Read Hatam YEREMIA 39 Bible Online

YEREMIA 39 - Hatam bible

YEREMIA 39

¹Zedekia di nibou ndig minu Yehuda ninyeng tak kep limwa nya ug ei bed gi nisimnai mem ari bingwam gi nimuhwindatai tu lene Nebukadnezar di nok nibou ndig mem minu Babel njei sut nide tentara nya yahagom kwei bigyon ttai minu ndig Yerusalem.

²Nibou Ndig Zedekia ninyeng tak kep limwa nya ba, ug cut njap gi nimuhwindatai mem bed gi nibitai ba, ari bingwam gi nisimnaibrimiggom tu lene siceu ihwen ngug tig bitti.

³Lene siceu nya igyai minu ndig Yerusalem bigyati.[12] Mben Babel ide nibou di inyeng jei nya yahagom induk yam kwei bidimig igyati ei Dimbou Pmem Gi Nahacan. Nergal-Sarezer kin Samgar-Nebo kin Sarsekim di nok nibou ig mem ig nibou ndig kin Nergal-Sarezer-Rabmang kin nibou tentara nindigsi nya ingat rima ei ikieti.[13]

⁴Tirigi Nibou Ndig Zedekia di ya tut nide tentara nya ngat mun di bindei yok dima lene ibingon binang mem mmun dima ndam Mbang Briep Yordan. Yahagom imbris nyahan sir nibou ndig de miai mitou nghousi bimbut kak dimbou heisi di itu ei ngug tig nipuig can kieti.

⁵Noro tentara Babel yuhuk bram yok ba, ikat Zedekia ei briep bou him dideu minu ndig Yerikho. Leu api ibuwak noni bak Nibou Ndig Nebukadnezar ei minu ndig Ribla di jo hanjop Hamat leu api noni tug ndei hukum nimai.

⁶Igyai nimai bak nimunggwom bat nya bou niyai him ei minu ndig dima bigyai nimai bak nibou Yehuda di inyeng jei nya cem yahagom.

⁷Gima leu lene itak Zedekia niyai leu api iba lante biteu ninda ba, icen biyuug sut ug ei minu Babel.

⁸Tentara Babel nya inda jo kep bindig nibou ndig de ig kin ig ngot di limwa nya ide ba, inggek ngug tig di bikrop ttai minu ndig Yerusalem cem.

⁹Lene Nebuzaradan di nibou tentara Babel kat limwa nindigsi di ingat rin ei minu ndig nya bitut yo di itti kin nimpung mben Babel nya bikri yahagom ug ei minu Babel.

¹⁰Noro noni sindui sut ba, limwa di yuhui mbum bibor di ide dihyei hanjop nsi hi nok dihyei ninda rom bi nya ba, ibong ser minu Yehuda. Noni kwas ba anggur nghousi kin ngoi dumti nya tut yok.

¹¹Lene Nibou Ndig Nebukadnezar cuk Nebuzaradan di nide nibou pran leu binhyepo bindei hei nicukti dini,

¹²“Aug nggok Yeremia ba, aya srak ko hagau noni noro ma angget noni au. Lene ayai mun bit leu nok nahara nati a.”

¹³Leu api Nebuzaradan ya tut Nebusyazban kin Nergal-Sarezer di nide nibou tentara di inyeng jei nya kin nibou tentara Babel nindigsi nya ba,

¹⁴iteu da leu ig nibou ndig de mpia di jo bas hak pima. Leu api ikes da bak Gedalya di Ahikam nipmot di Safan nignyon ba, buwak da ug ei ditde ig bidingwes ngun. Isindui sut ba, dibong bit limwa nindigsi nya di tentara nya ikat yok bi pima.

¹⁵Tirigi ibindei sima da ei ig nibou ndig de mpia di jo bas hak pima lene TUHAN cuk da,

¹⁶leu binhyepo dipai bak Ebed-Melekh di mben Sudan pima bipia TUHAN Di Sindem Bibor di Allah Israel pai “Midikes mun di buhun kwei ei minu ndig dini dip. Midikwas mun di isuar nya hi tut yok bi. Gima bit leu nok gi dipai nipou su lene angat mun di cut igkep minu ndig dini bou ayai him.

¹⁷Noro Da di TUHAN midinyohou nani. Hi di mikes nani ei yo di attin tut yok nya indati ba,

¹⁸igyai nimai bina bi. Miditeu nani ba, angwes ngun leu inda nsi. Angwes ngun bitut ayaisi cem lewo aba angon com Da. Da di TUHAN disimbot dat tu.”