Read Hatam YEREMIA 26 Bible Online

YEREMIA 26 - Hatam bible

YEREMIA 26

¹ Niabiati ita Yoyakim di Yosia nipmot nok nibou ndig mem minu Yehuda bijei bigyo lene,

²TUHAN pai bida “Ma aug ya ei ninsi di jo bas hak ei TUHAN De Ig leu api atri tut dicuk nati nya hagom bak tungwatu nya di ikwei leu minu mien nya ei minu Yehuda di ikwei kuk yok biDa. Ma akos dicuk nati dima poi mien cem leu au.

³Mpaba Ditde limwa nya ingig itingou mem ahyet bittin ser ide sisar. Gi nok lene midiluei dingonti tut mun di buhun di dikes ei yok dip drek dip igyai munti di kinei bibor nya.”

⁴TUHAN cuk da leu binhyepo ditri tut bak yo dima “Da di TUHAN dipai bije bipia suar jibit dihyet kin diggai serti nya di diyai bije tu.

⁵Lene ma jiyok ngon kep Ditde awak di nabi nya di dipinak ndam je kikau tu ighyet. Nipou kwei bipek ammani kep jikou sut gi jimiap kep ighyet.

⁶ Gino jibit dihyet bi kikau lene midibibon TUHAN De Ig dini noyam kin gi dibibon Silo[8] leu api mben dihyeisi dini hagom miba minu dini ninyeng bibimbriom yam.”

⁷Nok rino imam kin nabi nya kin ide limwa nya yahagom imiap kep dihyet di ditri tut ei TUHAN De Ig.

⁸Tirigi dikes dihyet tut TUHAN nicuk dati nya hagom tu lene yo dima ikat da kros ba, ighyet ngwig kep da bipai “Suar ma ayai nimai drek dip ahyet di atri tut dima.

⁹Nggon rino aba TUHAN ninyeng bitri tut bipia mun di cut igkep Silo micut igkep TUHAN De Ig dini ba, minu ndig dini mitimek bingwig apino hi mibong ser bu bi cem i?” Lene tungwatu ningot ndig ingwig kep da.

¹⁰Tirigi timiei Yehuda ide nibou nya imiap tut mun dima nipek kepti lene ibipbur ba, ijo leu ide ig nibou ndig bikwei ei TUHAN De Ig leu api igwam kui Dimbou Pmem Di Nijep.

¹¹Lene imam nya kin nabi nya ipai bak nibou nya kin ide limwa nya “Suar ma igyai nimai bak no dini lewo nihyet wer mpiahi tut ide minu ndig dini. Jeni cem jimiap mun di tibim ei nuhui him tu.”

¹²Lene dipai biyok “TUHAN ricuk da di ditri tut Nide nicukti di wer mpiahi tut TUHAN De Ig dini kin minu ndig dini di jimiap tu.

¹³Gima rino ma jiluei jingonti tut jiyaijoti kin jiyai munti nya leu api ma jibit TUHAN di jide Allah nihyet. Gi jiyai nok lene Noni miluei ningonti tut mun di buhun di Noni mikes ei je dip.

¹⁴Noro tut dani ne jikat da tu. Gima rino ma jibibon da bit leu jingon kanti hak ug.

¹⁵Noro ma jiyok ngon kep bipia gino jiyai nimai bida lene jeni kin timiei minu ndig dini jingon mui drek dip gi jiyai nimai bak no di ningon ngun. Lewo TUHAN ricuk da kwei leu binhyepo ditri tut nihyet bije.”

¹⁶Lene nibou nya kin ide limwa nya ipai bak imam nya kin nabi nya “No dini tri tut nihyet binye tug hon TUHAN di nok ide Allah ninyeng. Gima rino ma igyai nimai binoni au.”

¹⁷Gima ngwig lene yo di inyeng jei nya ibou poi ikiju bigya ei ide limwa nya di idem yam ei yoho bei bipai biyok,

¹⁸ “Tirigi Hizkia ninyeng tak kep minu Yehuda lene Nabi Mikha leu Moresyet tri tut TUHAN Di Sindem Bibor nihyet bak yo dima, ‘Tungwatu nya miba sapi bikkin dihyei Sion noyam kin yo di igyai miai. Minu ndig Yerusalem mitti binok ig kum kroi ba, mbigdip di iwin TUHAN De Ig eisi dini minok baham tindurti.’

¹⁹Noro Nibou Ndig Hizkia kin timiei Yehuda nya igyai nimai bak Mikha bi. Leu api Hizkia kuk no bak TUHAN bahara Noni bingondut yok. Lene TUHAN luei ningonti tut mun di buhun bibor di Noni mibindei cut igkep yok. Noro tini bu ne nahanok minibindei ba, mun di buhun bibor micut igkep nye.”

²⁰Nipou ne tungwagom nihyet wer mpiahi tut minu ndig dini kin timiei Yehuda nya tug hon TUHAN ninyeng noyam kin Yeremia. No dima ne Uria di Semaya nipmot di kwei leu Kiryat-Yearim ri.

²¹Tirigi Nibou Ndig Yoyakim kin nide nibou pran nya kin nibou di igya kui Yoyakim imiap kep Uria nihyet lene ipi bigyai nimai bak noro noni miap tut ingon kanti dima bidigit tut lene nang ug ei minu Mesir biningwes ngun.

²²Noro Nibou Ndig Yoyakim pinak Elnatan di Akhbor nipmot kin yo di igya kui noni ba, yuug nggok Uria ei minu Mesir.

²³Ibuwak noni hanyen kwei leu api Nibou Ndig Yoyakim bindei ba, tungwatu nya igyai nimai binoni leu api icom ningut ug ei yo di indwau nya ijui dip.

²⁴Mbro nok gima lo, mun di kei pek kep mem da tug hon Ahikam di Safan nipmot di mpu da apino nibou nya ikes da ei ide limwa nya indati leu binhyepo igyai nimai bida bi.