Read Hatam YEREMIA 35 Bible Online

YEREMIA 35 - Hatam bible

YEREMIA 35

¹ Tirigi Yoyakim di Yosia nipmot gwam nok nibou ndig minu Yehuda lene TUHAN pai bida,

²“Aug mbrap bit Rekhab ninsi de nya lene abuwak yok kwei bijicoi ug ei ninsi gom ei Ditde Ig leu api ahug ba anggur ngei ei mokti mem yok bidut.”

³Leu api duug buwak Rekhab ninsi de nya yahagom kwei. Yo dima ne Yaazanya di Yeremia hiter nipmot ba, Habazinya nignyon bitut nide adig-ajoi nya kin nipmot bat nya kwei.

⁴Dibuwak yok kwei ei TUHAN De Ig binicoi ug ei yo di igya kui Nabi Hanan di Yigdalya nipmot ide ninsi. Ninsi dima jo Imam Maaseya di Salum nipmot de ninsi nidip hu kwei ba, dideu yo di igya kui nibou ndig nindigsi nya ide ninsi a. Maaseya ne no di ninyeng jei di ya ser dimbou pmem nya ei TUHAN De Ig ri.

⁵Leu api dikon mok di ba anggur ngei joti bidikes ei Rekhab ninsi de nya yoho bei. Dibikes ampou nya cem simin bidipai biyok “Gima ne jidut ug.”

⁶Noro ibuhup “Nyeni nigidut ba anggur ngei bi sren. Yonadab di nidigup-nidigai Rekhab nipmot ggai ser nye kin nyende nintun him di bram yam nya tut ba anggur ngei binidut bi. Niggai serti dima jo ninno bijo kikau.

⁷Niyai miai cem nita njita bou cem nima miai ba anggur nghousi nok ninda rom cem ninyohou ba anggur nghousi cem hagom bi bit leu niggai ser nyeti pima. Tirigi niya-ya nyen ei dihyeisi dini ne ningot ig mem gima nibong niti bi. Suar nibong hak ei prak meng yati nya leu binhyepo ninok ngkiai di ibong timiei ei minu dini kikau he.

⁸Nibit Yonadab de nicuk nyeti nya hagom tu. Tirigi niya-ya nyen ei dihyeisi dini ne niya tut nitnem bat nya kin nimunggwom bat nya ba, nidut ba anggur ngei bi.

⁹Ningot ig mem gima nibong niti bi. Ninyeng tut miai ba anggur nghousi kin miai kin gandum ngan mem gima nindim ningan eisi cem bi.

¹⁰Noro nibong nyahan hak ei prak meng yati nya. Nibit nidigup-nidigai di Yonadab nicuk nyeti nya hagom tu.

¹¹Noro tirigi Nibou Ndig Nebukadnezar coi minu dini bihwen lene nikos tut ningon kanti mem ninang leu tentara Babel kin Siria. Nipri binibong ei minu ndig Yerusalem bitig dino nogindini nibong ei sirini.”

¹²Mpe dima lene TUHAN sok nihyet kwei bida bipai,

¹³Da di TUHAN Di Disindem Bibor di Allah Israel dicuk na ba, aug ngat timiei Yehuda kin minu ndig Yerusalem nya ba, atri tut disokti dini biyok. Da di TUHAN dihig ser jeni “Nggon rino jigimiap dihyet ba, jigibit Ditde nicuk jeti nya bi i?

¹⁴Yonadab ggai ser nide nintun him yamti di bram yam nya tut anggur ngei ba, idut bi. Ibit niggai serti dima ba, hi leu ikieti gidut ba anggur ngei bi sren kikau bipek njap di ammani kep. Noro tut jeni ne mbro nok gino disok kep je bijo kikau lo, jigimiap dihyet bi.

¹⁵Dipinak Ditde awak di nabi nya yahagom ndam je tu. Isok kep je leu binhyepo jikinding jiyaijoti bikei ba, jikes hon jiyai munti di kinei leu je bijo kikau tu. Nabi nya ipingok jingonti leu binhyepo jiyok ngon kep bipia ma jikuk je bak ngkiai nya ide nung nya ba, joom jenti bijinok awak mem yok au. Gima hagom nok leu binhyepo jibong kikau ei minu di dikes bak jidigup bat-jidigai bat nya dini. Noro jigingig jitingou mem dihyet bijimiap kep bi.

¹⁶Yo di intun Yonadab him nya ibit ide pung di intun him nicuk yokti noro tut jeni ne jikou sut gima jibit dihyet a.

¹⁷Gima rino Da di TUHAN Di Disindem Bibor di Allah Israel midikes mun di buhun hagom di ditin ei dingon kanti tut nya ei je di timiei Yehuda kin minu ndig Yerusalem nya dip bit leu nok gi dipai ei su. Dibon nok gima lewo jigimiap dihyet mpe dino dimbrap bit je ba, jibuhup dihyet mpe di dihig je cem bi.”

¹⁸Leu api dipai bak Rekhab ninsi de nya bipia TUHAN Di Sindem Bibor di Allah Israel pai “Jibit Yonadab di jide pung di jintun him nihyet bijibit nicuk jeti nya ba, jibindei mbut gima hagom tu.

¹⁹Gima rino Da di TUHAN Di Disindem Bibor di Allah Israel dipreu ei mem je bipia pinai nya di intun Yonadab di Rekhab nipmot him migyai midyai mem Da bram yam bijo kikau nok.”