Read Hatam YEREMIA 29 Bible Online

YEREMIA 29 - Hatam bible

YEREMIA 29

¹ Dipas srat bak imam kin nabi nya kin nibou di ibie tut limwa nya di igyaijo yo kin nindigsi nya di Nebukadnezar kat yok di kri yok leu minu ndig Yerusalem ug ei minu Babel tu.

²Dipas srat dima niabiati siceu nya ikat Nibou Ndig Yoyakhin kin nipmem kin yo di igya kui noni di ibong ei nibou ndig de ig kin pinjoi ndig di inyeng tak kep minu Yehuda kin minu ndig Yerusalem nya kin tukan nya kin yo di igyai kep midyai igkei di icom yok ug ei ingkiaisi leu su.

³Diyai srat dima bak Elasa di Safan nipmot kin Gemarya di Hilkia nipmot di Zedekia di nok nibou ndig mem minu Yehuda pinak yok ba, yuug ngat Nebukadnezar di nibou ndig minu Babel. Srat dima nibimbiti pai,

⁴“TUHAN Di Sindem Bibor di Allah Israel pai bak yo di Noni sindui sut ba, Nebukadnezar kat yok ei minu ndig Yerusalem bicom yok ug ei minu Babel,

⁵“Ma jibong hak ei jingkiaisi dima ba, jinda jo kep ig jide nya cem bijingot. Ma jiyai miai ba, jingat jingwes ei ningat nyati bijiyem ug.

⁶Ma je di sop kin pinai nya jiwak yam leu binhyepo jiyai munggwom. Lene ma jisindui sut ba, jimunggwom bat sop nya kin pinai nya cem iwak yam bu leu binhyepo igyai munggwom. Suar jimangti kum eisi. Ma jimangti cut au.

⁷Ma jiyai kep midyai di bindei ba, jeni kin timiei minu ndig ngot di dicom je ug eisi nya cem ibong kei igwam kei. Ma jingat nadi tindei minu ndig ngot dima leu binhyepo dinjei mun di kei bak yoni. Leu gino yo dima ibong kei igwam kei lene jeni cem mijibong kei jigwam kei bit yok ba, mun di jisuar nya midem mem je.

⁸Da di TUHAN Di Disindem Bibor di Allah Israel disok kep je ba, jiyok ngon kep. Ma jisindui sut nabi di ibong srig jikieti ba, iris mun bije au. Nok gima cem tut nindigsi nya bu di ipai bije bipia bon itri tut mun di mipek kep mem je ei nidipti bu kan nya ighyet cem au. Ma jingig jitingou mem ide mumpriem nya di imbot kep tut bije cem au.

⁹Yoni iba dinyeng bipui sut mun di igbit bi bije. Digicuk yok hwou ndam je bi. Da di TUHAN disimbot dat tu.”

¹⁰ TUHAN pai “Tirigi nijam ari bingwam ningot muhwindacan dem mem minu Babel tu lene midingig diyai kep je hanyen bu. Ba, midiyai mun bipek kep Ditde nipreu ei mem jeti bidibuwak je hanyen kwei ei jitimieisi dini.

¹¹Dangkom dikan tut nikos tutti di bit leu dingon kanti mem je bi e? Dikos tutti dima mibindei ba, juum mun di buhun bi. Noro midibindei ba, jibong kei jigwam kei. Mun di jiyok jingon mem mipek kep mem je ei nijam gi nidipti bu ri.

¹²Mpe dima lene jahara Da leu api midimpu je. Jikwei ngat nadi bak Dani lene midibuhup jide nadi.

¹³ Jinggok Dani leu api mijingat Da lewo jiba ningon titut yam binggok Da.

¹⁴Igbit ri. Jikwei um Da leu api midibuwak je hanyen kwei ei jitimieisi. Midinduk je kwei leu bikwop ngkiai nya ikieti kin minu di dibindei ntek gimahap je bidicom je eisi. Lene dipindi je bijinok nitungwatu hanyen bu. Da di TUHAN disimbot dat tu.”

¹⁵Bit leu jeni ne TUHAN yai nabi nya bije ei minu Babel.

¹⁶Ma jimiap kep mun di TUHAN pai kep di bitut nibou ndig di ntun Daud him di ninyeng tak kep minu ndig mem nijam dini kin mun di TUHAN pai sut timiei minu ndig dini di jide adig-ajoi di ikat yok di isima ei ingkiaisi bit je bi.

¹⁷TUHAN Di Sindem Bibor pai “Midikes pran kin ninggum kin nsuwer ajar ei yok dip. Dibibon yok ba, idem kep biei ara ningat di kroi bibor di dem mem gima tungwatu nya igyem kan bi.

¹⁸Midiba pran kin ninggum kin nsuwer ajar buhuk-huk nyen yok. Apino timiei minu ngot di itou kep mun di cut igkep timiei Yehuda nya ingon ttin bibor drek dip. Tungwatu nya bidem minu di dibindei ntek gimahap yok ug eisi nya igyai ttin ba, ittin tut mun di itou kep nya. Yoni mporo iba ighyet bicig timiei Yehuda nya lene iba inyeng bisigion yam cem.

¹⁹Mun nyeng dima yok hagom cut igkep yok drek dip gi ibit Ditde nisokti di disok kep yok bijo kikau tug hon ditde awak di nabi nya bi ri. Ikou sut Ditde nisok kep yokti dima.

²⁰Je di dicom je ug ei minu Babel jahagom e, ma jingig jitingou mem Da di TUHAN dihyet di dipai hwou bak jeni.”

²¹TUHAN Di Sindem Bibor di Allah Israel tri tut Ahab di Kolaya nipmot kin Zedekia di Maaseya nipmot di itri tut mun nyeng di nijit bi nya bije tug hon TUHAN ninyeng. TUHAN pai bipia mikes yoni ei Nebukadnezar di nok nibou ndig mem minu Babel ninda nsi ba, noni miyai nimai biyok bou jiyai him.

²²Gima rino mpe di timiei Yehuda nya di ide siceu nya ikat yok di ikat yok leu minu ndig Yerusalem ug ei minu Babel isigion yam lene ipai ‘Handei kon ba, TUHAN bibon na noyam kin Zedekia kin Ahab di nibou ndig minu Babel ndig yok ei humti tut igyaisi hak ug.’

²³TUHAN bindei ba, mun di suwok bibor dima cut igkep yok drek dip ide sisar di nindig bibor di ibon ei minu Israel tu. Yoni icut tut hi nitnem lene iba TUHAN ninyeng bitri tut mun di igbit bi nya cem. Ba, gima yok hagom srep tut TUHAN ningon kanti. Noni kan tut sisar di ibon nya ba, mikiju nok no di tri tut igyai munti di Noni ngat bou niyai him bipai kep yok. Da di TUHAN disimbot dat tu.”

²⁴TUHAN pai bida suar apai bak Semaya di nitimieisi leu Nehelam bipia,

²⁵TUHAN Di Sindem Bibor di Allah Israel pai Semaya pinak srat gau nonti ninyeng bak timiei minu ndig Yerusalem nya yahagom kin imam Zefanya di Maaseya nipmot kin imam nindigsi nya kwei su. Noni pas ei srat dimati bak Zefanya,

²⁶“TUHAN kon nani ba, aya luei Yoyada nohoti nok imam tu. Ba, nogindini nani rino akrau ninyeng di jei ei TUHAN De Ig. Gima rino ayai nisindemti mem gima abindei ba, yo di igya kui nani iba lante ngkimom nitu biteu bikwop tungwagom-gom di mirei bon di bon nonti nok no di nabi nikimam a.

²⁷Nggon rino asindui sut Yeremia di nitimieisi leu minu ndig Anatot bitri tut nihyet tereu nok no di nabi ei jikieti dima i?

²⁸Suar jitak kep no dima nuhui lewo noni tri tut nihyet kwei bak nye di nibong ei minu Babel bipia minibong ninno ei minu dini yo. Gima rino noni bidip huk nye bipai bipia suar ningot ig ba, niyai miai cem ba, ningat ningwes ei ningat di jo miaisi nya biniyem.”

²⁹Imam Zefanya kwop srat dima bida.

³⁰Ba, TUHAN cuk da,

³¹bidisok nihyet ei Semaya dip bak mben Israel di isima ei ingkiaisi ei minu Babel yahagom. Gima rino disok nihyet ei noni dip bak yo dima bidipai “Semaya tri tut nihyet bije tereu nok no di nabi noro Da di TUHAN dicuk noni tut bi. Noni bindei ba, jiba jingon com nihyet di bicum nitu he dima.

³²Nibon munti dima bindei ba, jiba jimbuk bihwen Da. Gima rino midikes hukum ei noni kin nide nintun him yamti di bram yam nya dip. Hukum dima rinok gini. Noni kin nide nintun him yamti di bram yam nya mimai ba, ingat mun di kei dino midibon mem Ditde limwa nya bou igyai him bi. Da di TUHAN disimbot dat tu.”