Read Hatam YEREMIA 33 Bible Online

YEREMIA 33 - Hatam bible

YEREMIA 33

¹Tirigi disima bidigwam ei mpia di jo bas hak pima lene nisok mem dati hi kin bu tibim kwei leu TUHAN,

²di pai tes dihyeisi dini boop lene kes bijo nijoti cem pima. Noni pai,

³“Ahara Da leu api midibuhup ahyet. Midimbot kep tut mun di kei-kau di biyai ningon nggap leusi di akan tut bi sren nya bina.

⁴Mbro nok gino tentara Babel nya inggek nibou ndig minu Yehuda nide ig kin ig ngot di jo ei minu ndig Yerusalem mem gima ibingot ig ninggilai binut yam mem gima ibiyon ttai ide siceu nya lo, Da di TUHAN di Allah Israel dipai bipia,

⁵timiei Yehuda nya ihwen tentara Babel mikui-kausi he bitig dino minu ndig dini mpung tut nimbiam ngut di diba Ditde nigga biborti biyai nimai biyok nya. Diba dingha bak minu ndig dini drek dip ide nibon munti di kinei bibor nya.

⁶Noro ei nidipti bu lene dibindei minu ndig dini kin timiei nya bikei hanyen nok gi nipou pima bu. Yoni migyai nisindemti hanyen bu. Midibindei ba, nibong kei nigwam keisi kin ningon jo nyahanti kieng kep idihyei hanyen.

⁷Midibindei timiei Yehuda nya kin mben Israel ba, iwer yok mipbor ngat nok gi nipou pima bu. Yoni mikiju bigya nok Ditde limwa nya hanyen bu.

⁸Midipiap ingonti leu sisar di ibon tut Da bidikos ser ide sisar nya kin ide naham nimbuk kep Dati nya.

⁹Minu ndig Yerusalem minok minu ndig di biyai dingon nggei-hi-nggei kin dingon kei. Ngkiai nya bidem dihyeisi dini hagom mittin tut Da bidigit tut Da bikon dinyeng drek dip mun di kei di dibon mem timiei minu ndig Yerusalem kin nibong kei nigwam keisi di diyai bak minu ndig dima.”

¹⁰TUHAN pai “Tungwatu nya ipai biyam bipia minu ndig dini dem kep iggum ndigsi ba, tungwatu nya kin mindhe-ndhe nya igibong ser bi. Ipaisi dima ne igbit ri. Lewo minu ndig ngot di jo ei Yehuda kin puig ngot di mbut ei minu ndig Yerusalem hagom ngwak ba, tungwatu nya kin mindhe-ndhe nya hi gi bong eisi bu bi.

¹¹ Noro nihyet niyai nilleisi kin ningon di nggei-hi-nggeisi kin nihyet nibon pesta niwak yamti mitibim hanyen kwei leu mpia dini yo. Doia di tibim leu yo di ibon midut nibipai sigyo ei Ditde Ig yuhui him cem mitibim yo. Yoni mipai, “Ma jipai sigyo bak TUHAN Di Sindem Bibor lewo Noni singat kei ba, ningon ngakeisi jo ninno bijo mimpui.” Midibindei ba, nibong kei nigwam keisi kieng kep minu dini noyam kin gi nipou pima. Da di TUHAN disimbot dat tu.”

¹²TUHAN Di Sindem Bibor pai “Mbro nok gino minu Israel kin minu ndig ngot di tungwatu nya kin mindhe-ndhe nya ibong ser bu bi dini noyam kin iggum ndigsi lo, ei njap nidipti bu lene miwer minta nidumti mem tungwatu nya ighyen kep domba nya eisi.

¹³Gembala nya mikwop ide domba nya imangti hanyen bu ei minu ndig ngot ei hanjop nungug him kin hanjop nungug nimig kin minu Yehuda nibiho kin keret Benyamin ide hanjop nsi kin minu mien ngot di jo ttai minu ndig Yerusalem kin minu ndig nindigsi bidem minu Yehuda. Da di TUHAN disimbot dat tu.”

¹⁴ TUHAN pai bu “Tto bou midem leu api midiyai mun bipek kep gi preu di dipreu ei mem mben Israel kin timiei Yehuda nya.

¹⁵Mpe dima lene didimig tungwagom di ningon sren di ntun Daud him ei mem gima kui bigwam nok nibou ndig. Nibou ndig dima mibindei mbut ningon gomti kin niyai mun igbitti bidem minu nisurti-nipekti.

¹⁶Miditeu timiei Yehuda kin timiei minu ndig Yerusalem nya bingwes ngun. Dibindei mbut nibong kei nigwam keisi mem yok. Dijem minu ndig Yerusalem ninyeng ‘Ide TUHAN Ne Niteu Kep Nye Cig Ri.’

¹⁷ Da di TUHAN dipreu ei bipia tungwagom di ntun Daud him mikui nok nibou ndig mem minu Israel bikwop nok bijo kikau.

¹⁸ Imam di intun Lewi him nya rimigyai midyai mem Dani ba, ibon midut nibiyai nikos ser sisarti kin midut njita nibipai sigyo bak Allahti kin midut nindig mindhe titut kep humti cem bijo kikau.”

¹⁹TUHAN pai bida,

²⁰“Dingot nipreu eisi mem njap kin mmun leu binhyepo njap kin mmun mitau kwei mem nitutti di igbit. Bit bon hi dip tut gi preu dima kan bi.

²¹Nok gima cem dingot nipreu eisi mem Ditde awak di Daud ba, nipreu eisi dima pai bipia tungwagom leu yo di intun noni him mikui bigwam nok nibou ndig bikwop nok gima bijo kikau. Dingot nipreu eisi mem imam di intun Lewi him nya ba, nipreu eisi dima pai bipia yoni migyai midyai mem Da bijo kikau. Bit bon hi dip tut gi preu dima kan bi.

²²Midibikum ei yo di intun Ditde awak di Daud him kin imam di intun Lewi him nya imangti apino imangti midem kep iggum ndung di jo muk nintig dip kin ham mpia-bbed him di bit bon hi kwop nimangti kan bi.”

²³TUHAN pai bida,

²⁴“Angig atingou kep mun di ngkiai nya ibohom ndat di bitut mben Israel kin Yehuda tu e? Ibohom ndat bipia dicom mben cin di didimig yok ei dima tu. Gima rino ibisrip huk Ditde limwa nya nok yo di ibon inyeng bi ba, ibingat yok nok mben hi rin bu bi.

²⁵Noro Da di TUHAN dingot nipreu eisi mem njap kin mmun ba, diba Ditde niggai serti nya bidimig mpia-bbed him kin dihyeisi dini ba,

²⁶nok gima cem midikrau kep Ditde nipreu eisi mem yo di intun Yakub him kin Ditde awak di Daud bijo kikau. Didimig tungwagom leu yo di intun Daud him sindam ba, ninyeng mitak kep yo di intun Abraham kin Ishak kin Yakub him. Midingondut Ditde limwa nya bidibindei ba, ibong kei igwam kei hanyen bu.”