Read Hatam YEREMIA 32 Bible Online

YEREMIA 32 - Hatam bible

YEREMIA 32

¹ Mpe dino Zedekia di nok nibou ndig mem minu Yehuda ninyeng tak kep limwa nya buug ei ari bingwam gi nisimnai lene Nebukadnezar di nok nibou ndig mem minu Babel ninyeng tak kep limwa nya buug ei ari bingwam gi nisimnaimuhwidip brimigtehiningai lene TUHAN mbrap bit da.

²Mpe dima lene tentara Babel icoi bihwen minu ndig Yerusalem. Nibou Ndig Zedekia no kat da ba, bindei sima da ei nide mpia di jo bas hak di iba ngug tig bikrop ttai.

³Noni pai kep da drek dip gi dipai hak ei imang bibor yoho bei bipia TUHAN pai “Midisindui sut nibou ndig minu Babel ba, noni mibindei timek minu ndig dini leu ba, yai biyati,

⁴leu api Nibou Ndig Zedekia ningwes ngun bi. Midikes noni ei nibou ndig minu Babel ninda nsi leu api noni miya ei nibou ndig minu Babel noho bei bimbrap bit ba, imbrap bit yam.

⁵Apino noni mikri Zedekia ug ei minu Babel. Zedekia mibong ei mpia dima bibou dikes hukum ei noni dip ug e. Mbro nok gino noni kon pran bit tentara Babel nya lo, noni mibindei timek yok kan bi. Da di TUHAN disimbot dat tu.”

⁶Lene TUHAN pai bida,

⁷bipia Hanameel di dipmum Salum nipmot mikwei hara da leu binhyepo dipek nide dihyei hanjop nsi gom leu no ei minu ndig Anatot ei keret Benyamin ide hanjop nsi. Lewo suar nittom ningat di dani dipek hanjop nsi dima.

⁸Leu api Hanameel kwei ngat da ei nibou ndig de mpia di jo bas hak pima ba, hara da leu binhyepo dipek nide dihyei hanjop nsi dem igbit TUHAN nipaisi. Gima rino diba dingon com bipia TUHAN nimbrap bit dati pima ne igbit ri.

⁹Gima rino dikwop ditde mitiei perak bidiba nitig simnaimuhwidip brimigtehican bipek dihyei hanjop nsi dima leu noni dem igbit dihyei nibok a.

¹⁰Dijem yo di ikwei gwam tut da kwei bingat gi dipek dihyei hanjop nsi dima bou igyai him leu api diyok dinda ceti ei srat dimati biditak buk kep ei yahagom yoho bei. Lene dibakilo mitiei nimangti nok gi dem bidiyai bak.

¹¹Leu api diyai srat nipek dihyei hanjop nsi nimeng can dima bidiyai gi hi di ditak buk kep di dibindei coi nicukti kin nikos tutti nya eisi kin gi hi di ditak buk kep bigyo cem,

¹²bidiyai srat cin dima bak Barukh di Neria nipmot ba, Mahseya nignyon. Diyai srat cin dima binoni bou Hanameel kin yo di ikwei gwam tut da di ingat nipek dihyeisi bou igyai him di igyok inda ceti ei srat dimati kin yo di igwam ei ninsi dima yahagom yoho bei.

¹³Dipai bak Barukh ei yahagom yoho bei,

¹⁴“TUHAN Di Sindem Bibor di Allah Israel cuk na leu binhyepo ayai srat di ditak buk kep kin srat di ditak buk kep bigyo cem lene abindei coi hacem ei dibijig di ngkiem kei di ndok leu binhyepo jo ninno.

¹⁵TUHAN Di Sindem Bibor di Allah Israel pai bipia ei nidipti bu ne nitri-nipek ig kin dihyei kin miai ba anggur nghousi mikieng kep minu dini bu yo.”

¹⁶Niabiati diyai srat nipek dihyei dima bak Barukh leu su lene dingat nadi.

¹⁷“TUHAN Di Ninyeng Jei e, Nani rino aba Ade nisindemti di nindig bibor bipai tes mpia-bbed him kin dihyeisi dini. Mun nyeng hi di nggruk mem Nani bi.

¹⁸Ando tut Ade ningon ngakeisi di jo kikau bak tungwatu nya ibou sribu-ribu noro akes hukum ei tungwatu nya dip drek dip ndigpoi di ide nya ide sisar. Nani ne Allah di nindig bibor ba, mimbri kui Na. Anyeng rino TUHAN Di Sindem Bibor.

¹⁹Angon kanti di akos tut ei nya bibon ninggap leusi ba, Ade nibon munti nya mindur. Angat bidem mun nyeng hagom di tungwatu nya ibon ba, abirop biyok dem igbit ide nibon munti nya.

²⁰Nipou yo ne abon mindur kin mun di bibon ninggap leusi nya ei minu Mesir. Abon nok gima kikau kwei bipek ammani kep ei mben Israel kin ngkiai nya ikieti apino anyeng di jei bibor tibim ug ei dihyei nisurti-nipekti.

²¹Aba Ade nisindemti di nindig bibor bibuwak mben Israel ba, yehei leu minu Mesir. Abon mindur kin mun di bibon ninggap leusi nya tug hon bindo di biyai ningon di ttin bibor bak ide siceu nya.

²²Ayai minu di nnum kei dini cem biyok bit leu nok Ade nipreu bak idigup bat-idigai bat nyati.

²³Noro tirigi ikwei bong ser minu dini ba, igyai bigyati ne igibit Ade nicukti nya ba, igiyaijo dem igbit Ade ningginausi nya cem bi. Igiyai mun nyeng hagom di acuk yok tut nya gom cem bi. Gima rino bitig dino akes mun di buhun dini yok ei yok dip a.

²⁴Mben Babel ingot ig ninggilai nut yam bijo anai mem ibiyon ttai minu ndig nya mem gima ibiyai minu ndig dini bigyati tu. Ba, ikinyon ei nihwenti cem tu. Pran kin ninggum kin nsuwer ajar mibindei ba, minu ndig dini cut ei indati. Angat bipia mun di asimbot dat nya hagom pek kep bijo nibreisi tu.

²⁵TUHAN Di Ninyeng Jei e, mbro nok gino ariman bu ne mben Babel igyai minu ndig dini bigyati lo, Nani rino acuk da di dipek dihyei dini ei yo di ikwei gwam tut da di ingat bou igyai him nya pima yoho bei.”

²⁶Leu api TUHAN pai bida,

²⁷“Dani ne tungwatu dihyeisi dini hagom ide TUHAN Allah ri. Mun nyeng hi di nggruk mem Da bi.

²⁸ Midisindui sut minu ndig dini ba, Nebukadnezar di nok nibou ndig mem minu Babel miya tut nide tentara nya ba, inyeng tak kep. Yoni migyai bigyati,

²⁹leu api ibindig minu ndig dini bitut ig ngot di Ditde limwa nya ibibon diggati eisi nya tug hon gi indig biei nggrai di ui-gwang kei bak Baal ba, ikiber ba anggur ngei mem ibikuk yok bak kwar nya ei ig bou njek dip cem.

³⁰Habiei leu nipui sut ide niyaijoti nimbie him kwei ne mben Israel kin timiei Yehuda nya ibindei ba, dingon kei bi. Ibindei bidigga yok tug hon ide nibon munti di kinei nya.

³¹Habiei leu nimbie him di iwin minu ndig dini ne timiei nya ibindei bidigga bibor. Dikos tut mem gima dibindei sar minu ndig dini,

³²drek dip mun di kinei ngot di timiei Yehuda kin minu ndig Yerusalem nya bitut ide nibou ndig nya kin nibou di igya kui yok kin imam nya kin nabi nya ibon tunggwei nya.

³³Mbro nok gino dingginau yok bijo ninno lo, igimiap kep dihyet ba, ingon guhuk niti cem bi. Apino iba inghim biDa.

³⁴ Ibindei ba, map kui Ditde Ig di ingot mem gima ikuk yok biDa eisi tug hon gi itas ide kwar nya di bibon dingon him wei sut eisi.

³⁵ Ba, iwin nimbar hum dok nya mem ibikuk yok bak Baal ei Mbang Briep Hinom bibui munggwom di ide nya bindig ei nimbar hum dokti dima yok ba, ibikuk yok bak Kwar Molokh. Digicuk yok mem gima ibon sisar di kinei bibor dima ba, ibindei dino ide limwa di mben Yehuda nya cem ibon sisar dima bi sren. Dikan-kan nyenti di nok gima hi jo dibou ngwakti bi sren.”

³⁶TUHAN di Allah Israel pai bida “Yeremia e, mben Israel ipai bipia pran kin ninggum kin nsuwer ajar mibindei ba, minu ndig dini micut ei nibou ndig minu Babel nindati. Nogindini ma amiap mun di dani dipai bina cem.

³⁷Midinduk mben dini leu minu hagom di dibindei ntek gimahap yok ug eisi nya drek dip gi digga yok bibor ba, diba yo bicom yam hanyen. Dibuwak yok kwei bidikes yok hanyen ei mpia ttou nsi dini bidisindui sut ba, ibong kei igwam kei eisi.

³⁸Mpe dima lene Ditde limwa nya rino yoni ba, dinok ide Allah.

³⁹Midibindei ba, ikos tut ingon kanti gom ngat. Ingon kanti gom ngat di ikos tut dima rino ibou cut bak Dani bijo ninno bijo kikau. Ide nikos tutti dima mibindei ba, mun di kei mipek kep mem yonti kin ide nintun him yamti di bram yam nya yo.

⁴⁰Nipreu eisi di dipreu ei bit yok mijo kikau. Midikes hon ninjei mun di kei bak yoni bi. Dibindei ba, iba ingon titut bittin tut Dani ba, ibou cut biDa cem. Diyai gima leu binhyepo iba inghim bak Dani bu bi sren.

⁴¹Dijoi sut nibon mun di kei bak yoni bidibindei ba, ibong ei minu dini bijo ninno bijo kikau.

⁴²Midinjei mun di kei di dipreu ei mem yok tu nya bak yoni noyam kin gi dikes mun di buhun kwei ei yo dip mem nijam dini.

⁴³Yo dini ipai biyam bipia minu dini midem kep iggum ndigsi di tungwatu kin mindhe-ndhe ibong ser bu bi ba, ipai bipia minu dini micut ei mben Babel indati bihigom. Noro dipai bipia niabiati bu ne imunggwom bat nya miba mitiei bipek dihyei hanyen bu ei minu dini.

⁴⁴Yoni migyok inda ceti ei srat nipek dihyeiti bitak buk kep cem ba, yo di ingat gima bou igyai him mibindei sindem srat nipek dihyeisi dima. Mun dima mipek kep ei keret Benyamin ide hanjop nsi kin minu mien di jo ttai minu ndig Yerusalem nya kin minu ndig ngot di jo ei minu Yehuda kin minu ndig ngot di jo ei nungug him nya kin minu ndig dijo nungug nimig nya kin minu Yehuda nibiho cem. Midingkwei yok ba, ibong kei igwam kei hanyen bu ei idihyei dini. Da di TUHAN disimbot dat tu.”