Read Hatam YEREMIA 3 Bible Online

YEREMIA 3 - Hatam bible

YEREMIA 3

¹TUHAN pai “Gino nijjep kou nitnem bikes ei leu api hiter wak nok nitnem bu lene ma nijjep timiei pima kwei yai hanyen nok nitnem au. Lewo mun dima mibindei ba, map kui minu dini. Noro je di mben Israel jiyem njita tut sop hiter imang bibor tu. Leu api tini bu ne jijoi sut jingkwei hanyen ndam Da bu e?

²Jikon jibou bijimian kui ug ei mbigdip ninggram him nya! Ba, jingat mpia di tou rino juug ei di jicut ei sisar nikrar kep yamti bigyo i? Jiyai munti dima dem kep mben Arab ei iggum ndigsi. Jigwam sir puig ninghas bijimem kep ser no di kwei yem njita tut sop di nikrar jut. Jibindei ba, map kui minu dini tug hon jide nicut ei sisar niyem njita tut sop hiterti kin jide nibon mun di kinei biborti cem.

³Gima rino biget di kwei leu mpia-bbed him ntus. Biget di but mem nijam di but di biwaisi biei di nimeng tu cem gi but kwei bi. Jidem kep sop di nikrar jut. Gi mbun jimmai sut jenti kan bi.

⁴Jipai biDa bipia Dani ne jicig rin bidingon ngakei je habiei jimien kwei.

⁵Lene jipai biDa bipia midigga jeni bijo kikau bi. Je di mben Israel jipai nok gima noro no jibon kep mun di kinei bibor nyeng hagom yo.”

⁶ Mpe di Nibou Ndig Yosia ninyeng tak kep limwa nya lene TUHAN pai bida “Angat mun di mben Israel di inok sop di ningon gom bi dima ibon tu e? Ikes Dani ei leu ba, icut ei sisar nicut tut yamti bikwop mbigdip di anai kin bikwop biei ndig di nimeng nggrou nibehei cem hagom.

⁷Dikan bigya tirigi ibon mun di kinei dini yok hagom leu lene mingkwei hanyen ndam Da. Noro igingkwei hanyen bi. Igyai kep mun di kinei bibor dima hagom bou ide adig-ajoi di timiei Yehuda nya di ingon gom tut Da bi igyai him.

⁸Timiei Yehuda nya ingat bipia dikou sut mben Israel di inok sop di ba ningon com Da bu bi. Dibon srat nikou sut yam bidiyai biyok lene dibikes yok drek dip gi icut ei sisar niyem njita tut sop hiterti tu. Noro timiei Yehuda nya ittin tut gima bi ba, yoni cem yuug cut ei sisar di kinei dimati bram bu.

⁹Gi mbun immai sut yonti cem kan bi. Ibindei ba, map kui ide minu drek dip ide sisar nikuk no bak tig kin biei nya.

¹⁰Tirigi ibon mun dima yok hagom leu su lene timiei Yehuda nya di ingon gom tut Da bi pima iba ingon can bingkwei hanyen ndam Da. Lewo ingon sren hak bi. Da di TUHAN disimbot dat tu.”

¹¹Leu api TUHAN pai bida bipia mbro nok gino mben Israel iba inghim bak Noni lo, ningat ne ide niyai munti nya kei njiriek timiei Yehuda nya di ingon gom tut Noni bi.

¹²TUHAN cuk da ba, suar duug pai bak mben Israel “Je di mben Israel di jingon gom tut Da bi e, ma jingkwei hanyen ndam Da. Dingondut je nindig bibor ba, midigga je kikau bi.

¹³Ma jipai jit bipia jitunggwei ba, jihwen bit jide TUHAN Allah tu. Ma jipai jit bipia jikiber jide ningon ngakeisi ei nung di ngkiai nya ikuk yok bak nya cem ei bikwop biei ndig di nimeng nggrou nibehei nya cem ba, jibit Ditde nicuk jeti nya bu bi cem tu. Da di TUHAN disimbot dat tu.”

¹⁴TUHAN pai “Je di limwa di jingon gom bi e, ma jingkwei hanyen ndam Da. Jeni ne Ditde nya ri. Midimbus tungwatu nya leu bikwop jide minu ndig nya hagom. Ba, dimbus ibou can-can leu bikwop jide keret nya hagom cem. Lene midibuwak je hanyen ug ei Nungug Sion.

¹⁵Lene midita nibou di ibit dihyet nya mem je yo. Yoni iba ningon di ki kin ningon di huk niti bibie tut je.

¹⁶Leu api tirigi jimangti kum eisi ba, jimang bibor bijikieng kep mpia ei mpia dima lene tungwatu nya misimbot kep biyam tut Ditde Brua Gi Preu bu bi. Yoni mikan-kan nyen tut ba, igyok ngon kep bu bi. Yoni isuar Brua Gi Preu ba, ibon nijep hi bu cem bi.

¹⁷Mpe dima lene tungwatu nya mindat minu ndig Yerusalem ninyeng ‘TUHAN De Banggo Mbrei.’ Ngkiai nya yahagom minduk yam ei minu ndig dima mem gima ikuk yok biDa. Yoni mibit yonti ingon kanti di mbum ba, kinei dima bu bi.

¹⁸Mben Israel mibicom yam bit timiei Yehuda nya ba, yahagom ingkwei hanyen leu ingkiaisi di jo nite bei mpia nijjai kwei. Yoni mingkwei hanyen kwei ei minu di diyai bak jidigup bat-jidigai bat nya nok dihyei ninda rom tu.”

¹⁹TUHAN pai “Je di mben Israel e, dijoi sut gima diya um je dem kep nok diya um dimunggwom bat nya ba, diyai minu di biyai jingon di kei bije. Minu dima kei-kau dor njiriek minu nindigsi ei dihyeisi dini hagom. Dijoi sut bipia jijem Dani Jicig rin apino mijinang leu Da bu bi.

²⁰Noro jidem kep sop wak cam nya di ingon gom tut ijjep bat nya bi ba, jingon gom tut Dani bi. Da di TUHAN disimbot dat tu.”

²¹Tungwatu nya imiap nihyet hwen yamti kin nihyet kui yamti ei nungug dip nya. Nihyet dima ne limwa mben Israel ighyet di ipim ba, yahara ser ri. Lewo yoni ibon sisar ba, ibbwe ser ide TUHAN Allah tu.

²²Je di jiba jinghim bak TUHAN jahagom e, ma jingkwei hanyen ndam Noni! Noni mibindei ba, jikei hanyen bijingon gom tut Noni. Leu api jipai “I, nogindini nikwei ndam TUHAN lewo Noni ne nyende Allah ri.

²³Gi ninduk yam ug ei nungug dip nya binikuk nye bak kwar nya ne mikui-kausi he. Nyende TUHAN Allah Nongkom mimpu nye di mben Israel.

²⁴Nikuk nye bak Baal di nok kwar di biyai nimmai bindei ba, nimunggwom bat nya isar ningwig leu nye. Ba, mindhe-ndhe nimuhup tu nok sapi kin domba nya di nidigup bat-nidigai bat nya ibrim ingkek tut di nipou yo nya cem sar leu nye tu.

²⁵Gima rino nna ba nigwam nimmaiti ug. Nna ba niwer mindhe tut ug. Lewo niya tut nidigup bat-nidigai bat nya ba, nibon sisar tut nyende TUHAN Allah ninno tu ba, nigibit Nide nicuk nyeti nya cem bi sren.”