Ayai apmot tu!”

¹⁶Nnaba no dima noyam kin minu ndig di TUHAN ba ningon di nggriu bi bindei timek nya. Nnaba noni miap yo di ighyet sra tut nidut kin niwei mem mpia ngket kin pun mbrei di biwin yo di ikon pran nya nitibimti,

¹⁷drek dip gi noni yai nimai bida ei dipmem ninghopti bi. Leu binhyepo dingat rin ei dipmem ninghopti ba, dimai ei mpia dima di nok jui dip mem da ug.

¹⁸Nggon rino dipmem srek tut da i? Srek tut da leu binhyepo dinghuisi wei bidingon buhun bibor e? Leu binhyepo dimmai sut danti mem nijam di diduhug-duhug nyen e?